استانادا «ءبىزدىڭ پرەزيدەنتىمىز» كىتابىنىڭ تۇساۋكەسەرى ءوتتى
شارا ءبىلىم كۇنىن مەرەكەلەۋ جانە جاڭا وقۋ جىلىنىڭ باستالۋىنىڭ قۇرمەتىنە ۇيىمداستىرىلدى، دەپ حابارلايدى كىتاپحانانىڭ باسپا ءسوز قىزمەتىنەن.
كەزدەسۋگە جوعارى سىنىپ وقۋشىلارى - وقۋ وزاتتارى، ينتەللەكتۋالدى جانە سپورتتىق جارىستاردىڭ جەڭىمپازدارى شاقىرىلدى. ولار العاشقىلاردىڭ ءبىرى بولىپ استانانىڭ كورىكتى ورنىنا اينالعان جاڭا عيماراتقا باس سۇقتى. ينتەراكتيۆتى ەكسپوزيتسيا كونتەنتىن زەردەلەۋ، مەملەكەت باسشىسىنىڭ جەكە كىتاپحاناسىمەن تانىسۋ وقۋشىلاردىڭ زور قىزىعۋشىلىعىن تۋدىردى.
جينالعان جەتكىنشەكتەردىڭ الدىندا قازاقستان رەسپۋبليكاسى پرەزيدەنتى كانسەليارياسىنىڭ باستىعى، ق ر تۇڭعىش پرەزيدەنتىنىڭ - ۇلت كوشباسشىسىنىڭ كىتاپحاناسىنىڭ ديرەكتورى مىندەتىن اتقارۋشى م. ب. قاسىمبەكوۆ ءسوز سويلەدى. ول كەزدەسۋ ماقساتتارى تۋرالى ايتىپ، بالالاردى كىتاپحانامەن تىعىز ىنتىماقتاسۋعا شاقىردى. م. قاسىمبەكوۆ كىتاپحانانىڭ مۇمكىندىكتەرىن، ونىڭ قازاقستاننىڭ جاڭا تاريحىنا قىزىعۋشىلىق تانىتقان بارلىق جاندار ءۇشىن اشىقتىعىن ەرەكشە اتاپ ءوتتى.
كەزدەسۋ بارىسىندا قازاقستان رەسپۋبليكاسىنىڭ تۇڭعىش پرەزيدەنتىنىڭ كىتاپحاناسىندا باسىپ شىعارىلعان نۇرسۇلتان نازاربايەۆ تۋرالى «ءبىزدىڭ پرەزيدەنتىمىز» دەرەكتى پوۆەسىنىڭ تۇساۋكەسەرى ءوتتى.
كىتاپ ورتاڭعى جانە جوعارعى سىنىپ وقۋشىلارىنا ارنالعان.
«كىتاپتىڭ نەگىزگى يدەياسى - ەلباسىنىڭ ءومىرى مەن قىزمەتى تۋرالى بالالارعا تۇسىنىكتى تىلمەن جەتكىزۋ بولدى. كىتاپ ورىس تىلىندە 23 مىڭ دانامەن باسىپ شىعارىلدى. قازىر ول مەملەكەتتىك تىلدە شىعارۋعا ازىرلەنۋدە. جاقىن ارادا كىتاپتار ايماقتارعا ءبولىنىپ، ونداعى ءبىلىم مەكەمەلەرىنە جەتكىزىلەدى. كىتاپتىڭ مىڭنان استام داناسىن جەتكىزۋ كوزدەلىپ وتىرعان ءبىرىنشى ايماق - جامبىل وبلىسى بولماق»، - دەپ اتاپ ءوتتى م. ب. قاسىمبەكوۆ.
بۇل كىتاپتىڭ اۆتورلارى نۇرسۇلتان نازاربايەۆتىڭ قيىن ءارى تاڭعاجايىپ ءومىر جولى - قاراپايىم اۋىل بالاسىنان مەملەكەت باسشىسى جانە الەمدىك دەڭگەيدەگى ساياساتكەر دارەجەسىنە دەيىنگى كوتەرىلگەن عۇمىر سوقپاعى تۋرالى ۇعىنىقتى تىلدە باياندايدى. تۋىندى تاراۋلارى نۇرسۇلتان نازاربايەۆتىڭ تۋعان ولكەسىنە، ونىڭ مەكتەپ جىلدارى تۋرالى اڭگىمەلەرىنە، ۋكرايناداعى وقۋىنا، دومنا پەشىنىڭ جانىندا وتكىزگەن ەڭبەك جىلدارىنا، ايماق جانە رەسپۋبليكا باسشىسى رەتىندەگى تاعدىرىنا ارنالعان. كىتاپتىڭ سوڭعى «تاۋەلسىزدىكتىڭ جارقىن جولدارى» تاراۋىنا ەلىمىزدىڭ بولاشاعىن ايقىندايتىن بۇگىنگى كۇندەرىمىز ارقاۋ بولعان.
