سەرۆيستىك قىزمەت كورسەتۋ «باتىس ەۋروپا - باتىس قىتاي» اۆتوبانى بويىندا جاندانىپ كەلەدى

بەكىتىلگەن تەحنيكالىق تاپسىرمالارعا سايكەس ەسكيزدىك جوبالار ازىرلەنىپ، وبلىستىق ساۋلەت جانە قالا قۇرىلىسى كەڭەسىندە ماقۇلداندى. بۇل تۋرالى وبلىستىق اكىمدىكتىڭ باسپا ءسوز قىزمەتى حابارلادى.

بۇگىندە شيەلى اۋدانى كونە سىعاناق شاھارى ماڭىندا 70 ادامعا ارنالعان ءدامحانا، 20 ادامدىق قوناق ءۇي، كولىكتەرگە ارنالعان اۆتوتۇراق، كونە قالاعا ەكسكۋرسيا جاساۋ ءۇشىن 10 ءمىنىس اتقا ارنالعان اتقورا، سۋ ۇڭعىماسى جانە تەرەك باعى بار «سىعاناق» سەرۆيستىك كەشەنى جۇمىس جاساپ تۇر. كەشەن جانىنان ماي قۇيۋ بەكەتىن سالۋ مۇمكىندىكتەرى قاراستىرىلۋدا.

كۇرە جولدىڭ 1624 شاقىرىمىندا قورقىت اتا مەموريالدىق كەشەنىنىڭ جانىنان «جول قۇرىلىس» ج ش س-ءىنىڭ «قورقىت اتا ءمىناجات ەتۋ ورتالىعى» جوباسىنىڭ قۇرىلىسى اياقتالدى. ول جەردە 20 ورىندىق قوناق ءۇي، 60 ادامعا ارنالعان مەشىت، 150 ورىندىق اس بەرەتىن ورىن، دۇكەنى مەن شەبەرحاناسى، كيىز ءۇي قالاشىعى، تەحنيكالىق قىزمەت كورسەتۋ ورتالىعى ورنالاسقان. جوبانىڭ قۇنى - 450 ميلليون تەڭگە. «بيزنەستىڭ جول كارتاسى - 2020» باعدارلاماسى اياسىندا سىرتقى ينجەنەرلىك جەلىلەردى جەتكىزۋ ءۇشىن 197,3 ميلليون تەڭگە قارجى بولىنگەن.

حالىقارالىق جولدىڭ 1999 شاقىرىمىندا جاڭاقورعان جانە شيەلى كەنتتەرى قيىلىساتىن جەردە «نۇرلى قۇرىلىس قازاق ەلى» ج ش س 10 گەكتار جەردى زاڭداستىرىپ، جوبا ازىرلەدى. ال 2044 شاقىرىمدا جاڭاقورعان اۋدانى بەس ارىق اۋىلدىق وكرۋگىنىڭ ماڭايىندا جەكە كاسىپكەردىڭ ماي قۇيۋ ستانساسى، ءدامحانا، جەل بەرۋ-جەلىمدەۋ شەبەرحاناسى ورنالاسقان. كەشەندى قايتا جاڭعىرتۋ جۇمىستارىن جۇرگىزۋ تۋرالى ۇسىنىس جولداندى. سۇلۋتوبە، بايگەقۇم اۋىلدارىندا ورنالاسقان ماي قۇيۋ بەكەتى يەسىنە قايتا جاڭعىرتۋ بويىنشا ۇسىنىس بەرىلدى، دەلىنگەن حابارلامادا.

اۆتور: ەلۋباي اۋەزوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى