قاراعاندىدا ەكى كولىك بەتپە-بەت سوقتىعىسىپ، جەتى ادام ورتەنىپ كەتتى
قاراعاندى- بالقاش تراسساسىمەن شەت اۋدانىن باسىپ وتكەن اتى-ءجونى ءالى انىقتالىپ ۇلگەرمەگەن BMW كولىگىنىڭ جۇرگىزۋشىسى جولدىڭ قاراما-قارسى بەتىنە شىعىپ، Mercedes Benz كولىگىمەن بەتپە-بەت سوقتىعىسقان. سالدارىنان ەكى كولىك تە تۇگى قالماي جانىپ كەتتى.
«پوليتسەيلەر ەكى كولىكتەن جەتى ادامنىڭ ءولى دەنەسىن الىپ شىققان. التاۋى ماشينا ىشىندە ورتەنىپ كەتسە، ءبىر ەر ادامنىڭ دەنەسى جانعان كولىكتەن جىراقتا جاتقان. التى ادامنىڭ دەنەسى بىردەي تۇگى قالماي جانىپ كەتكەن، سوندىقتان ولاردىڭ جىنىسى مەن جاسىن شامالاپ ءبىلۋ دە مۇمكىن ەمەس» دەيدى Tengrinews.kz تىلشىسىنە ۇلكەن كولىك اپاتىنىڭ كۋاسى بولعان كاسىپكەر اناتولي كونوۆالوۆ.
قاتتى سوققىدان BMW كولىگى جولدىڭ شەتىنە ۇشىپ كەتكەن، ال Mercedes جول شەتىندە قالعان.
«جول بويىندا تىسقارى قاراي ۇشىپ كەتكەن كولىكتىڭ دوڭعالاق ىزدەرى قالعان، وسىنى نەگىزگە العان پوليتسەيلەر قاراما-قارسى باعىتقا شىعىپ كەتكەن BMW كولىگى بولۋى كەرەك دەپ توپشىلايدى» دەيدى اناتولي كونوۆالوۆ.
ىشكى ىستەر دەپارتامەنتىنىڭ باسپا ءسوز قىزمەتىمەن حابارلاسا المادىق. شەت اۋدانىنىڭ اكىمشىلىك پوليتسياسى بولىمشەسىندەگىلەر پوليتسيالاردىڭ قازىرگى پايىمى بويىنشا قاراما-قارسى باعىتقا شىققان BMW كولىگى ەكەندىگىن ناقتىلادى.
«كولىك وڭتۇستىك قازاقستان وبلىسىنىڭ تۇرعىنى اتىنا تىركەلگەن. ادامداردىڭ اتى-ءجونى انىقتالىپ جاتىر» دەدى شەت اۋدانىنىڭ اكىمشىلىك پوليتسياسى بولىمشەسىندەگىلەر.
Tengrinews.kz
