قازاق ونەرىنىڭ ساڭلاقتارى: بيبىگۇل تولەگەنوۆا
ءانشى رەپەرتۋارىندا قازاقتىڭ حالىق اندەرى، ۆوكالدىق كلاسسيكا شىعارمالارى، قازىرگى زاماندىق كومپوزيتورلارىنىڭ رومانستارى، اندەرى بار. ب. تولەگەنوۆا ۇلتتىق وپەرا ونەرىنىڭ دامۋىنا زور ۇلەس قوستى. ول اباي اتىنداعى قازاقتىڭ مەملەكەتتىك اكادەميالىق وپەرا جانە بالەت تەاترىنىڭ، جامبىل اتىنداعى قازاقتىڭ مەملەكەتتىك فيلارمونياسىنىڭ سوليسى.
ەڭ ۇزدىك پارتيالارى: جىبەك (ە. برۋسيلوۆسكيدىڭ "قىز جىبەگى") ، گۇلبارشىن (ە. راحمادييەۆتىڭ "الپامىسى") ، ەڭلىك (ع. جۇبانوۆانىڭ "ەڭلىك- كەبەگى") جانە ت. ب. ب. تولەگەنوۆا سونداي- اق "دالا قىزى"، "ءبىزدىڭ سۇيىكتى دارىگەر"، "بۇل شۇعىلادا بولعان"، "تاقيالى پەرىشتە" كينوفيلمدەرىندە وينادى.
ب. تولەگەنوۆانىڭ انشىلىك تالانتىن تانىپ، ونىڭ ونەر جولىنا تۇسۋىنە باعىت سىلتەگەن ءارى العاش ءدارىس بەرگەن كەڭەس جازۋشىسى گ. ي. سەرەبرياكوۆا (سول كەزدە سەمەيدە تۇرعان) بولدى. ب. تولەگەنوۆا ەڭبەك جولىن1946 - جىلى سەمەيدىڭ ەت كومبيناتىندا جۇمىسشىلىقتان باستادى. ءبىرسىپىرا ۋاقىت قازاقتىڭ وپەرا جانە بالەت تەاترىندا جۇمىس ىستەدى. 1965-1971 -جىلدارى قازاق فيلارمونياسىنىڭ ءانشى- ءسوليسى بولدى. 1971 - جىلدان قازاقتىڭ وپەرا جانە بالەت تەاترىندا ەڭبەك ەتەدى. ب. تولەگەنوۆانىڭ قايتالانباس ورىنداۋشىلىق ونەرىنىڭ قاينار بۇلاعى ەڭ الدىمەن قازاقتىڭ حالىق اندەرىنە سايادى.
ءانشىنىڭ الۋان تاقىرىپتى رەپەرتۋارىندا قازاقتىڭ حالىق اندەرى ("گاۋھار تاس"، "جيىرما بەس") ، قازاقستان كومپوزيتورلارىنىڭ شىعارمالارى (حاميديدىڭ "بۇلبۇلى"، برۋسيلوۆسكيدىڭ "قوس قارلىعاشى"، تولەبايەۆتىڭ "ەسكە الۋى"، راحماديەۆتىڭ "تارانتەللاسى"، مۇحامەدجانوۆتىڭ "كوكتەم ءۆالسى"، تىلەنديەۆتىڭ "كەل ەركەم، الاتاۋىما") ، سونداي- اق پ. ي. چايكوۆسكي مەن س. ۆ. راحمانينوۆتىڭ رومانستارى، ن. ا. ريمسكيي- كورساكوۆتىڭ وپەرالارىنان اريالار جانە باتىس ەۋروپا سازگەرلەرىنىڭ (دونيتسەتتي، گريگ، شۋبەرت) شىعارمالارى دا بار. ب. تولەگەنوۆا ءوزىنىڭ كونتسەرتتىك- ورىنداۋشىلىق ونەرىن شەبەرلىكتىڭ جوعارى ساتىسىنا كوتەرىپ، كلاسسيكالىق دارەجەگە جەتكىزدى. بۇل تۇرعىدا ول "قازاقتىڭ بۇلبۇلى" اتانعان ك. بايسەيىتوۆانىڭ ورىنداۋشىلىق شەبەرلىگىن جالعاستىرۋدا.
ب. تولەگەنوۆا ونەرى رەسپۋبليكا، وداق كولەمىنە عانا ەمەس، بۇكىل دۇنيە جۇزىنە تانىلدى. گاسترولدىك ساپارمەن ءۇندىستان، الجير، مىسىر، سيريا، ۆەتنام، پولشا، چەحوسلوۆاكيا، كانادا، شۆەتسيا، فرانتسيا، يتاليادا بولىپ، ونەر تولعادى. ك س ر و مەملەكەتتىك سىيلىعىنىڭ (1970) جانە قازاق ك س ر مەملەكەتتىك سىيلىعىنىڭ (1960) لاۋرەاتى. 1957, 1958 - جىلدارى ماسكەۋدە وتكەن ونشىلەر بايقاۋىنىڭ لاۋرەاتى. قازاق ك س ر جوعارعى كەڭەسىنىڭ دەپۋتاتى. لەنين وردەنى جانە ەڭبەك قىزىل تۋ وردەنىمەن، مەدالدارمەن، قازاقستان رەسپۋبليكاسى پرەزيدەنتىنىڭ جەكە التىن بەلگىسىمەن (1999) ماراپاتتالعان. ك س ر و جانە قازاقستان رەسپۋبليكاسى مەملەكەتتىك سىيلىقتارىنىڭ، «تارلان» تاۋەلسىز سىيلىعىنىڭ (2001) لاۋرەاتى. «جىل ادامى» اتاعىن العان (2001) . قازاقستان جۇلدىزدار اللەياسىندا جەكە جۇلدىزعا يە (2002) . «وراق جانە بالعا» مەدالىنىڭ جانە لەنين وردەنىنىڭ ۇسىنىلۋىمەن قوسا سوتسياليستىك ەڭبەك ەرى (1991) ، استانا قالاسىنىڭ جانە شىعىس قازاقستان وبلىسىنىڭ قۇرمەتتى ازاماتى.
