استانادا «ابايدىڭ ءان الەمى» اتتى مەرەكەلىك شارا وتۋدە

شارا زيالى قاۋىم وكىلدەرىنىڭ اباي ەسكەرتكىشىنە گۇل قويۋ راسىمىمەن باستالدى. سونىمەن قاتار، ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ارتىستەرى ابايدىڭ ومىرىنەن دايىندالعان قويىلىمدى كورسەتتى.

وسىدان كەيىن قازاقستان رەسپۋبليكاسىنىڭ ەڭبەك سىڭىرگەن ءارتىسى، ونەرتانۋ پروفەسسورى كەنجەعالي مىرجىقبايدىڭ «قايران جۇرتىم»، «ولسە داعى تابيعات ادام ولمەس»، «قاراڭعى تۇندە تاۋ قالعىپ» (ءۇش تىلدە)، «ايتتىم سالەم، قالامقاس»، قازاقستان رەسپۋبليكاسىنىڭ ەڭبەك سىڭىرگەن قايراتكەرى جانات شىبىقبايدىڭ «كوزىمنىڭ قاراسى»، قازاقستان رەسپۋبليكاسىنىڭ ەڭبەك سىڭىرگەن قايراتكەرى گۇلزيرا بوكەيحاننىڭ «تاتيانانىڭ ءانى»، سونداي-اق قازاقتىڭ ءداستۇرلى اندەرىن ناقىشىنا كەلتىرە ايتىپ جۇرگەن تانىمال ءانشى ەرلان ءرىسقاليدىڭ ورىنداۋلارىندا «سەگىز اياق»، «بويى بۇلعاڭ» سياقتى ابايدىڭ تانىمال اندەرى شىرقالدى.

استانا قالاسى تىلدەردى دامىتۋ باسقارماسى بۇل شارا ابايدىڭ سان قيلى مۇراسىن ناسيحاتتاۋ، الۋان تاقىرىپتاعى اندەرى ارقىلى سۋرەتكەردىڭ ەستەتيكالىق الەمىن تانىتۋ ماقساتىندا ۇيىمداستىرىلىپ وتىرعاندىعىن ءمالىم ەتتى.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى