باتىس قازاقستاندا اتا زاڭ مەيرامى كەڭىنەن اتالىپ ءوتىلدى - فوتو
كەشە ورال قالاسىندا اتا زاڭ مەيرامىنا وراي جەڭىل اتلەتيكالىق كروسس ۇيىمداستىرىلىپ، وعان 500 دەي ادام قاتىستى. جەڭىس الاڭىنان اباي الاڭىنا دەيىنگى ارالىقتى نەگىزىنەن 14-29 جاس ارالىعىنداعى جاستار جۇگىرىپ ءوتتى.
كروسقا قاتىسقان وبلىس اكىمىنىڭ ورىنباسارى باقتيار ماكەننىڭ اتاپ وتكەنىندەي، مۇنداي يگى شارا داستۇرگە اينالىپ كەلەدى. بۇل ەلباسىنىڭ ۇلت دەنساۋلىعى ەل دەنساۋلىعى، سوندىقتان قالىڭ بۇقارانى سپورتقا تارتۋ، سالاۋاتتى ءومىر سالتىن ورنىقتىرۋ جونىندەگى تاپسىرماسىنا سايكەس ۇيىمداستىرىلىپ وتىر.
جارىسقا بەلسەندى قاتىسقاندارعا گراموتا، سىيلىقتار بەرىلىپ، كونسەرت قويىلدى.
كەشكىسىن ورتالىق اباي الاڭىندا تەاترلاندىرىلعان كورىنىس قويىلىپ، تاۋكە حان، قازىبەك، تولە، ايتەكە بيلەر كەيپىندەگى ارتىستەر «جەتى جارعى» سىندى قازاق حالقىنىڭ زاڭدارى جونىندە اسەرلى اڭگىمەلەدى.
الاڭعا جينالعان جۇرتشىلىقتى وبلىس اكىمى نۇرلان نوعايەۆ قۇتتىقتاپ، نەگىزگى زاڭدا ايتىلعانىنداي، باستى قۇندىلىق ادامنىڭ ءومىرى، قۇقىعى جانە ەركىندىگى ەكەنىن، ەلىمىز اتا زاڭ اياسىندا ەلباسىمىزدىڭ ساليقالى ساياساتىنا سايكەس العا باسىپ كەلە جاتقانىن اتاپ ءوتتى. بۇدان كەيىن ومىرلىك قادامىن جاڭادان باستاعان جاستارعا جەكە كۋالىكتەرى سالتاناتتى جاعدايدا تابىس ەتىلدى.
ءوڭىردىڭ تانىمال ونەرپازدارى وتانشىلدىق رۋحتاعى اندەردى شىرقاپ، حالىق بيلەرىن كورەرمەندەرگە ۇسىندى. ۇلتتىق ويىندار، جاستاردىڭ بي فلەشموبى دا جاقسى اسەر قالدىردى.
وسىنداي سالتاناتتى شارالار بارلىق اۋدانداردا ءوتىپ، كونستيتۋتسيا كۇنى جارقىن مەيرامعا اينالدى.
