مەملەكەتتىك ءتىلدى ۇيرەنۋدى اركىم وزىنەن باستاۋ كەرەك - وبلىس اكىمى
ءوڭىر باسشىسىنىڭ اتاپ وتكەنىندەي، بۇل رەتتە ەڭ الدىمەن قازاقتاردىڭ ءوزى انا ءتىلىن قۇرمەتتەي ءبىلۋى ءتيىس، نەگىزگى جاۋاپكەرشىلىك تە سولارعا جۇكتەلەدى.
كەيبىرەۋلەر مىنبەدە قازاق تىلىندە سايراپ تۇرعانىمەن، ۇيىندە، وتباسىندا نەمەرەلەرىمەن ورىس تىلىندە سويلەسىپ جاتادى. نەمەسە كەرىسىنشە ەندى بىرەۋلەرى قاراپايىم سويلەۋ مادەنيەتىن مەڭگەرمەگەن، ءوز انا تىلىندە ويىن جەتكىزە المايدى. بۇل وسى جيىندا ەسەپ بەرگەن ورال قالاسى اكىمىنىڭ ورىنباسارى مارس ساتىبالديەۆتىڭ تاراپىنان بايقالىپ، سىن تەزىنە ىلىكتى. يدەولوگيالىق سالانى باسقارىپ وتىرعان باسشىنىڭ انا ءتىلىن مەڭگەرمەۋى وكىنىشتى- اق.
حالىقارالىق «قازاق ءتىلى» قوعامى ب ق و (باتىس قازاقستان وبىلىسى) فيليالىنىڭ ءتوراعاسى بولات جەكسەنعاليەۆتىڭ ايتۋىنشا، وبلىستا جەرگىلىكتى بيۋدجەتتەن قارجىلاندىرىلاتىن 2500 دەن استام مەملەكەتتىك قىزمەتشى بولسا، سولاردى ناقتى وقىتۋ جۇيەسى جاسالماعان. 2004-2012 - جىلدارى ولاردىڭ 6 پايىزى عانا كۋرستاردا بىلىكتىلىگىن جەتىلدىرسە، سوڭعى ەكى جىلدا بۇل ماقساتقا وبلىستىق بيۋدجەتتەن قارجى بولىنگەن جوق. وقىتىلعان جاعدايدا دا ونىڭ ناتيجەسى كورىنبەيدى، ياعني كۋرستا ءبىلىم العان ادامنىڭ مەملەكەتتىك ءتىلدى مەڭگەرۋ دەڭگەيى قانداي، ونى ءارى قاراي قالاي جالعاستىرۋ قاجەت، وسىعان كوڭىل بولىنبەيدى.
كەڭەيتىلگەن وتىرىستا سونداي- اق وتباسى الەۋەتىن ارتتىرۋداعى قوعامدىق كەلىسىم كەڭەستەرىنىڭ ءرولى تۋرالى ءسوز بولدى. بۇل جونىندە قازتالوۆ اۋدانىنىڭ اكىمى نۇرلان بەكقايىر بايانداپ، اۋىل- اۋماقتىڭ ەكونوميكالىق- الەۋمەتتىك حال- احۋالىن كوتەرۋ، ارداگەرلەرگە قايىرىمدىلىق كورسەتۋ، تۇرمىسى تومەن ازاماتتاردى جۇمىسپەن قامتۋ ماسەلەلەرىن ايتىپ ءوتتى. وسى ورايدا وبلىس باسشىسى وڭىردە 163 قوعامدىق كەلىسىم كەڭەسىنىڭ جۇمىس جاسايتىنىن، ولاردىڭ قىزمەتىن بارىنشا ورىستەتە ءتۇسۋ قاجەتتىگىن اتاپ كورسەتتى. بۇل باعىتتا «قوعامدىق كەلىسىم» م ك ك قۇرىلىپ، ىسكە كىرىسىپ كەتتى، وعان «حايمات» نەمىس ەتنومادەني بىرلەستىگىنىڭ ءتوراعاسى الەكساندر اجىعاليەۆ جەتەكشىلىك ەتەدى.
«بىرلىك» ءازىربايجان ەتنومادەني بىرلەستىگىنىڭ جەتەكشىسى نادجاف مامەدوۆ «قازاقستان - 2050» ستراتەگياسى اياسىندا شاعىن جانە وتباسى بيزنەسىن دامىتۋ جولدارىنا توقتالدى.
وتىرىستا الداعى جىلدىڭ قازاقستان حالقى اسسامبلەياسى جىلى بولىپ جاريالانۋىنا بايلانىستى وعان جان- جاقتى دايىندىق ماسەلەسى تاعى ءبىر پىسىقتالدى.
اۆتور: ەلجان ەرالى
