ەكى قازاق سپورتشى گيننەسس كىتابىنا ەندى
ءدۇبىرلى دوداعا قازاقستان اتىنان 8 سپورتشى قاتىستى. سىربويىلىق 63 جاستاعى سەرىك قۇلمىرزايەۆ پەن ونىڭ سپورتتاعى ۇستازى 75 جاستاعى جاربولسىن قۇنداقبايەۆ ۇزدىك ناتيجە كورسەتكەنى ءۇشىن «گيننەسس كىتابىنا ەسىمى ەنگەن رەكوردسمەن» اتاندى، دەپ حابارلايدى قارماقشى اۋداندىق اكىمدىگىنىڭ باسپا ءسوز قىزمەتىنەن.
الەمنىڭ 40 شاقتى ەلىنەن 400 دەي سپورتشىنىڭ باسىن قوسقان سايىسقا قاتىسۋشىلاردىڭ ەڭ جاسى رەسەيلىك 4 جاسار بالعىن، ال ەڭ ەگدەسى 90 نان اسقان لاتۆيالىق قاريا بولدى. كوپشىلىك رەسەي، بەلارۋس، پولشا، گەرمانيا، لاتۆيا جانە ليتۆا سپورتشىلارى جاڭا رەكورد جاسايدى دەپ توپشىلاعان. دەگەنمەن، تۇلا بويىنا بۇلا كۇش بىتكەن سىربويىلىق قوس ارداگەر جۇلقا جانە سەرپە كوتەرۋدە ەشكىمگە دەس بەرمەدى.
- 60 سەكۋندتا 60 رەت كوتەرىپ تۇراتىنمىن. ەندى بيىل 90 رەت كوتەردىم. ەڭ كۇردەلى، 3 ەلەمەنتتى قوسقان. ونىڭ ىشىندە سەرپە، جۇلقا كوتەرۋ وليمپيادالىق نورماتيۆكە بايلانىستى 3 سايىس بويىنشا 3 مينۋت ىشىندە 78 رەت كوتەردىم. ول - مەن ءۇشىن ۇلكەن دارەجە. بۇرىن وندايدى كوتەرگەن جوق ەدىم»، - دەيدى كىر تاسىن كوتەرۋدەن الەم چەمپيونى: سەرىك قۇلمىرزايەۆ.
مەملەكەتتىك قىزمەتتە جۇرسە دە، سپورتتان ەش قول ۇزبەگەن سەرىك قۇلمىرزايەۆ زەينەت جاسىنا جەتتى. ال ونى سالاۋاتتىلىققا باۋلىعان ۇستازى جاربولسىن قۇنداقبايەۆ 75 كە كەلسە دە ءالى تىڭ. 16 كەلىلىك كىر تاسىن ۇرشىقشا ۇيىرەدى. دۇنيەجۇزىلىك دارەجەدەگى جارىستاردا تالاي رەت توپ جارعان. ومىراۋى مەدالعا تولعان اقساقال ەڭبەكتەگەن بالادان ەڭكەيگەن كارىگە دەيىن قاتىساتىن سپورتتىق شارالار ءبىزدىڭ ەلدە دە جۇيەلى ۇيىمداستىرىلسا، دەيدى.
- رەسەي بۇقارالىق سپورتتى دامىتىپ وتىر. ال بىزدە وتەتىنى - اندا-ساندا اۋىل سپارتاكياداسى. مەكتەپ بالالارى ونسىز دا دەنە تاربيەسى ساباعىن وتەدى. سونى بۇقارالىق دەيمىز. ول بۇقارالىققا جاتپايدى. بۇقارالىق سپورت دەگەن بارلىق سپورت تۇرىنەن جارىس ۇيىمداستىرۋدى بىلدىرەدى. ءبىزدىڭ قازاق قاجىمۇقان، بالۋان شولاق كەزىندە جەردە جاتقان تاستى كوتەرىپ، بۇقا-وگىز كوتەرىپ، چەمپيون بولعان، دەيدى كىر تاسىن كوتەرۋدەن الەم چەمپيونى جاربولسىن قۇنداقبايەۆ.
قوس ارداگەر ارنايى جاراقتاندىرىلعان سپورت زالدا ەمەس، تابيعات اياسىندا شىنىعادى. اۋدان جاستارى دا الەمدى مويىنداتقان اۋىل اقساقالدارىنىڭ اينالاسىنا ءجيى جينالىپ، كوشەلى اڭگىمە تىڭدايدى. بىلەگى مىقتى بۇلا كۇش يەلەرى بۇقارالىق سپورتقا دەن قويعان ءىزباسارلارىنا بىلگەن-كورگەنىن ۇيرەتۋدەن جالىققان ەمەس.
اۆتور: ەلۋباي اۋەزوۆ
