قازاقستاندىق قاڭباقتاي قىز تاعى جۇلدەگەر اتاندى

بۇعان دەيىن دە رىپاكوۆا كوپتەگەن اسا ءىرى حالىقارالىق جارىستاردا قازاقستاننىڭ سپورتتىق داڭقىن اسقاقتاتىپ جۇرگەنى بارشاعا ايان. جىل سايىن ءداستۇرلى تۇردە ۇيىمداستىرىلىپ تۇراتىن «گاۋھار ليگا» دەپ اتالاتىن كوممەرتسيالىق جوباداعى تابىسى دا قوماقتى.

2011- جىلى الەم چەمپيوناتىندا كۇمىس مەدالدى يەلەنسە، 2012- جىلى وليمپيادا ويىندارىنىڭ جەڭىمپازى اتاندى. لوندونداعى دودادان كەيىن ولگا ءسابيلى بولدى. سول سەبەپتى دە ۇلكەن سپورتتان قول ءۇزىپ كەتتى. سودان اراعا ءبىراز ۋاقىت سالىپ، ول «گاۋھار ليگا» دوداسىندا بوي كورسەتتى. بيرمينگەمدەگى باسەكەدە جەرلەسىمىز جاسىنداي جارقىرادى. جارىس بارىسىندا 14 مەتر 37 سانتيمەترگە سەكىرگەن رىپاكوۆا ەكىنشى ورىندى يەلەندى. ولگا تەك كولۋمبيانىڭ ايگىلى سپورتشىسى، وليمپيادا ويىندارىنىڭ كۇمىس جۇلدەگەرى، الەم چەمپيونى كاتەرين يبارگۋەننەن عانا قالىپ قويدى. جەڭىمپازدىڭ كورسەتكىشى -  14 مەتر 52 سانتيمەتر.

جوعارىداعى ناتيجەگە قاراپ، ايگىلى سپورتشىمىز بابىندا ەكەنىن بايقادىق. ەندى ءبىزدىڭ ورەندەردى بىرەر اپتادان كەيىن ينچحوندا الاۋى تۇتاناتىن ازيا ويىندارى كۇتىپ تۇر. سول جارىستا دا ولگا رىپاكوۆانىڭ جەڭىس تۇعىرىنىڭ ەڭ بيىك ساتىسىنا كوتەرىلۋىن تىلەيمىز.

«ايقىن»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى