قازاقستاندا «دەموگرافيالىق قاۋىپسىزدىك» تۋرالى زاڭ قابىلداۋ قاجەت - ج. اليەۆ، ءماجىلىس دەپۋتاتى
ونىڭ ايتۋىنشا، بۇل زاڭنىڭ الەۋمەتتىك ءرولى باسىم، ماڭىزى ەرەكشە.
«دۇنيەگە كەلگەن ءار سابيگە تولەنەتىن ءبىر رەتتىك تولەم كولەمىن ۇلعايتۋ، وزگە دە الەۋمەتتىك تولەمدەردى قايتا قاراۋ تۋرالى وزەكتى ۇسىنىستارىمنىڭ كۇن تارتىبىنە قايتا شىعار ۋاقىتى تاياۋ. الداعى كۇزدە بۇل باعىتتا اۋقىمدى جۇمىستار اتقارىلماق» ، دەدى دەپۋتات. اۋدان اكتيۆىمەن وتكەن اشىق اڭگىمە بارىسىندا ول قازاقستان حالقى اسسامبلەياسىنىڭ ەل تىنىشتىعىن ساقتاپ، بىرلىك تۋىن نىقتاي ءتۇسۋ باعىتىنداعى اۋقىمدى ىستەرىنە دە توقتالدى.
ءماجىلىس دەپۋتاتى اتالمىش اۋدانداعى«دوستىق» مادەنيەت ۇيىنە ات باسىن تىرەپ، ۇلتتىق ناقىشپەن كيىز ءۇي پىشىندە بەزەندىرىلگەن ورتالىقتا بولىپ، اق جاۋلىقتى اجەلەرمەن وتباسىلىق، ۇلتتىق، رۋحاني تاربيە توڭىرەگىندە وي ءوربىتتى.
«بۇگىندە بارلىق قازاقستاندىقتار ەلدىڭ يەسى قازاق ۇلتىنىڭ كەڭدىگىنە، كىشىپەيىلدىگىنە باس يەدى، قۇرمەت تۇتادى. تاعدىردىڭ جازۋىمەن جەرىمىزگە تابان تىرەگەن سان ۇلىستىڭ بالاسىن باۋىرعا باسقان بابالارىمىز سول كەزدەن- اق بەرەكەلى بەيبىتشىلىكتىڭ كيەلى قازىعىن ماڭگىلىككە ورناتىپ كەتكەن ەكەن. تاتۋلىقتىڭ تابىسقا باستاپ، ىرىسىمىزدىڭ ەسەلەنە تۇسەرىنە ءدۇيىم جۇرت كوز جەتكىزدى. بۇل - ەل مەن ەلباسىنىڭ تولايىم تابىسى. وسى جولدان جازباي، سالاۋاتتى ۇرپاعىمىزدى تۇلەتىپ، امان بولايىق، ەڭبەكتەرىڭە تابىس تىلەيمىن» ، - دەدى جۇماتاي ءالي ۇلى.
ودان ءارى ورىس، ۋكراين، بەلورۋس، تاتار ۇلتتىق ەتنو- مادەني ورتالىقتارى جۇمىستارىمەن تانىسۋ بارىسىندا دا اسەرلى اڭگىمەسىن ساباقتاي ءتۇسىپ، بىرلىك، ىنتىماق، تاعاتتىلىق، مەملەكەتتىك ءتىل جايىن قاۋزادى.
ءماجىلىس دەپۋتاتى وڭىرگە ساپارى بارىسىندا وبلىستاعى ەتنو مادەني بىرلەستىكتەر جەتەكشىلەرىمەن كەزدەسىپ، ەلباسىمىزدىڭ ساليقالى ساياساتىنا سايكەس ەلىمىزدە بىرلىك پەن ۇلت ارالىق كەلىسىمدى ودان ءارى ورنىقتىرۋ باعىتىندا بۇدان بىلاي دا بىرلەسىپ جۇمىس جاساۋ قاجەتتىگىن اتاپ كورسەتتى. سونىمەن قاتار جيىنعا قاتىسۋشىلاردىڭ ساۋالدارىنا جاۋاپ بەردى.
اۆتور: ەلجان ەرالى
