وڭتۇستىكتىڭ جاستارى سولتۇستىك وبلىستارداعى وقۋ ورىندارىنان ءبىلىم الۋعا كەلىپ جاتىر
وڭتۇستىك قازاقستان وبلىسى جەتىساي قالاسىنىڭ تۇرعىنى ءمولدىر مۇراتبايدىڭ قوستاناي قالاسىنا بارعانىنا ءۇش كۇن بولدى. ول بيىل مەكتەپ بىتىرگەندە تاپسىرعان ۇلتتىق ءبىرىڭعاي تەستەگى (ۇ ب ت) 72 بالىمەن «سەرپىن - 2050» باعدارلاماسى بويىنشا گرانت يەلەنگەن. ءمولدىر قوستاناي مەملەكەتتىك پەداگوگيكالىق ينستيتۋتىنا «مەكتەپكە دەيىنگى وقىتۋ جانە تاربيەلەۋ» ماماندىعى بويىنشا تەگىن وقۋعا تۇسكەن.
- وقۋ گرانتىن جەڭىپ العانىما قاتتى قۋانامىن. اتا- اناما ەش جۇك سالماي، ءوز كۇشىممەن وقۋعا تۇسكەنىم قانداي جاقسى بولدى. قوستانايعا العاش كەلگەنىمدە قورقىنىش بولدى. زامانداستارىممەن تانىسىپ، ۇيرەنىسە باستادىم، - دەيدى ول.
جاتاقحاناعا ورنالاسقان ءمولدىر ءبىر جىلدىق اقىسى رەتىندە 25 مىڭ 140 تەڭگە تولەگەن. ونىڭ سوزىنشە، «جاتاقحانادا ستۋدەنتتەرگە بار جاعداي جاسالعان - جاتىن بولمە ىقشام، ارنايى كىر جۋاتىن، شومىلاتىن بولمە دە بار» .
«وسىندا قال دەسە، قالامىن»
سولتۇستىك وبلىستارداعى وقۋ ورىندارىنا ءتۇسىپ، مۇنداي گرانتقا يە بولعان جاستاردىڭ ەندى ءبىرى - وڭتۇستىك قازاقستان وبلىسى ماقتارال اۋدانى بىتىرتوبە اۋىلىنداعى مەكتەپتىڭ تۇلەگى ءمادينا اكىمحان قىزى. ول 67 بالمەن پەتروپاۆلدەگى (سولتۇستىك قازاقستان وبلىسى) قوزىبايەۆ اتىنداعى مەملەكەتتىك ۋنيۆەرسيتەتكە تۇسكەن.
- ديپلومدى وسى وقۋ ورنىنان الۋ نيەتىم بار. وسىندا جۇمىس ۇسىنسا، ويلانىپ كورەمىن، - دەيدى قازىر ۋنيۆەرسيتەتتىڭ جاتاقحاناسىنا ورنالاسىپ جاتقان ءمادينا اكىمحان قىزى.
ورال قالاسىنداعى ج و و- عا تۇسكەن راۋشان بەگاليەۆا. شىمكەنت
ال ءمادينانىڭ زامانداسى - ورداباسى اۋدانىنداعى مەكتەپتەردىڭ ءبىرىن بىتىرگەن راۋشان بەگاليەۆا ورال قالاسىنداعى ماحامبەت وتەمىس ۇلى اتىنداعى باتىس قازاقستان مەملەكەتتىك پەداگوگيكالىق ۋنيۆەرسيتەتىنە تۇسكەن.
- شىنىن ايتسام، قىزىمنىڭ 68 بالمەن گرانتقا تۇسەرىنە كۇمانداندىق. گازەتكە شىققاندا ءبىر- اق سەندىك. جەڭىلدىك بولعانىن ەندى ءتۇسىنىپ وتىرمىن. وسى كۇنگە شەيىن ورالعا بيلەت تابا الماي جۇردىك. الداعى كۇنى جولعا شىعامىز. ءوزىم بارىپ، ورنالاستىرىپ قايتامىن، - دەيدى راۋشاننىڭ اكەسى ءالىم بەگاليەۆ ازاتتىق تىلشىسىنە.
ورالدا كۇن سۋىق بولاتىنىن بىلەتىن ءالىم بەگاليەۆ قازىر شىمكەنتتىڭ بازارلارىن ارالاپ، بالاسىنا قىستىق كيىمدەر الىپ ءجۇر ەكەن.
- «تەگىن وقىتسا، قاي قالادا بولسىن وقى» دەپ رۇقسات ەتتىم. ورالدا بىردە- ءبىر تۋعان- تۋىس جوق. ەسى بار قىز عوي، وقۋىن الىپ كەتەدى دەپ سەنىپ جىبەرەيىن دەپ وتىرمىز. جۇمىسقا الىپ قالسا دا، قارسى ەمەسپىن. قايدا جۇمىس تابىلادى، سوندا ىستەيتىن كەز عوي قازىر، - دەيدى راۋشاننىڭ اكەسى.
«گرانتقا سەبەپ - الەۋمەتتىك- ەكنوميكالىق احۋال»
وڭتۇستىك قازاقستان وبلىسى جاستار ساياساتى ماسەلەسى باسقارماسى باستىعىنىڭ ورىنباسارى بولات ءجانابىلدىڭ ايتۋىنشا، «ماڭگىلىك ەل جاستارى - يندۋسترياعا» اتتى جوبا اياسىندا قولعا الىنعان رەسپۋبليكالىق «سەرپىن - 2050» باعدارلاماسى الماتى، جامبىل، قىزىلوردا، وڭتۇستىك قازاقستان جانە ماڭعىستاۋ وبلىسىنىڭ جاستارىنا ارنالعان.
بولات ءجانابىل. شىمكەنت
- قازاقستاننىڭ باسقا ايماقتارىنا جاستاردى وقۋعا جولداۋ ءۇشىن 1050 وقۋ گرانتى ءبولىندى. ولار شىعىس قازاقستان، سولتۇستىك قازاقستان، باتىس قازاقستان، پاۆلودار، قوستاناي، اقتوبە جانە اقمولا وبلىسىنا تەگىن وقۋعا جولداما الدى. وسى گرانتتىڭ 540 ىن وڭتۇستىك قازاقستان جاستارى يەلەندى. قازىر ولاردىڭ 80 پايىزعا جۋىعى اتالعان ايماقتارداعى جوعارعى وقۋ ورىندارىنىڭ جاتاقحانالارىنا جايعاسىپ ۇلگەردى، - دەيدى بولات ءجانابىل.
ونىڭ سوزىنشە، «ۇ ب ت- دان 50 بالدان جوعارى ۇپاي جيناپ، گرانتقا يە بولعان جاستار ستيپەنديامەن، جولاقىمەن، جاتاقحانامەن قامتىلادى - كەيبىر وقۋ ورىندارى قىستىق كيىممەن دە قامتاماسىز ەتەتىندەرىن ايتقان» .
- بيىل گرانت تەك «پەداگوگيكا» ماماندىقتارىنا ءبولىندى. ەگەر الداعى ۋاقىتتا تەحنيكالىق جانە وزگە دە ماماندىقتاردا وقىعىسى كەلەتىندەرگە دە مۇمكىندىك جاسالسا، وڭتۇستىكتەن بۇدان دا كوپ تۇلەك وقۋعا ىنتالى بولاتىن ەدى، - دەيدى وڭتۇستىك قازاقستان وبلىسى جاستار ساياساتى ماسەلەسى باسقارماسى باستىعىنىڭ ورىنباسارى بولات ءجانابىل.
وڭتۇستىك قازاقستان وبلىسى اكىمدىگىنىڭ وكىلى «جاستاردىڭ باسقا ايماقتارعا بارىپ ءبىلىم الۋى قۋانتاتىن جايت ەكەنىن، ولار وقۋ بىتىرگەن سوڭ سول جاقتا جۇمىسقا ورنالاسسا يگىلىكتى ءىس بولارىن» ايتادى.
«سەرپىن - 2050» باعدارلاماسى سايتىنداعى مالىمەتكە قاراعاندا، جاستارعا مۇنداي گرانت بولۋگە ەلدىڭ ءار وڭىرىندەگى الەۋمەتتىك- ەكونوميكالىق جاعدايدىڭ اركەلكىلىگى سەبەپ بولعان.
سايتتا: «قازىرگى تاڭدا الماتى، جامبىل، قىزىلوردا، ماڭعىستاۋ، وڭتۇستىك قازاقستان وبلىستارىندا بالا تۋۋ دەڭگەيى جوعارى، كوشىپ كەلۋشىلەر كوپ. مۇنىڭ بارلىعى جۇمىسسىزدىق ماسەلەسىن تۋدىرادى. الەۋمەتتىك نىساندار، ءۇي، مەكتەپ، بالاباقشا، جەتپەيدى. قانشا ادام وقۋ بىتىرسە دە جۇمىسسىز ءجۇر» دەپ جازىلعان. باعدارلامانى جاساۋشىلار «كەرىسىنشە ەلدىڭ 7-8 وبلىسىندا ەڭبەك كۇشى جەتپەي جاتقانىن، وعان سەبەپ - بالا تۋۋ دەڭگەيىنىڭ تومەندىگى جانە سىرتقا كوشىپ كەتۋ ميگراتسياسى» ەكەنىن ايتادى.
باعدارلاما شارتىنا ساي كەلگەن 1050 جاس پەداگوگيكالىق 19 ماماندىق بويىنشا ەلدىڭ ءار وڭىرىندەگى جەتى وقۋ ورنىندا - باتىس قازاقستان مەملەكەتتىك ۋنيۆەرسيتەتىندە، سولتۇستىك قازاقستان مەملەكەتتىك ۋنيۆەرسيتەتىندە، اقتوبە مەملەكەتتىك ۋنيۆەرسيتەتىندە، شىعىس قازاقستان مەملەكەتتىك ۋنيۆەرسيتەتىندە، پاۆلودار مەملەكەتتىك پەداگوگيكالىق ينستيتۋتىندا، كوكشەتاۋ مەملەكەتتىك ۋنيۆەرسيتەتىندە جانە قوستاناي مەملەكەتتىك پەداگوگيكالىق ينستيتۋتىندا وقيدى.
ۇ ب ت كەزىندە 50 ۇپايدان كوپ بالل جيناي الماعان جاستار دا «سەرپىن - 2050» باعدارلاماسىنا قاتىسسا، 23 كوللەدجگە جىبەرەتىن 1000 گرانتقا يە بولادى. شىعىس قازاقستان، باتىس قازاقستان، سولتۇستىك قازاقستان، قوستاناي، قاراعاندى، پاۆلودار، اقمولا وبلىسى مەن استانا قالاسىنداعى مۇنداي كوللەدجدەرگە بارعان جاستار 35 ماماندىقتىڭ ءبىرىن مەڭگەرەدى.
«ازاتتىق» سايتى
