ن. نازاربايەۆ: جەرگىلىكتى اكىمدەرگە ءبىرقاتار قىزمەتتەر بەرىلەدى
«اكىمدىكتەرگە وڭىرلىك دەڭگەيدە بارىنشا ءتيىمدى ورىندالاتىن قىزمەتتەردى بەرۋ قاجەت، ەڭ الدىمەن جەرگىلىكتى ماڭىزداعى قىزمەتتەردى. مۇنىڭ تيىمدىلىگىن حالىقارالىق تاجىريبە كورسەتىپ وتىر. بۇل رەتتە، ءبىر قىزمەت تەك ءبىر عانا مەملەكەتتىك ورگانعا تيەسىلى بولۋى قاجەت، قايتالاۋ بولماۋى ءتيىس. ورتالىق مەملەكەتتىك ورگاندار زاڭنامانىڭ بارلىق نورمالارىنىڭ ورىندالۋىنا باقىلاۋ مەن قاداعالاۋدىڭ ساپاسى تومەندەمەۋىن قاداعالاۋى كەرەك»، - دەدى ن. نازاربايەۆ.
ەلباسىنىڭ اتاپ وتۋىنشە، اۋىل شارۋاشىلىعى بويىنشا جەرگىلىكتى ورگانداردىڭ وكىلەتتىك شوعىرىن كەڭەيتۋ قاجەت. سونىمەن قاتار ۆەتەرينارلىق باقىلاۋ سالاسىنداعى قىزمەتتەردى جانە شتات پەن مامانداردى اكىمدىكتەرگە بەرىپ، ولاردىڭ نىعايۋىن قامتاماسىز ەتۋ ماڭىزدى.
«حالىقتى جىلۋمەن جابدىقتاۋ سالاسىنداعى قىزمەتتەردى كورسەتۋمەن بايلانىستى جەكەلەگەن فۋنكسيالاردى اكىمدەردىڭ جۇرگىزۋىنە اۋىرتپالىقسىز بەرۋ قاجەت.
ماسەلەن، جىلۋمەن جابدىقتاۋ نىساندارىنىڭ جۇمىسىن جۇرگىزۋ ماسەلەسى، جىلۋ بەرۋ ماۋسىمىنا دايىندىق تولىعىمەن جەرگىلىكتى اكىمنىڭ قولىندا بولۋى ءتيىس. بۇعان قوسا، جەرگىلىكتى ورگاندارعا قىزمەتتەر بەرۋ - بۇل ولارعا زور وكىلەتتىك جۇكتەۋ عانا ەمەس»، - دەدى ەلباسى.
اۆتور: مارلان جيەمباي
