كيىز ءۇي قازاق پەن قىرعىزدىڭ مادەني مۇراسى بولىپ بەكىتىلەدى
تۇركى كيىز ءۇيىن يۋنەسكو-نىڭ ماتەريالدىق ەمەس مادەني مۇرالارىنىڭ قايتا تانىستىرۋ تىزىمىنە ەنگىزۋ تۋرالى ەكى ەلدىڭ بىرلەسكەن ءوتىنىمىن كوميسسيا قاراشا ايىندا قارايدى. بۇل تۋرالى بىشكەكتە يۋنەسكو-نىڭ باس ديرەكتورى يرينا بوكوۆا ايتتى.
قىرعىزستان مەن قازاقستان كيىز ءۇي قۇرۋ جونىندەگى ءداستۇرلى بىلىمدەردى ماتەريالدىق ەمەس مادەني مۇرالار تىزىمىنە قوسۋدى ۇسىنعان. بۇعان قوسا، ەكى رەسپۋبليكا يۋنەسكو مادەني مۇرالارىنىڭ قايتا تانىستىرۋ تىزىمىنە سۋىرىپ سالما اقىندار ايتىسىن قوسۋ تۋرالى دا بىرلەسە ءوتىنىم بىلدىرگەن. بۇل ءوتىنىمدى يۋنەسكو 2015- جىلى قاراۋدى جوسپارلاپ وتىر.
ەسكە سالا كەتەيىك، بۇعان دەيىن قىرعىزستاننىڭ يۋنەسكو-نىڭ ماتەريالدىق ەمەس مادەني مۇرالارى تىزىمىنە «ماناس، سەمەتەي، سەيتەك» ەپيكالىق تريلوگياسىن قوسۋ تۋرالى ءوتىنىشى ماقۇلدانعان بولاتىن. سونىمەن بىرگە، جەتى تۇركى مەملەكەتىنىڭ اتىنان بەرىلگەن ءوتىنىم بويىنشا ناۋرىز مەرەكەسى، اقىندىق ونەر مەن قىرعىز ىرشىلىق ءداستۇرى دە وسى تىزىمگە ەندى.
ايتا كەتەيىك، شىعىس قازاقستاندا جەتى كيىز ۇيدەن تۇراتىن مەيمانحانا سالۋ جوسپارلانىپ وتىر. كەشەن ومبى - مايقاپشاعاي - وسكەمەن تاس جولدارىنىڭ تۇيىسەتىن جەرىنە تۇرعىزىلادى. كيىز ءۇي- مەيمانحانا استانادا تانىستىرىلدى. بۇرىنعى ق ر يندۋستريا جانە جاڭا تەحنولوگيالار مينيسترلىگى جوبا وڭىرگە تۋريستەردى تارتۋعا كومەكتەسەدى دەگەن سەنىم بىلدىرگەن بولاتىن.
Tengrinews.kz .
