قازاق ساربازدارى قىتايدان قايتتى
ش ى ۇ-نا مۇشە مەملەكەتتەردىڭ ءبىر اپتاعا سوزىلعان «بەيبىت ميسسيا-2014» انتيتەررورلىق بىرلەسكەن وقۋ-جاتتىعۋلارى كەشە اياقتالدى.
حالىقارالىق جاتتىعۋعا قىتايدىڭ حالىق- ازاتتىق ارمياسى باس شتابى باستىعىنىڭ ورىنباسارى ۆان نين باسشىلىق جاسادى. 24-29- تامىز ارالىعىندا وتكەن «بەيبىت ميسسيا-2014» مانيەۆرلەرىنە قازاقستان، قىتاي، قىرعىزستان، رەسەي جانە تاجىكستان قارۋلى كۇشتەرىنىڭ بولىمشەلەرىنىڭ 7 مىڭنان استام جاۋىنگەرى قاتىستى، اۆياتسيا، اۋە قورعانىسىنا قارسى جانە راديوەلەكتروندىق قۇرالدار پايدالانىلدى.
بۇل اسكەري بولىمدەرگە ش ى ۇ-عا مۇشە مەملەكەتتەر قارۋلى كۇشتەرىنىڭ باس شتابى باستىقتارىنىڭ ورىنباسارلارى باسشىلىق جاسادى. قازاقستاندىق دەلەگاتسيانى گەنەرال- مايور مۇقان دۇيسەكەيەۆ باستاپ باردى. بۇل حالىقارالىق ءىرى جاتتىعۋعا قازاقستان قارۋلى كۇشتەرىنەن پولكوۆنيك تۇرالى قويشىقۇلوۆتىڭ باسشىلىعىمەن مايداندىق جانە اسكەري-كولىك اۆياتسياسىنىڭ بۋىنى، مايور كيريلل لوجكين باستاعان دەسانتتىق- شابۋىلداۋشى باتالونى قاتىستى.
قازاقستاندىق دەسانتشىلار مۇنداي بىرلەسكەن حالىقارالىق جاتتىعۋلارعا ءبىرىنشى رەت قاتىسىپ وتىرعان جوق. سوندىقتان ولار ءۇشىن قانداي تاپسىرما بولماسىن قينالماي ورىنداۋعا ماشىقتانعان. ءبىزدىڭ جاۋىنگەرلەر «چجۋجيحە» پوليگونىندا ەكى اپتا بولىپ ءارتۇرلى جاتتىعۋلاردى وداقتاس ارىپتەستەرىمەن بىرلەسىپ، مۇلتىكسىز ورىندادى. قازاق باتالونىنىڭ قىراندارى كوپ ۇلتتى اسكەر كونتينگەنتى قۇرامىندا تاۋلى جەرلەرگە، ەلدىمەكەندەرگە بەكىنگەن قارۋلى قۇرىلىمداردى قورشاۋ جانە پاراشيۋتپەن اۋەدەن شابۋىل جاساپ، جاۋدى جويۋ تاپسىرمالارىن ورىنداۋ بارىسىندا جوعارعى دەڭگەيدەگى دايىندىقتارىن كورسەتتى، دەپ حابارلادى «چجۋجيحە» پوليگونىنان پودپولكوۆنيك مۇحاربەك ماحامبەت.
كوپ ۇلتتى اسكەري قۇرامالار انتيتەررورلىق جاتتىعۋ بارىسىندا بىرلەسكەن 4 تاكتيكالىق جاۋىنگەرلىك ەپيزودتى اتقاردى. بۇلار الدىمەن، بىرلەسىپ بارلاۋ جۇمىستارىن جۇرگىزىپ، جاۋ جاقتان ماڭىزدى مالىمەتتەر الدى.
بەرىلگەن تاپسىرماداعى اڭىز بويىنشا، شارتتى قارسىلاستار ءبىر قالانى تۇتاستاي باسىپ الىپ، تۇرعىندارىن كەپىلدىككە العان. جاۋىنگەرلەر قالانى جاۋدان تازارتىپ، تۇرعىنداردى ازات ەتتى. ول ءۇشىن موتواتقىشتار بولىمشەلەرى تانكتەر مەن جاياۋاسكەرلەردىڭ جاۋىنگەرلىك ماشينالارىن پايدالاندى، تەرروريستەردى اۋەدەن س ۋ-25جويعىش ۇشاقتارى، تىك ۇشاقتار جانە جەردەن «گراد» ارتيللەريا جۇيەسى اتقىلاپ شابۋىلداۋشىلارعا قولداۋ كورسەتتى. تاۋلى ايماققا جاسىرىنعان تەرروريستەردى دەسانتشىلار توبەلەرىنەن پاراشيۋتپەن ءتۇسىپ، كوزدەرىن قۇرتتى.
جاتتىعۋ بارىسىندا جۇزدەگەن برونەتانك تەحنيكالارى - جاياۋ اسكەرلەردىڭ جاۋىنگەرلىك ماشينالارى، ت-72 تانكتەرى راكەتالىق- ارتيللەريالىق قارۋلار، ءوزى جۇرەتىن ساۋ 2 س3 م ارتيللەريا قۇرىلعىلارى، م ي-8 تىك ۇشاقتارى، س ۋ-25 جويعىش ۇشاقتارى، جانە ي ل-76 اسكەري- ترانسپورتتىق ۇشاقتار قولدانىلدى.
گەنەرال- مايور مۇقان دۇيسەكەيەۆتىڭ پىكىرىنشە، وقۋ-جاتتىعۋ بارىسىندا كومانديرلەر كواليتسيالىق توپتاردى باسقارۋ ادىستەرىن مەڭگەرىپ، ماشىقتانادى، ال جاۋىنگەرلەر بولسا بىرلەسىپ قيمىلداۋعا داعدىلانادى، تاجىريبە الماسادى. اۋە قورعانىسى كۇشتەرىنىڭ باس قولباسشىسى اۆياتسيا گەنەرال-مايورى نۇرلان ورمانبەتوۆ: «اۆياتورلارىمىزدىڭ قاتارىندا جاس ۇشقىشتار مەن شتۋرماندار بار.
ولاردىڭ ءدال وسىنداي حالىقارالىق اۋقىمدى وقۋ-جاتتىعۋلارعا قاتىسۋلارى كاسىبي دايارلىقتارىن ارتتىرۋ ءۇشىن وتە ماڭىزدى. جاۋىنگەرلىك ەكيپاجدار كوپ ۇلتتى كونتينگەنتتەردىڭ قۇرامىندا نىسانانى دالدەپ اتىپ، جويۋعا ۇيرەنەدى، اۋە بارلاۋى ادىستەرىن جۇزەگە اسىرادى. سونداي-اق دەسانتشىلاردى پاراشيۋتپەن تاۋلى جەرگە ءتۇسىرۋ ءۇشىن ۇلكەن تاجىريبە كەرەك، جاستار وسىنى ۇيرەنەدى» دەپ قاراماعىنداعىلاردىڭ ۇلكەن دوداعا ءتۇسىپ، تاجىربيە جيناقتاعانىن قالايتىنىن ءبىلدىردى.
ال اەروۇتقىر اسكەرلەرى قولباسشىسى پولكوۆنيك رۋسلان مۇزدىبايەۆ دەسانتشىلار مەن ۇشقىشتارىنىڭ جاۋىنگەرلىك ۇيلەسىمدىك جاتتىعۋلاردى جوعارى دەڭگەيدە ورىندايتىنىنا قاشاندا سەنىمدى.
