ۇلى تاۋداعى ەكسپەديتسيا كيەلى ءوڭىردى زەرتتەۋدى اياقتادى
ساياحات ون كۇن ىشىندە العا قويىلعان مىندەتتەردىڭ تۇگەلگە جۋىعى ورىندالدى. بىرىنشىدەن، جەرگىلىكتى ەلدى مەكەندەردىڭ ەكونوميكالىق جانە گەوگرافيالىق ەرەكشەلىكتەرى تۋرالى اقپاراتتار جينالدى. ەكسپەديتسيا مۇشەلەرى قاراعاندى وبلىسىنىڭ ۇلى تاۋ اۋدانىنداعى تاريحي نىساندار ءتىزىمىن تولىقتىردى.
ماماندار بۇل ءتىزىمنىڭ، وكىنىشكە قاراي، نىساندار بويىنشا تولىق اقپاراتتى قامتىمايتىنىن، ولاردىڭ ورنالاسۋ جاعدايى تۋرالى مالىمەتتەردىڭ ناقتى ەمەس ەكەنىن ايتتى. ولار كارتاعا اۋرۋحانا، پوليتسەي ۋچاسكەسى، اسحانا، انىقتاما ورتالىعى سياقتى تۋريستەرگە قاجەتتى نىسانداردى ەنگىزدى. ەكسپەديتسيا مۇشەلەرى كەلەشەكتە تۋريستەر ءۇشىن جول كورسەتكىشتەرى جۇيەسىن وڭتايلاندىرۋ جونىندە ۇسىنىستار ازىرلەيتىن بولادى.
سونىمەن بىرگە، ەكسپەديتسياعا قاتىسۋشى عالىمدار جەرگىلىكتى بيلىك پەن تۇرعىندار اراسىندا سۋ رەسۋرستارى مەن ولار قولداناتىن كارىز جۇيەلەرى جونىندە ساۋالناما جۇرگىزدى. كەلەشەكتە بۇل مالىمەتتەر نازاربايەۆ ۋنيۆەرسيتەتى زەرتتەۋشىلەرىنىڭ قازاقستاننىڭ سۋ رەسۋرستارىن باعالاۋ جونىندەگى جۇمىستارىنا قولدانىلادى.
جەرگىلىكتى تۇرعىندارمەن جۇمىس بارىسىندا تامدى وزەنىنىڭ جاعالاۋىنان تاڭبالى تاستار انىقتالدى. ەكسپەديتسياعا قاتىسۋشىلار تامدى پەتروگليفتەرىن زەرتتەۋ ءۇشىن جاڭا ساياحات ۇيىمداستىرۋ كەرەكتىگىن ايتتى.
ەكوتۋريزمدى دامىتۋ جۇمىستارى شەڭبەرىندە جەرگىلىكتى بيلىكپەن كەلىسسوزدەر جۇرگىزىلدى. جەرگىلىكتى ەلدى مەكەندەر تۇرعىندارىنا ەكوتۋريزم جۇيەسى مەن تۋر ۇيىمداستىرۋ ماسەلەلەرىن تۇسىندىرەتىن كوشپەلى سەمينارلار وتكىزۋ جوسپارلانىپ وتىر.
ەسكە سالا كەتەيىك، 11- تامىزدا ۇلى تاۋعا ارنايى ەكسپەديتسيا اتتانعان بولاتىن. ونىڭ مۇشەلەرى تاريحي ەسكەرتكىشتەر مەن تابيعاتى اسەم جەرلەردى ارالادى. ەكسپەديتسيا ماقساتتارىنىڭ ءبىرى - قازاق ءۇشىن قاسيەتتى ولكەدە ۇلتتىق ساياباق اشۋ.
Massaget.kz.
