قىتاي سپورتشىلارى قازاقتىڭ استاناسىنان ولجالى قايتتى
قىسقاشا توقتالىپ وتسەك، ەرلەر اراسىنداعى قازىرگى وليمپيادا چەمپيوندارى حوەل گونسالەس (يسپانيا)، سەرۆەت تازەگيۋل (تۇركيا)، سەباستيان كريسمانيچ (ارگەنتينا)، كارلو مولفەتتا (يتاليا) كەلدى. ولاردىڭ قاتارىندا سونداي-اق، 2000 جانە 2004-جىلعى وليمپيادا جەڭىمپازى امەريكاندىق ستيۆەن لوپەس تە بار. ال ايەلدەر اراسىنان ەكى دۇركىن الەم چەمپيونى جانە ەكى دۇركىن وليمپيادا چەمپيونى قىتايلىق ۋ تسزينيۋي (2008، 2012) ونەر كورسەتتى.
سونداي-اق استانا حالقى اارون كۋك (انگليا، ءۇش دۇركىن الەم چەمپيونى)، دابا موديبو كەيتا (مالي، ەكى دۇركىن الەم چەمپيونى)، البەرت گاۋن (رەسەي، الەم چەمپيونى)، شارلوت روۋز كرەيگ (ا ق ش، الەم چەمپيونى مەن وليمپيادا ويىندارىنىڭ جۇلدەگەرى)، نۇر تاتار (تۇركيا، لوندون وليمپياداسىنىڭ كۇمىس جۇلدەگەرى)، مۇحامماد باحچەري (يران، لوندون وليمپياداسىنىڭ كۇمىس جۇلدەگەرى)، الەكسەي دەنيسەنكو (رەسەي، وليمپيادا ويىندارىنىڭ قولا جۇلدەگەرى) سىندى اتى الەمگە ايگىلى سپورتشىلاردىڭ ونەرىن تاماشالادى.
«گران- پري» دوداسىنىڭ العاشقى كۇنىندە-اق، وتانداستارىمىزدىڭ جولى بولمادى. ءتورت بىردەي تاەكۆونداشىمىز دا قارسىلاستارىنا ەسە جىبەردى. بۇل كۇنى ەڭ ۇزدىك ناتيجەنى 49 كەلىدە فاريزا الدوڭعاروۆا كورسەتتى. ءبىرىنشى كەزدەسۋىندە فرانسۋز حاجەر مۇستافادان باسىم ءتۇسىپ، ەكىنشى سايىسىندا الەمدىك رەيتينگتەگى ەكىنشى ورىندا تۇرعان حورۆات لۋسي زانينوۆيچكە ەسە جىبەرىپ الدى.
67 كەلىدە باق سىناعان ەكى بىردەي تاەكۆونداشىمىزدىڭ دا جولى بولمادى. قۇرامانىڭ كوشباسشىسى فەرۋزا ەرگەشوۆا مەن مەرەكە ءجۇنىسوۆا العاشقى اينالىمدا جەڭىلىس تاپتى. 80 كەلىدە ونەر كورسەتكەن سمايىل دۇيسەباي دا ءبىرىنشى اينالىمنان ءارى اسا المادى.
ال جارىستىڭ ەكىنشى كۇنى جەرگىلىكتى جانكۇيەرلەر جەرلەستەرىمىزدەن زور ءۇمىت كۇتكەن بولاتىن. سەبەبى، تالاي الەمدىك باسەكەلەردە قانجىعاسى مايلانىپ جۇرگەن 58 كەلىدە ونەر كورسەتەتىن نۇرسۇلتان مامايەۆقا باپكەرلەرى دە، جانكۇيەرلەرى دە سەنگەن ەدى. ءبىراق، وتانداسىمىز ءبىرىنشى كەزدەسۋىندە تايلاندتىق پەنەك كاراكەتتەن ايلاسىن اسىرا المادى.
80 كەلىدە ونەر كورسەتكەن شەبەرىمىز ماقسات ابدىرامبەك تە وزبەكستاندىق ماكسيم رافالوۆيچتەن ۇتىلىپ قالدى. ايەلدەر اراسىندا 67 كەلىدەگى گۇلىم بيبالايەۆا قىتايلىق يۋن فەي گۋدەن ايلاسىن اسىرا المادى.
جارىستىڭ سوڭعى كۇنى باق سىناعان اسەل قويلىباي مەن قايرات سارىمساقوۆ تا جۇلدەگە قول جەتكىزە المادى. اسەل ءبىرىنشى اينالىمدا حورۆات قىزى مارتين زۋبچيچكە جول بەرسە، قايرات ءبىرىنشى اينالىمدى جەڭىسپەن باستادى. الايدا، ەكىنشى كەزدەسۋىندە كانادالىق سيدحارتحا بحاتتان ۇتىلىپ قالدى. وسىلايشا جەرلەستەرىمىز ءوز شارشى الاڭىندا بىردە-ءبىر جۇلدەگە قول جەتكىزە المادى.
جارىستا قارسىلاس شاق كەلتىرمەي جەڭىمپاز اتانعان سپورتشىلار 5000, ەكىنشى ورىن يەلەنگەن سپورتشىلار 3000, ءۇشىنشى ورىندى يەلەنگەن سپورتشىلار 1000 ا ق ش دوللارىن قالتالارىنا باستى.
ال، جالپى كوماندالىق ەسەپتە قورجىندارى 2 التىن مەدالمەن تولىققان قىتاي قۇراماسى باس جۇلدەنى جەڭىپ الدى. ەكىنشى ورىنعا 1 التىن 2 كۇمىس ەنشىلەگەن ا ق ش قۇراماسى يە بولسا، ۇزدىك ۇشتىكتى 1 التىن 1 كۇمىس 1 قولا مەدال ولجالاعان يران قۇراماسى جەڭىپ الدى.
ەستەرىڭىزگە سالا كەتەيىك، 2013-جىلى حالىقارالىق تاەكۆوندو فەدەراتسياسى WTF «الەمدىك گران-پري سەرياسى» دەپ اتالاتىن جاڭا ءتۋرنيردىڭ تۇساۋىن كەسكەن بولاتىن. بۇل تۋرنيرگە الەمدىك رەيتينگتىڭ كوشىن باستاپ تۇرعان سپورتشىلار قاتىستى.
قازاقستان تاەكۆوندو فەدەراتسياسى وتكەن جىلى بۇل ءدۇبىرلى دودانى ەلىمىزدە وتكىزۋ تۋرالى ۇسىنىستارىن بىلدىرگەن ەدى. 2014-جىلدىڭ 25 ناۋرىزىندا قىتايلىق تايپەيدە وتكەن حالىقارالىق تاەكۆوندو فەدەراتسياسىنىڭ (WTF) اسسامبلەياسىندا ۇيىم مۇشەلەرى بۇل ۇسىنىستى قاراستىرىپ، ناتيجەسىندە «الەمدىك گران- پري سەرياسىنىڭ» ەكىنشى كەزەڭىن ەلوردامىز استانادا قالاسىندا وتكىزۋ تۋرالى شەشىمگە كەلگەن.
ايتا كەتەيىك، قىتايلىق تايپەيدە وتكەن اسسامبلەياعا الەمنىڭ 100 دەن استام فەدەراتسيالارىنىڭ وكىلدەرى قاتىسقان. جيىن بارىسىندا «الەمدىك گران-پري سەرياسى» كەزەڭىن وتكىزۋدەن وزگە، الداعى ۋاقىتتا بۇكىل الەمدە تاەكۆوندو سپورتىن دامىتۋ مەن مۇمكىندىگى شەكتەۋلى جاندارعا ارنالعان پارا- تاەكۆوندو سپورتىنا كوڭىل ءبولۋ تۋرالى ماسەلەلەر دە قاراستىرىلعان بولاتىن.
بۇل جولعى باسەكەدە سپورتشىلارىمىزدىڭ باعى جانباعانىمەن، بۇل قازاقستان قۇراماسى ءۇشىن ۇلكەن تاجريبە جيناقتاۋدىڭ ءبىر مۇمكىندىگى.
كۇنسۇلتان وتارباي
