ن. نازاربايەۆ: كەز كەلگەن سوعىس كەلىسسوزبەن اياقتالۋى ءتيىس

مەملەكەت باسشىسى ۋكرايناعا گۋمانيتارلىق كومەك كورسەتۋ تۋرالى ءوزىنىڭ ۇسىنىسىنا قاتىستى تۇسىنىك بەردى. «مەن ۇسىنعان العاشقى ماسەلە - دونباسس پەن لۋگانسكىنىڭ زارداپ شەگىپ وتىرعان تۇرعىندارىنا گۋمانيتارلىق كومەك بەرۋ ماسەلەسى. وندا عيماراتتار قيرادى، قىس جاقىنداپ كەلەدى، لۋگانسكىدە ەلەكتر ورتالىقتارى، قۇبىر جۇيەلەرى بۇزىلدى. قىس قاتتى بولادى دەگەن بولجام بار، ادامدارعا قاراپايىم زاتتار جەتىسپەي جاتىر: ءدارى-دارمەك، ازىق-تۇلىك. سوندىقتان بۇل ايماقتارعا گۋمانيتارلىق كومەك قاجەت، قازاقستان بۇعان اتسالىسۋعا دايىن. مەن گۋمانيتارلىق جۇكتى جەتكىزۋ كەزىندە وڭىردە بىتىمگەرشىلىك ورناتۋدى جانە بۇل كومەككە رەسەي عانا ەمەس، باسقا ەلدەر دە قاتىسا الۋى ءۇشىن ارنايى ءدالىز جاساۋدى ۇسىندىم. ءبىز بۇل تاقىرىپقا سالماقتى تۇردە سويلەستىك»، - دەدى پرەزيدەنت.

مەملەكەت باسشىسى ءسامميتتىڭ ەكىنشى تاقىرىبى ۋكراينانىڭ ەۋرووداقپەن قاۋىمداسۋى بولعانىن ەسكە سالدى. «بۇدان كەدەن وداعى ەلدەرى ءۇشىن ءبىز نە كۇتەمىز؟ بۇل قاۋىمداستىقتىڭ ناتيجەسىندە ۋكراينادان كەلەتىن تاۋارلاردى ەنگىزۋدە بارلىق كەدەرگى تولىق الىنادى. ەۋروپادان ۋكرايناعا ارزان ءارى ساپالى تاۋارلار بارادى، ۋكراين تاۋارلارى ىعىسىپ، ءبىزدىڭ جاققا قاراي جىلجيدى، نەگىزىنەن، رەسەيگە، سونىمەن بىرگە، بىزگە دە جەتەدى، ءبىز وسىنى ەسكەرۋىمىز قاجەت»، - دەدى ول.

نازاربايەۆ سامميتكە قاتىسقان ەۋرووداق وكىلدەرى الدىنا ۋكراينانىڭ ەۋرووداقپەن قاۋىمداستىعى ونىمەن ساۋدا-ساتتىق جاسايتىن وزگە ەلدەرگە قايتكەندە زيانىن تيگىزبەيتىن بولادى دەگەن ماسەلەنى قويدىم. «بارلىق تاراپتى تىڭداپ كورىپ، مەن ونداي مۇمكىندىكتەردىڭ بارىنا كوز جەتكىزدىم. سوندىقتان ءبىز مۇنىمەن اينالىساتىن، ەگەر قاجەت بولسا، ۋكراينانىڭ ەۋرووداقپەن ۋاعدالاستىقتارىنا قانداي دا ءبىر وزگەرىستەر ەنگىزۋ ءۇشىن جۇمىس توبىن قۇرۋدى ۇيعاردىق»، - دەدى پرەزيدەنت.

نازاربايەۆتىڭ ايتۋىنشا، ءۇشىنشى ماڭىزدى ماسەلە - ۆلاديمير پۋتين مەن پەتر پوروشەنكونىڭ تۇڭعىش رەت كەزدەسۋى. «مەن تاراپتار كەلىسىمگە كەلىپ، بارلىق ماسەلەنى شەشۋى ءۇشىن بار كۇشىمدى سالدىم. كەز كەلگەن سوعىس، ءتىپتى، الەمدىك سوعىستار دا ءارقاشان كەلىسسوزدەرمەن اياقتالعان، سوندىقتان، تاراپتار ىمىراعا كەلۋى ءتيىس، ىمىرا دەگەن - ءبىر-بىرىنە جول بەرۋ. رەسەي پرەزيدەنتى ۆلاديمير پۋتين مەن ۋكراينا پرەزيدەنتى پەتر پوروشەنكونىڭ جەكە كەزدەسۋى - ءبىزدىڭ بۇگىنگى كەزدەسۋىمىزدىڭ باستى، نەگىزگى ناتيجەسى. ويتكەنى التى اي بويعى سوعىس كەزىندە ولار ءبىر-بىرىمەن كەزدەسكەن ەمەس، ءبىر-بىرىمەن تەك بۇقارالىق اقپارات قۇرالدارى ارقىلى سويلەستى. مەن بۇل كەزدەسۋدى وتە ماڭىزدى دەپ ەسەپتەيمىن»، - دەدى قازاقستان پرەزيدەنتى.

پرەزيدەنتتىڭ ايتۋىنشا، مۇنداي كەزدەسۋلەر جالعاساتىن بولادى. ەۋرووداقتىڭ ءوتىنىشى بويىنشا كەلەسى كەزدەسۋدىڭ قازاقستاندا ءوتۋى مۇمكىن. «قالاي بولعاندا دا، كەلىسسوزدەر سوعىستان جاقسى. سوندىقتان مەن بۇعان ءبىز بوسقا ارالاسىپ جاتقان جوقپىز جانە بارلىق تاراپتان قازاقستانعا دەگەن سەنىم بار، ءبىز وبەكتيۆتىمىز، ءبىز بەيبىتشىلىكتى قالايمىز، ءبىز رەسەي مەن ۋكراينا ءوزارا كەلىسسە ەكەن دەيمىز»، - دەدى ەلباسى.

نازاربايەۆ سامميت اياسىندا كەدەن وداعى ەلدەرى باسشىلارىنىڭ جەكە كەزدەسۋ وتكىزگەنىن ايتتى. 10- قازاندا مينسكىدە كەلىسسوزدەر وتەدى، ونىڭ شەڭبەرىندە ەۋرازيالىق ەكونوميكالىق وداققا ارمەنيا مەن قىرعىزستاندى قابىلداۋ ماسەلەسىن شەشۋ جوسپارلانىپ وتىر.

نۇرسۇلتان نازاربايەۆتىڭ قازاقستاندىق جۋرناليستەر الدىنا رەسمي كەزدەسۋلەر ءۇشىن تىم بەيۋاق كورىنەتىن مەزگىلدە (جەرگىلىكتى ۋاقىت بويىنشا 00:30، استانا ۋاقىتى بويىنشا - 03:30) شىققانىن ايتا كەتۋ كەرەك. بۇل كەلىسسوزدەردىڭ كۇردەلى ءارى ماڭىزدى بولعانىن ايعاقتايدى.

اۆتور: رەنات تاشقىنبايەۆ

Tengrinews.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى