جيىرما ءتورت جاستاعى ميلليونەر قازاق ازاماتى ۆيتسە-ءمينيستردى قورقاق دەپ ايىپتادى
بۇل تۋرالى كاسىپكەر ەنەرگەتيكا ءمينيسترى ۆلاديمير شكولنيككە جازعان حاتىندا مالىمدەدى. حات ءماتىنى بۇقارالىق اقپارات قۇرالدارىنا تاراتىلدى.
ابيەۆ ءوزى باسقاراتىن قازاقستان تاۋار وندىرۋشىلەرى قاۋىمداستىعىنىڭ مۇناي جانە گاز مينيسترلىگىنە قازاقستاندىق تاۋار وندىرۋشىلەردى قولداۋدى جانە نارىقتا جەر قويناۋىن پايدالانۋشىلارعا تاۋارلار، جۇمىس پەن قىزمەت تۇرلەرىن (ت ج ق) ۇسىناتىن شەتەلدىك كومپانيالار باسىم بولعان جاعدايدا وتاندىق وندىرۋشىلەردىڭ باسەكەگە قابىلەتتىگىن ارتتىرۋدى سۇراپ، بىرنەشە رەت ءوتىنىش بىلدىرگەنىن ايتادى.
«ۆيتسە-مينيستر مىرزاعاليەۆ ماعزۇم مارات ۇلى بەلسەندى جۇمىس جۇرگىزىپ جاتقانىن كورسەتىپ، قازاقستان بويىنشا جەر قويناۋىن پايدالانۋشىلارعا بارىپ، ءتۇسىندىرۋ جۇمىستارىن جۇرگىزگەنىمەن، بۇل جۇمىس ءتيىمدى بولماي تۇر. ءبىز تاۋارلار، جۇمىس پەن قىزمەت تۇرلەرىن ساتىپ الۋ سالاسىندا قازاقستان زاڭناماسىن ءجيى بۇزاتىن جەر قويناۋىن پايدالانۋشىلارعا ايىپپۇل سالۋدى ۇسىندىق.
ءبىراق بۇل ۇسىنىس ەسكەرىلمەدى، ول مۇنداي شارانى قولدانۋعا قورىققان سىڭايلى بولدى. ماعزۇم مارات ۇلى جۇرەكسىندى جانە ونداي تۇلعالار مەملەكەت مۇددەسىن قورعاماۋى ءتيىس دەپ ەسەپتەيمىن، سەبەبى ولار ءتىپتى قازاقستاندىق تاۋار وندىرۋشىلەردىڭ مۇددەسىن دە قورعاي المايدى»، - دەپ جازدى ابيەۆ.
24 جاستاعى بيزنەسمەن جەر قويناۋىن پايدالانۋشىلار ءجيى جول بەرەتىن زاڭ بۇزۋشىلىقتاردى اتادى. ابيەۆتىڭ مالىمدەۋىنشە، ينۆەستورلاردىڭ كوبى ەنشىلەس بۇرعىلاۋ كومپانيالارىمەن جۇمىس ىستەيدى، ول كومپانيالار جابدىقتاردى ءوز بەتىمەن ساتىپ الادى، كوبىنە شەتەلدەن الادى. كاسىپكەر جەر قويناۋىن پايدالانۋشىلاردىڭ كوبىنىڭ ءوز وتانداستارىن قولداۋعا تىرىساتىن شەتەلدىكتەر ەكەنىن ايتتى.
ابيەۆتىڭ ايتۋىنشا، كوپتەگەن ءىرى كومپانيا ساتىپ الۋلاردى ءوز ەرەجەلەرى بويىنشا ىسكە اسىرادى. جەتكىزۋشىلەر كەيدە قاتاڭ تالاپتار قويادى، ولاردى قازاقستاندىق كاسىپورىندار ورىنداي الماي جاتادى. مۇنداي بايقاۋلاردا، بيزنەسمەننىڭ پىكىرىنشە، الدىن الا كەلىسىپ قويعان قاتىسۋشىلار جەڭىپ شىعادى.
«تاپسىرىس بەرۋشى بايقاۋعا شەتەلدىك كومپانيالاردىڭ قاتىسۋىنا جاسىرىن تۇردە باسىمدىق بەرەدى، ولار قازاقستاندىق ەمەس ءونىمدى ۇسىنا وتىرىپ، ونىڭ باعاسى قازاقستاندىق جەتكىزۋشىنىڭ كونكۋرستىق تاپسىرىستا كورسەتكەن باعاسىنان الدەقايدا وڭتايلى بولادى»، - دەيدى حات اۆتورى. ابيەۆ ايىپپۇل سالۋدى ۇسىنعان كومپانيالاردىڭ تىزىمىنە «س ن پ س- اقتوبەمۇنايگاز» ا ق، «تەڭىزشيەۆرويل»، NCOC، «فەلكون ويل ەند گەس ل ت د» ج ش س جانە باسقالار ەنىپ وتىر.
ايتا كەتەيىك، «KSP Steel ساۋدا ءۇيى» ج ش س-ءنىڭ 24 جاستاعى باسشىسى مارات ابيەۆ Forbes قازاقستان جۋرنالىنىڭ نۇسقاسى بويىنشا قازاقستاندىق 100 ميلليونەردىڭ تىزىمىنە ەنگەننەن كەيىن تانىمال بولعان ەدى. مۇناي سالاسىنا ارنالعان تاۋارلار وندىرىسىمەن اينالىساتىن بيزنەسمەننىڭ داۋلەتى 11 ميلليون دوللار دەپ باعالانادى.
