قازاق ونەرىنىڭ ساڭلاقتارى: مۇحامەدجان رۇستەموۆ
1932 -جىلى قىزىلوردا وبلىسىندا تۋعان. الماتى جوعارعى پارتيا مەكتەبىندە وقىعان. رۇستەموۆ 50 دەن اسا ءاننىڭ اۆتورى. ولاردىڭ ىشىندە بەلگىلىلەرى: «قيمايمىن»، «اق حالاتتى ابزال جاندار»، «ساعىنىش»، «ايتولقىن»، «اق بوساعا»، «ارمىسىڭ باۋرلارىم الىستاعى» جانە تاعى باسقالارى.
رۇستەموۆ اقىن جانە كومپوزيتور نارتاي بەكەجانوۆتىڭ شىعارماشىلىعىن زەرتتەۋشى رەتىندە بەلگىلى، ول 1983 - جىلى نارتاي اتتى قۇجاتتى پوۆەست جازدى، «نارتاي» اۋەندەرى، ن. بەكەجانوۆتىڭ مۋزىكالىق جانە پوەتيكالىق مۇراسى تۋرالى «تەرمە» تەلەحابارلار سەرياسىن ۇيىمداستىردى. رۇستەموۆ سونداي- اق، نارتاي شىعارمالارىن ۇزدىك ورىنداۋشى رەتىندە دە كوپكە تانىمال.
1950 - جىلى شيەلى قىستاعىنداعى XIV جىلدىق وكتيابر اتىنداعى قازاق ورتا مەكتەبىن ءبىتىرىپ، ەڭبەك جولىن سول جىلى قازان ايىندا وڭتۇستىك قازاقستان وبلىسى سارىاعاش اۋدانداق كومسومول كوميتەتىندە مەكتەپ وقۋشىلارى جانە پيونەر ۇيىمى ءبولىمى مەڭگەرۋشىسى قىزمەتىن باستاعان.
1951 - جىلى ماۋسىمدا سول كومسومول كوميتەتىندە ەكىنشى حاتشى بولىپ سايلانادى.
1952-جىلدىڭ تامىز ايىنان 1953-جىلدىڭ تامىزىنا دەيىن ول تاشكەنت قالاسىنداعى №9 وزبەك قىزدارى ورتا مەكتەبىندەگى 11-پەداگوگيكالىق كلاستى ءبىتىرىپ، ورىس ءتىلى مەن ادەبيەتى پانىنەن ءدارىس بەرەتىن ءمۇعالىم بولىپ شىعىپ، وڭتۇستىك قازاقستان وبلىسىنىڭ قاراتاس (قازىرگى قازىعۇرت ) اۋدانىنا كەلىپ، «جىگەرگەن» ەلدى مەكەنىندەگى مولوتوۆ اتىنداعى ورتالاۋ مەكتەپكە جولداما الادى. Cول جىلى قاراشادا اۋداندىق كومسومول كوميتەتىنە حاتشى بولىپ سايلاندى.
1955-1959 -جىلدارى الماتى جوعارى پارتيا مەكتەبىنىڭ جۋرناليستيكا ءبولىمىن ءبىتىرىپ، 1959 - جىلدىڭ تامىز ايىنان وڭتۇستىك قازاقستان وبلىستىق كومسومول كوميتەتىندە كومسومولدار ۇيىمدارى ءبولىمى مەڭگەرۋشىسىنىڭ ورىنباسارى بولىپ بەكىتىلەدى.
1960 - جىلدىڭ تامىزىندا وبلىستىق پارتيا كوميتەتى بيۋروسىنىڭ شەشىمىمەن ول وبلىستىق كاسىپتىك- تەحنيكالىق ءبىلىم بەرۋ باسقارماسى باستىعىنىڭ ورىنباسارى قىزمەتىنە بەكىتىلىپ، سول قىزمەتتە وڭتۇستىك قازاقستان ولكەسى ۇيىمداستىرىلىپ، قايتا قالىپقا كەلگەندە دە ىستەدى.
1968- جىلى تامىزدا وبلىتىق پارتيا كوميتەتىنىڭ ۇگىت- ناسيحات ءبولىمىنىڭ نۇسقاۋشىسى قىزمەتىنە بەكىتىلىپ، وندا 1984 -جىلعا دەيىن ىستەپ، سول جىلدىڭ ناۋرىزىنان وبلىستىق پارتيا كوميتەتىنىڭ مۇراعاتىنا مەڭگەرۋشى بولىپ اۋىستىرىلىپ، وندا 1991 -جىلعا دەيىن ىستەدى. كومپارتيا تاراعاندا بۇكىلوداقتىق لەنين اتىنداعى بالالار قورىنىڭ وبلىستىق ۇيىمىندا ءتوراعا قىزمەتىن اتقارىپ، 1992 - جىلى ماۋسىمدا حالىقارالىق «قازاق ءتىلى» قوعامىنىڭ وبلىستىق ۇيىمىنا ءتوراعا بولىپ سايلاندى.
1997 - جىلدىڭ قىركۇيەك ايىنان م. اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ دوتسەنتى، شىمكەنت مۋزىكالىق كوللەدجىنە تەرمەدەن شاكىرتتەر دايارلايتىن ۇستاز بولدى.
«نارتاي» اتتى دەرەكتى پوۆەسى (1983, «جالىن» ) جارىق كوردى. گ. بايدۋكوۆتىڭ «چكالوۆ» اتتى كىتابىن قازاقشاعا اۋدارىپ، 1995 - جىلى «جالىن» باسپاسىنان شىعاردى.
م. رۇستەموۆ ۆ. ي. لەنيننىڭ 100 -جىلدىعىنا وراي «ەڭبەكتەگى ەرلىگى ءۇشىن» ، «ەڭبەكتەگى ەرەن ەڭبەگى ءۇشىن» مەدالدارمەن ماراپاتتالعان. «قازاقستان رەسپۋبليكاسىنا ەڭبەك سىڭىرگەن مادەنيەت قىزمەتكەرى» دەگەن (1992) جوعارى اتاققا يە، وبلىس اكىمىنىڭ «زەردە» ستيپەندياسىنىڭ يەگەرى (1998)، قازاقستان رەسپۋبليكاسىنىڭ جازۋشىلار، جۋرناليستەر وداقتارىنىڭ مۇشەسى، شيەلى قىستاعىنىڭ «قۇرمەتتى ازاماتى» (1992)، «رەسپۋبليكالىق دارەجەدەگى زەينەتكەر» .
