رەسەيدىڭ قىتايعا تارتاتىن ترانزيتتىك گاز قۇبىرى قازاقستان استاناسى ارقىلى ءوتۋى مۇمكىن
ەنەرگەتيكا ۆيتسە- ءمينيسترى ۇزاقباي قارابالين گازدى ورتالىق قازاقستان ارقىلى شىعىس كورشىگە تاسىمالداۋ مۇمكىندىكتەرى تۋرالى قازاقستان ۇكىمەتى اتىنان رەسەي تاراپىنا ۇسىنىس جاسالعانىن حابارلادى.
"رەسەيدەن باستاۋ الاتىن گاز قۇبىرى جەلىسىن ءبىزدىڭ ەلىمىزبەن، ونىڭ ىشىندە استانا ارقىلى وتكىزىپ، قورعاسقا نە الاتاۋساعاسىنا دەيىن جەتكىزىپ، قىتايعا شىعارۋعا بولادى. وسى ماسەلەنى تاپتىشتەۋ ءۇشىن ءقازىر جۇمىس توبىن قۇرماقپىز"، - دەي كەلە، ۆيتسە- مينيستر بۇل ۇسىنىس ساۋىردە، ەۋرازيالىق ەكونوميكالىق قاۋىمداستىققا مۇشە ەلدەردىڭ ۇكىمەت باسشىلارى كەزدەسۋىندە جاسالعانىن ايتتى.
قارابالين بۇل يدەيا تاراپتارعا جاعىپ وتىرعانىن بايانداعانىمەن، ىقتيمال مەرزىمدەردى نە گاز قۇبىرىن تارتۋعا جۇمسالاتىن شىعىندار بويىنشا مالىمەت كەلتىرمەدى.
«استانا» تەلەارناسى
