قازاق ونەرىنىڭ ساڭلاقتارى: احمەت جۇبانوۆ
ول اقتوبە وبلىسى تەمىر اۋدانىندا 1906 - جىلى 29 - ساۋىردە ومىرگە كەلگەن. احمەت قۋان ۇلى قازاقتىڭ مۋزىكالىق مادەنيەتىن زەرتتەپ تانۋدا، ءجورىپ تۇسىندىرۋدە جانە جۇيەلەپ ناسيحاتتاۋدا جاڭا ساپالى بيىكتەن كورىنىپ، كەزەڭدىك ءمانى بار قاجىر- قايرات كورسەتكەن تۇلعا. ءوز كەزىندەگى مۋزىكالىق ءبىلىم ساتىلارىنىڭ بارىنەن وتكەن كەمەل ءبىلىم يەسى، وعان قوسا ءتاڭىرى تال بويىنا عاجايىپ قابىلەت پەن ۇلتجاندىلىق سەزىمىن دارىتقان ا. ق. جۇبانوۆ 1933 -جىلى الماتى مۋزىكالىق دراما ۋچيليشەسىنە ۇستازدىق قىزمەتكە كەلەدى. وسى كەزدەن باستاپ ءومىرىنىڭ سوڭعى كۇندەرىنە دەيىن ول قازاقتىڭ مۋزىكالىق مادەنيەتى دەگەن جالپىلاما ۇعىمدى ۇلت بولمىسىنداعى ناقتى كاتەگوريالىق ءمانى بار رۋحاني قۇبىلىسقا اينالدىرۋ ءۇشىن تىنىم تاپپاستان ەڭبەك ەتتى. بۇل رەتتە، احمەت قۋان ۇلى ادام قابىلەتىنىڭ قانداي قۇدىرەتتى بولاتىنىن ناقتىلى دا ناتيجەلى ىستەرىمەن كورسەتە الدى.
1934 - جىلى قازاقتىڭ حالىق اسپاپتارى وركەسترىن ۇيىمداستىردى (قازىرگى قۇرمانعازى اتىنداعى قازاقتىڭ مەملەكەتتىك اكادەميالىق حالىق اسپاپتار وركەسترى) . جۇبانوۆ الماتى مەملەكەتتىك كونسەرۆاتورياسىن باسقاردى، وعان جامبىل اتىنداعى قازاقتىڭ مەملەكەتتىك فيلارمونياسىن اشۋ ميسسياسى جۇكتەلدى. ول رەسپۋبليكالىق عىلىم اكادەمياسىنىڭ نەگىزىن سالۋشىلاردىڭ ءبىرى، كەيىن م. و. اۋەزوۆ اتىنداعى ونەر مەن ادەبيەت ينستيتۋتىنىڭ قۇرامىنا ەنگەن ونەرتانۋ سەكتورىن ۇيىمداستىردى. جۇبانوۆتىڭ ۇيىمداستىرۋشىلىق، شىعارماشىلىق، عىلىمي، پەداگوگيكالىق، قوعامدىق قىزمەتى قازاقستاننىڭ مۋزىكا مادەنيەتىنىڭ قالىپتاسۋ تاريحىندا تۇتاس ءبىر كەزەڭدى قامتيدى.
ول كاسىبي مۋزىكالىق ءبىلىم بەرۋدىڭ، مۋزىكالىق شىعارماشىلىق پەن مۋزىكالىق عىلىمنىڭ ىرگە تاسىن قالادى. اكادەميك- كومپوزيتور جۇبانوۆتىڭ ەسىمى قازاق مۋزىكا مادەنيەتىنىڭ نەگىزىن سالۋشى تۇلعالاردىڭ كوش باسىندا تۇر. ول ل. حاميديمەن بىرلەسىپ، «اباي» جانە «تولەگەن توقتاروۆ» وپەراسىن،«قۇرمانعازى تۋرالى ەستەلىك مارشىن»، «جەز كيىك» سيمفونيالىق شىعارمالارىن، قازاقتىڭ ءبي سيۋيتاسىن، «سارانجاپ»، «كوروعلى» فورتەپيانالىق شىعارمالارىن، حورلار، اندەر، رومانستار، تەاتر مەن كينوعا ارنالعان مۋزىكالار، «XIXع. مەن XXع. باسىنداعى قازاق حالىق كومپوزيتورلارىنىڭ ءومىرى مەن شىعارماشىلىعى»، «عاسىرلار پەرنەسى»، «زامانا بۇلبۇلدارى»، «مۇقان تولەبايەۆ»، «قۇرمانعازى» ەتنوگرافيالىق زەرتتەۋلەرىن جازدى. ا. جۇبانوۆتىڭ قازاق مۋزىكا تاريحىنا سىڭىرگەن ەڭبەگى ۇشان - تەڭىز.
