رەسپۋبليكالىق «اتىڭنان اينالايىن، قازاق قىزى!» جىر ءمۇشايراسى جاريالاندى
ءمۇشايرا 2014- جىلدىڭ 13- قىركۇيەگىندە قازاق مەملەكەتتىك قىزدار پەداگوگيكالىق ۋنيۆەرسيتەتىندە وتەدى.
ءمۇشايرانىڭ ماقساتى جاڭا قازاقستاندىق ءپاتريوتيزمدى ارتتىرۋ، قازاق قىزى - ىنتىماق پەن بىرلىكتىڭ، ىرىس پەن بەرەكەنىڭ نەگىزى ەكەندىگىن ناسيحاتتاۋ، سۇلۋلىققا ىڭكارلىكتى ناسيحاتتاۋ ارقىلى گۋمانيستىك كوزقاراستى دامىتۋ، ادامي كاپيتالدى ارتتىرۋ، قازاق قىزىنا دەگەن قۇرمەتتى، جاۋاپكەرشىلىكتى كوتەرۋ، ۇلتتىق مادەنيەت پەن رۋحاني قۇندىلىق مارتەبەسىن ارتتىرۋ، ۇلت اناسىنا، ۇرپاق تاربيەشىلەرىنە، انا-ۇستازدارعا، قىز-كەلىنشەكتەرگە دەگەن ءىلتيپاتتى كەڭىنەن ناسيحاتتاۋ بولىپ تابىلادى.
ءمۇشايرانىڭ شارتىنا سايكەس، وعان 18 جاستان اسقان بارلىق جاستاعى اقىندار قاتىسا الادى. كەز كەلگەن اقىننىڭ ەكى ولەڭ ۇسىنۋعا قۇقى بار. ونىڭ بىرەۋى مىندەتتى تۇردە قىزدار ۋنيۆەرسيتەتىنىڭ 70 جىلدىعىنا ارنالۋى كەرەك. ال ەكىنشى ولەڭ قازاق قىزىنىڭ جيىنتىقتالعان بەينەسىنە ارنالىپ جازىلۋى ءتيىس.
ءمۇشايراعا قاتىسۋشىلار ۇيىمداستىرۋشىلارعا ەكى جابىق حات ۇسىنادى. ونىڭ بىرىنە بۇركەنشىك ەسىممەن بەرىلگەن اقىننىڭ ولەڭدەرى سالىنادى. ەكىنشىسىندە سول اقىننىڭ تولىقتاي ناقتى اتى-ءجونى، قىسقاشا ءومىربايانى، شىعارمالارىنىڭ ديسكىدەگى ەلەكتروندى نۇسقاسى قوسا بەرىلۋى ءتيىس.
شىعارمالار قازاق مەملەكەتتىك قىزدار پەداگوگيكالىق ۋنيۆەرسيتەتىنە 2014- جىلدىڭ 10- قىركۇيەگىنە دەيىن قابىلدانادى، دەپ حابارلايدى ج و و باسپا ءسوز قىزمەتىنەن.
