ەڭ ادەمى كەلىنشەك استانادا تۇرادى
ون جەتى جاسىندا تۇرمىس قۇرىپ، بەسىگى مەن بەرەكەسىن بىرگە تەربەتىپ كەلە جاتقان ۇلدانايدىڭ، قازىر ەكى بالادان ارتىق قۇرساق كوتەرگىسى كەلمەيتىندەرگە ايتار كەڭەسى دە بار.
استانانىڭ ەڭ جاس باتىر اناسى ۇلداناي مەن جۇبايى ابدىكارىم ەكەۋى قازىر ءتورت ۇل مەن بەس قىز تاريبەلەپ وتىر. ارالارى ءبىر، ەكى جاس قانا تەتە باۋىرلار ءبىر- ءبىرىن جەتەلەپ، ۇلكەنى كىشىسىن باعىپ، ءوسىپ جاتىر. ۇلكەن قىزى جۇلدىز تۇرمىسقا شىعىپ، ءسابي ءسۇيىپ، وتىزدان اسقان اناسىنا جيەن نەمەرە سىيلاپ وتىر.
ەڭ قىزىعى قازىر جاس اجەنىڭ دە، قىزىنىڭ دا اياعى اۋىر. ونىنشى رەت قۇرساق كوتەرگەن ۇلداناي جيەن نەمەرەسىمەن قاتار دۇنيەگە شەكەسى تورسىقتاي ۇل اكەلەم دەپ قۋانىشتى.
«قورقۋدىڭ قاجەتى جوق. ءار بالانى نەسىبەسىمەن بەرەدى اللا تاعالا. بالا دەگەن تاپتىرمايتىن اللانىڭ بەرگەن بايلىعى، بىلگەن ادامعا»، - دەيدى باتىر انا ۇلداناي الىمبايەۆا.
ەتەگىنە ەكەۋى جارماسسا، جەتەگىندە جەتى بالاسى جۇرگەن ۇلداناي ءۇي شارۋاسىن دا، استاناداعى ءوز كاسىبىن دە دوڭگەلەتىپ وتىر. ۇيدەگى ۇستەل جاپقىشتان باستاپ، تەرەزەنىڭ پەردەسىنە دەيىن ءوزى تىگەتىن كەلىنشەك اعايىنعا دا سىيلى كەلىن.
ال ەكى بالادان ارتىق تۋسام «ءمۇسىنىم بۇزىلادى» دەيتىن كەلىنشەكتەرگە، بوسانعان سايىن ايەلدىڭ قان اينالىمى جاقسارىپ، اجارلانا تۇسەدى دەگەن كەڭەسىن ايتادى. ەكى- ءۇش سابيدەن گورى، كوپ بالانى وسىرگەن الدەقايدا جەڭىلىرەك. تەتە وسكەننىڭ تەنتەكتىگى دە بىلىنبەيدى دەيدى باتىر انا.
«كىرگىزگەن كەزدە ساناپ كىرگىزەمىز، ساناپ شىعارامىز. بىرەۋ، ەكەۋ، ۇشەۋ، تورتەۋ دەپ. اداسىپ تا قالامىز، ىزدەپ تە جۇرگەن كۇندەرىمىز بولادى. كەشكە قاراي تۇگەندەيمىز اناۋ قايدا مىناۋ قايدا دەپ؟ »، - دەيدى ۇلداناي الىمبايەۆا.
توعىز بالالى وتباسى قازىر استانادان پاتەر الۋ كەزەگىندە تۇر. مەملەكەتكە مىندەتسىنبەي- اق قازاقتىڭ سانىن كوبەيتۋ انالىق پارىزىم دەيدى ۇلداناي. ەسەسىنە شاڭىراق يەلەرىن ءار بالانىڭ قادامى مەن قىلىعى قۋانتادى. ۇل- قىزدارى زەرەك، شەتتەرىنەن ونەرلى. ۇلكەندەرى دومبىرا تارتىپ، ءان ايتادى.
تۇرمىسقا قاراي تۋۋ سيرەگەن قوعامدا، بالا سانىن ونعا جەتكىزگەن وتباسىلار ىلۋدە ءبىر كەزدەسەدى. سوندىقتان بولار، ۇلداناي جاس تا بولسام تالاي بالانىڭ كىندىگىن كەسۋگە شاقىردى، جاس كەلىندەردىڭ باسىنا ورامال سالدىم دەيدى. ال، بالا كوتەرە الماي جۇرگەن كەلىنشەكتەر، التىن قۇرساقتى انادان ىرىمداپ زاتتارىن كوپ سۇرايدى ەكەن.
توعىز ۇل قىز تاريبەلەپ وتىرعان انا ۇلداناي اللا بەرسە دۇنيەگە ۇرپاق اكەلۋگە ءارقاشان ءازىرمىن دەيدى. ال انا اتانۋدى ارمانداپ جۇرگەن بارلىق ايەلگە جۇعىستى بولسىن دەپ تىلەيدى.
