مەملەكەتتىك رامىزدەردى قۇرمەتتەۋگە ارنالعان بايقاۋدىڭ جەڭىمپازدارى ماراپاتتالدى

11- ماۋسىم مەن 21- تامىز ارالىعىندا وڭىردە بۇقارالىق اقپارات قۇرالدارىندا «وتان سۇيگىشتىك مەملەكەتتىك رامىزدەردى قۇرمەتتەۋدەن باستالادى» تاقىرىبىندا جارىق كورگەن ماتەريالدار اراسىندا ارنايى بايقاۋ جاريالانعان بولاتىن. كوميسسيانىڭ قاراۋىنا 20 اۆتوردان 37 ماتەريال ۇسىنىلدى. ونىڭ ىشىندە 32 ماقالا «ۇزدىك اۆتور» اتالىمى بويىنشا ازىرلەنسە، 5 بەينەماتەريال «ۇزدىك تەلەجۋرناليست» نوميناتسياسى اياسىندا قارالىپ، سارالاندى.

«مەملەكەتتىك رامىزدەردى قۇرمەتتەپ، قاستەرلەۋ، ناسيحاتتاۋ تەك جۋرناليستەردىڭ مىندەتى ەمەس. ءاربىر قازاقستاندىق ازاماتتىڭ مىندەتى مەن پارىزى. بايقاۋعا بەلسەنە قاتىسقاندارىڭىز ءۇشىن العىسىمدى بىلدىرەمىن»، - دەگەن باسقارما باسشىسى جەڭىمپازدارعا ارنايى ديپلومدار مەن باعالى سىيلىقتاردى تابىستادى.

بايقاۋ قورىتىندىسىمەن «ۇزدىك اۆتور» نوميناتسياسى بويىنشا I دارەجەلى ديپلومدى «دوڭگەلەنگەن دۇنيە» گازەتىنىڭ ءبولىم مەڭگەرۋشىسى نۇريلا ءشىنادىلوۆا يەلەندى.

سونىمەن قاتار II دارەجەلى ديپلومدى «يۋجنىي كازاحستان» گازەتىنىڭ ءتىلشىسى سالتانات ءابدىجاپپاروۆا مەن تاۋەلسىز جۋرناليست دىلداگۇل نۇرماحانبەت قانجىعالارىنا بايلادى.

 III دارەجەلى ديپلومدى «قازاقستان جولى» گازەتىنىڭ جاۋاپتى حاتشىسى اقتورە يبراگيم ۇلى، م. اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ 3- كۋرس ستۋدەنتى قارلىعاش ۇسەنقۇلوۆا مەن «شامشىراق» گازەتىنىڭ ءتىلشىسى ايگۇل سۇندەتوۆا يەلەندى.

ال «ۇزدىك تەلەجۋرناليست» اتالىمىندا I دارەجەلى ديپلوممەن «ايعاق» تەلەارناسىنىڭ ءتىلشىسى بوتاگوز مادىبەك ماراپاتتالسا، II دارەجەلى ديپلومدى «وتىرار» تەلەارناسىنىڭ ءتىلشىسى ءمولدىر بەكەيەۆا؛ IIІ دارەجەلى ديپلومدى «قازاقستان-شىمكەنت» تەلەارناسىنىڭ رەداكتورى گۇلميرا وڭلاسبەكوۆا الدى، دەپ حابارلايدى و ق و اكىمى اپپاراتىنىڭ باسپا ءسوز قىزمەتىنەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى