رەسەي سىرتقى ىستەر ءمينيسترى ش ق و اكىمىنە العىس ءبىلدىردى
سەرگەي لاۆروۆ العىس حاتىن قازاقستان رەسپۋبليكاسى سىرتقى ىستەر ءمينيسترى ەرلان ىدىرىسوۆتىڭ اتىنا جىبەرگەن.
رەسمي حابارلامادا بىلاي جازىلعان: «ق ر شىعىس قازاقستان وبلىسىنىڭ اكىمى ب. م. ساپاربايەۆقا جەكە العىسىمدى بىلدىرگىم كەلەدى. ونىڭ ەرەكشە ءىلتيپاتىنىڭ ارقاسىندا وبلىسپەن جانە ونىڭ اكىمشىلىك ورتالىعى وسكەمەن قالاسىمەن تانىسۋ وتە اسەرلى ءارى جان-جاقتى ءوتتى، ءبىزدىڭ شەكارالاس وڭىرلەر اراسىنداعى ساۋدا-ەكونوميكالىق، مادەني جانە رۋحاني ىنتىماقتاستىقتىڭ پەرسپەكتيۆالىق الەۋەتىمەن تولىق قانىقتىم».
ەسكە سالا كەتەيىك، اعىمداعى جىلعى 6- تامىزدا قازاقستانعا جۇمىس ساپارى بارىسىندا سەرگەي لاۆروۆ وسكەمەنگە باردى، وندا ءبىرقاتار ءىرى ونەركاسىپتىك جانە مادەني نىسانداردى ارالادى. سونداي-اق وبلىس ورتالىعىندا ق ر جانە ر ف سىرتقى ىستەر مينيسترلەرىنىڭ كەزدەسۋى ءوتىپ، وندا ساۋدا-ەكونوميكالىق سالا مەن ەۋرازيالىق ينتەگراتسيالىق ۇردىستەردى جىلجىتۋ ماسەلەلەرى تالقىلانعان بولاتىن.
