افريكالىق مۋزىكانت دومبىرانىڭ قۇلاعىندا ويناپ ءجۇر - كەسكىن
ول كورپوراتيۆتىك كەشتەردە بەس كونسەرت بەرىپ ۇلگەرگەن، سونىڭ ىشىندە، ءبىر رەت استانادا جوعارى لاۋازىمدى شەنەۋنىكتەر الدىندا ونەر كورسەتتى.
نيگەريادا زيبو بەينەلەۋ ونەرىن كاسىپ ەتكەن. سونىڭ ارقاسىندا الەمنىڭ ءبىراز ەلىندە بولىپ، جەكە كورمە وتكىزدى. قازاقستانعا الەۋمەتتىك جەلىدەگى دوستارىنىڭ ءبىرىنىڭ شاقىرۋىمەن كەلگەن. «ول ماعان قازاقستان تۋرالى اڭگىمەلەدى. بۇل - وتە ادەمى ەل. مۇنداعى ادامدار دا، قالالار دا تاماشا. ماعان قازاقتىڭ مادەنيەتى مەن ءتىلى ۇنايدى»، - دەيدى موزەس. ول وزىنە مۇسابەك دەگەن ات قويىپ العان.
«مەن ينتەرنەتتىڭ كومەگىمەن قازاق حالقىنىڭ سالت-داستۇرلەرىن ءبىلدىم. دومبىرا مەنى وزىنە باۋراپ الدى. ەرەكشە اسپاپ ەكەنىن كورىپ، مەن ونى مەڭگەرۋدى ۇيعاردىم. دومبىرا گيتاراعا ۇقساس، ءبىراق ەكى ىشەگى عانا بار. دومبىراشىلاردىڭ اسپاپتا وتە جىلدام وينايتىنىن ۆيدەودان كوردىم، سول كەزدە دىبىس جاقسى شىعادى ەكەن»، - دەيدى مۋزىكانت.
ول دومبىرانى ساۋىردەن شىلدەگە دەيىنگى ءۇش اي ىشىندە ۇيرەنگەن. مۇسابەك پروديۋسەرىنىڭ كومەگىمەن بەينەبايان ءتۇسىرىپ، ونى ينتەرنەتكە ورنالاستىردى. «مەن ەڭسەپوۆتىڭ «بالالىق شاق» كومپوزيتسياسىن، قۇرمانعازىنىڭ «اداي» كۇيىن ورىنداي الامىن. «ادايدى» ءبىر ايدان استام ۋاقىتتا مەڭگەردىم. ءبىر اي بويى «اتامەكەن»" ءانىن دە ۇيرەندىم. ادامدار قارا ءناسىلدى، افروامەريكالىق جىگىت دومبىرانى، ەكى ىشەكتى اسپاپتى ءا دەگەننەن ۇيرەنىپ كەتتى دەپ تاڭعالىپ جاتادى. ماسەلە اسپاپتا ەمەس، مۋزىكاعا دەگەن سۇيىسپەنشىلىكتە. ەگەر سۇيىسپەنشىلىك بولسا، وندا ءسىز اسپاپتى تەز مەڭگەرەسىز»، - دەيدى مۇسابەك.
نيگەريالىق ازامات قازاقستاندا ءوزىنىڭ شىعارماشىلىعىن دامىتۋدى كوزدەيدى. ول قازاق ءتىلىن ۇيرەنىپ، مۋزىكادان ءبىلىم الىپ ءجۇر. «كەلەشەكتە دومبىرانى وزىممەن بىرگە شەتەلگە الىپ شىعامىن. مەن وزگە حالىقتارعا دومبىرانىڭ بار كەرەمەتىن كورسەتەمىن»، - دەيدى ول. مۇسابەك الماتىدا ايەلىمەن جانە بالاسىمەن تۇرىپ جاتىر. جارى - قىرعىزستاندىق.
ەسكە سالا كەتەيىك، بۇعان دەيىن تاعى ءبىر نيگەريالىقتىڭ الماتىعا قازاقشا ءان ارناعانى حابارلانعان بولاتىن. مۇسابەك رەپەر Rich D تۋرالى ەستىگەنىمەن ونى تانىمايتىن بولىپ شىقتى. ايتا كەتەيىك، دومبىرا تارتاتىن افريكالىق تۋرالى ۆيدەو الەۋمەتتىك جەلىلەردە 24- تامىز كۇنى پايدا بولدى.
اۆتور: الىشەر احمەتوۆ
Tengrinews.kz
