ۋكراينادا رەسەي سولداتتارى وپات بولىپ جاتىر
ۋكرايناداعى سوعىس ءبىراز رەسەيلىكتىڭ قاسىرەتىنە اينالاتىن ءتۇرى بار. بيىل كوكتەمدە ۋكراينانىڭ قىرىم ايماعىن اننەكسيالاۋ كەزىندە رەسەي تۇبەككە ەشقانداي ايىرىم بەلگىلەرى جوق سولداتتارىن كىرگىزگەن ەدى.
ءبىراق رەسەي باسشىلىعى ءبىر اي بويى اسكەر جىبەرگەنىن مويىنداماي وتىردى. الايدا پرەزيدەنت پۋتين ءبىر سوزىندە مۇزداي قارۋلانعان مىڭداعان ساربازدىڭ شىن مانىسىندە رەسەي جاۋىنگەرلەرى ەكەنىن ايتىپ قالدى.
باتىس ەلدەرى مويىنداماعان، جەدەلدەتىپ وتكىزىلگەن رەفەرەندۋمدا قىرىم حالقىنىڭ كوبى رەسەيگە قوسىلۋدى جاقتادى. ءسويتىپ، قىرىم ەشقانداي سوعىسسىز رەسەيدىڭ قولاستىنا ءوتىپ كەتتى.
قازىر جاعداي باسقاشا - ۋكراينانىڭ شىعىسىندا رەسەي جاۋىنگەرلەرى كوپ قازا تاۋىپ جاتقانى بەلگىلى بولدى. ۋكراينا تەلەارناسى قولعا تۇسكەن رەسەيلىك دەسانتتاردى كورسەتتى. بۇعان قوسا، رەسەيلىك ساربازداردىڭ جاسىرىن جەرلەنىپ جاتقانى دا ايتىلا باستادى. وسىندايدا رەسەيلىكتەر كوڭىلىندە «ءبىز ءوزى سوعىسىپ جاتىرمىز با؟» دەگەن زاڭدى سۇراق تۋىندايدى.
رەسەيدىڭ «ۆەدوموستي» باسىلىمىنا جاقىندا شىققان ماقالادان بۇل سۇراققا جاۋاپ تاپقانداي بولدىق.
« ۇلىمنىڭ ۇستالعانىن ينتەرنەتتەن ءبىلدىم»
ۋكراينامەن شەكارادان 1 مىڭ 300 كيلومەتر قاشىق جاتقان كوستروما قالاسىندا رەسەيلىك 10 جاۋىنگەردىڭ تۋىستارى ساربازداردىڭ ۋكراينادا قولعا تۇسكەنىن ايتتى. رەسمي ورىنداردان ەشقانداي حابار الا الماعان ولار بارلىق اقپاراتتى ينتەرنەتتەن بىلگەن.
ءبىر ساربازدىڭ اناسى ولگا پوچتويەۆا رەسمي ورىندارعا بارىپ، ۇلىنىڭ ۋكراينا تۇرمەسىنە تۇسكەنىن دالەلدەيتىن «ۆكونتاكتە» جەلىسىندەگى سۋرەتتەرىن كورسەتكەندە بيلىك وكىلدەرى «ءسىز ارانداتىپ تۇرسىز» دەپ ونىڭ ءوزىن ايىپتاعان.
- سۋرەتتەردى كورسەتىپ ەدىك، ولار بىزگە سەنبەي، «بۇل - فوتوشوپ» دەدى. كەشىرىڭىز، ءبىراق مەنىڭ ۇلىم ەشقاشان فوتوشوپپەن جۇمىس ىستەپ كورگەن ەمەس، - دەدى پوچتويەۆا.
دەگەنمەن ۋكراينانىڭ رەسمي ورگاندارى تەلەارنادان كورسەتكەن رەسەيلىك پارتيزانداردان باسقا رەسەي اسكەرىنىڭ سوعىسقا قاتىسىپ جاتقانىن دالەلدەيتىن اقپارات جوقتىڭ قاسى.
رەسەيدىڭ ادام قۇقىقتارى جونىندەگى كوميسسياسى مۇشەلەرى وسى ەلدىڭ تەرگەۋ كوميتەتىنەن كەلىسىم-شارت بويىنشا ۇرىسقا قاتىسىپ جاتقان 9 سارباز قازا تاپتى دەگەن اقپاراتتى راستاۋدى ءوتىندى.
ال ستاۆروپول ولكەلىك «سولدات انالارى كوميتەتى» ۋكراينا سوعىسىندا قازا تاپتى نە جارالاندى دەگەن رەسەيلىك ساربازداردىڭ ءتىزىمىن جاسادى. بۇل تىزىمدە 400 گە تارتا ادام بار.
جاسىرىن جەرلەۋ
رەسەيدىڭ سولتۇستىگىندەگى پسكوۆ قالاسىندا «سوعىستا وپات بولعان سولداتتاردى جاسىرىن تۇردە جەرلەپ جاتىر» دەگەن اقپارات تارادى.
وسى قالاداعى پولكتەن دەسانت رەتىندە سوعىسقا اتتانعان لەونيد كيچاتكين مەن الەكساندر وسيپوۆتى تۋىستارى تامىزدىڭ 25 ءى كۇنى اقتىق ساپارعا شىعارىپ سالدى.
وسىدان بىرەر كۇن بۇرىن ۋكراينالىق جۋرناليستەر ۋكراينانىڭ شىعىسىنداعى ۇرىس شەبىنەن وسى وترياد ساربازدارىنىڭ قۇجاتتارى مەن قارۋ-جاراقتارىن تاۋىپ العان ەدى.
رەسەيدىڭ مەملەكەتتىك اقپارات قۇرالدارى جەرلەۋ ءراسىمى تۋرالى ەشقانداي حابار تاراتقان جوق، ال رەپورتاج جاساۋعا بارعان تاۋەلسىز ب ا ق وكىلدەرىن بىرەۋلەر ىشكە كىرگىزبەي قويعان. «رۋسسكايا پلانەتا» اقپاراتتىق سايتىنىڭ جۋرناليسى يليا ۆاسيۋنين:
- ولار ءبىزدى قورقىتتى دەسە دە بولادى. بەيىت باسىنا بارىپ، ىندەتە اقپارات جينامايتىنىمىزعا كوز جەتكىزگىلەرى كەلدى، - دەيدى.
اقپارات قۇرالدارىنىڭ جازۋىنا قاراعاندا، جاۋىنگەرلەردىڭ بەيىتتەرىنە قويىلعان اتى-جوندەرى جازىلعان قۇلپىتاستاردى قايتادان الىپ تاستاعان.
رەسەيدىڭ مەملەكەتتىك اقپارات قۇرالدارى بۇل وقيعا تۋرالى ءلام-ميم دەپ اۋىز اشپادى. ال كيچاتكيننىڭ «ۆكونتاكتە» پاراقشاسىنداعى جازبا ءوشىپ قالعان. كيچاتكيننىڭ وپات بولعانى تۋرالى بۇل جازبانى ونىڭ پاراقشاسىنا جەسىرى جازدى دەگەن بولجام بار. سودان بەرى سولداتتاردىڭ وتباسى مۇشەلەرى ب ا ق وكىلدەرىمەن سويلەسۋگە قۇلىقسىز.
ۋكراينادا رەسەيدىڭ قانشا ساربازى ءجۇر؟
ۋكراينادا قازا تاپقان سولداتتار رەسەيدىڭ باسقا وڭىرلەرىندە دە جەرلەنىپ جاتىر دەگەن اقپارات بار.
تامىزدىڭ 25 ءى كۇنى پسكوۆ قالاسىنداعى اسكەري بولىمشەدەن اتتانعان جانە ءبىر دەسانت انتون كورولەنكو ۆورونەج قالاسىندا جەرلەنگەن.
جەرگىلىكتى جۋرناليستىڭ ازاتتىقتىڭ ورىس قىزمەتىنە بەرگەن اقپاراتىنا قاراعاندا، جەرلەنگەن سولداتتىڭ تۋىسى ونىڭ ءولىمى تۋرالى اقپاراتتىڭ «قۇپيا» ەكەنىن، ءبىراق ونىڭ «تەككە ولمەگەنىن» ايتقان.
باشقۇرتستاندىق جانە ءبىر سولدات مارسەل اراتتانوۆتىڭ اناسى تاۋەلسىز «دوجد ت ۆ» تەلەارناسىنا بەرگەن سۇحباتىندا رەسەيدىڭ ۋكراينامەن شەكاراداعى روستوۆ قالاسىندا جاتقان ۇلىنىڭ دەنەسىن تامىزدىڭ 22 ءى كۇنى جەر قوينىنا تاپسىرعانىن ايتقان.
- قازا بولعاندا ول ءبىزدىڭ ەلدىڭ اۋماعىندا بولماعان. ولاردىڭ ۋكرايناعا بارعانىن ەستىدىك، - دەدى ۆەنەرا اراتتانوۆا.
يتار-تاسس اگەنتتىگىنىڭ جەرلەنىپ جاتقان سولداتتار تۋرالى سۇراعىنا رەسەي پرەزيدەنتىنىڭ باسپا ءسوز حاتشىسى دميتري پەسكوۆ «اقپاراتتى ءتيىستى مەكەمەلەردىڭ تەكسەرىپ جاتقانىن» ايتتى.
تامىزدىڭ 28- كۇنى ناتو باسشىلىعى «سەپاراتيستەر جاعىندا ءبىر مىڭنان استام رەسەي اسكەرى سوعىسىپ جاتىر» دەپ مالىمدەدى. «سولدات انالارى كوميتەتى» ۇيىمىنىڭ باسشىسى ۆالەنتينا مەلنيكوۆانىڭ ايتۋىنشا، بۇل سان 15 مىڭعا جۋىقتاۋى مۇمكىن. ءوزىن ءوزى جاريالاعان «دونەتسك حالىق رەسپۋبليكاسىنىڭ» باسشىسى الەكساندر زاحارچەنكو رەسەيلىك جاۋىنگەرلەردىڭ سەپاراتيستەرگە كومەكتەسىپ جاتقانىن مويىندادى. دەگەنمەن ول «رەسەيلىكتەر تەك جازعى دەمالىس كەزىندە كەلدى» دەيدى.
رەسەيدىڭ ۇكىمەتكە بۇيرەگى بۇراتىن قوعامدىق پىكىردى زەرتتەۋ قورى جۇرگىزگەن ساۋالناما ناتيجەسىنە قاراعاندا، رەسەي حالقىنىڭ باسىم كوپشىلىگى ۋكراينانىڭ شىعىسىنداعى سەپاراتيستەردى جاقتايدى، سوعان قاراماستان ولاردىڭ تەك بەس پايىزى عانا ۋكرايناعا سارباز جىبەرۋدى قولدايدى.
ال سولداتتاردىڭ جاقىن تۋىستارى ۇرەيمەن عۇمىر كەشىپ جاتىر.
رەسەي پرەزيدەنتىنىڭ جانىنداعى ادام قۇقىقتارى جونىندەگى كونسۋلتاتيۆتىك كەڭەس مۇشەسى ەللا پولياكوۆانىڭ رەسمي كانالدار ارقىلى سولداتتار تۋرالى اقپارات جيناۋ ارەكەتىنەن تۇك شىقپادى.
- بۇل ىستەرى اقىلعا سىيمايدى. انالار «ۇلىمىز قايدا؟» دەگەن جالعىز سۇراققا جاۋاپ بەرۋدى تالاپ ەتىپ وتىر - دەيدى پولياكوۆا.
(گلەن كەيتستىڭ ماقالاسىن اعىلشىن تىلىنەن اۋدارعان - مۇحتار ەكەي)
ازاتتىق سايتىنان الىندى
