ۇلتتىق تەلەارنانىڭ جاڭا ماۋسىمى بۇگىن ەكى جاڭا تەلەحيكايامەن باستالادى
«قارا شاڭىراقتىڭ» باستى كەيىپكەرلەرى - قاراپايىم وتباسىندا وسكەن ءۇش اعايىندى جىگىت. ۇشەۋىنىڭ دە نەگىزى جاقسى، ءاۋ باستا اتا- انالارى جاقسى تاربيەگە باۋلىعان. ءبىراق، تۇسكەن ورتالارى، جۇرگەن اينالاسى باسقا.
«قارا شاڭىراق» كارتيناسىنىڭ سيۋجەتىنىڭ نەگىزىندە اعايىندى ءۇش باۋىردىڭ تاعدىرى، ولاردىڭ تاڭداعان ءومىر جولدارى جاتىر. ۇلكەنى الىشەر - بەلدى توپ- مەنەدجەر، بيزنەسمەن. الايدا، جەكە ومىرىندە ءبىر شەشىم بولماعاننان، ءتۇرلى پروبلەمالارعا تاپ بولادى. داۋلەت - ورتانشىسى، بۇرىنعى سپورتشى، قازىرگى ۋاقىتتا باپكەر. جاس ءانشى ليندامەن كەزدەسۋ ارقىلى ول جەتكەن جەتىستىگىندە توقتاپ قالماي، العا ۇمتىلا بەرۋ قاجەتتىگىن تۇسىنەدى. ءمادي اتا- اناسىمەن قالعان كەنجە، اكەسىنىڭ ءىسىن جالعاستىرۋشى - شارۋا قوجايىنى. ول اكەسىنىڭ قامقورلىعىنان شىعىپ، ءوز ءومىرىنىڭ يەسى بولۋعا تالپىنادى. ءارقايسىسىنىڭ جەكە ومىرلەرى، تيىسىنشە جەكە پروبلەمالارى بار جانە ولار بارلىق ءجۇز سەريا بويىندا ولاردى شەشۋگە تالپىنادى.
سەريال «قازاقستان» تەلەارناسىندا 25 - تامىزدان باستاپ دۇيسەنبى مەن بەيسەنبى ارالىعىندا 21.50 دە ورىس تىلىندەگى سۋبتيترمەن كورسەتىلەدى.
بۇگىن «قازاقستان» ۇلتتىق تەلەارناسىنىڭ ەفيرىندە شىڭعىسحاننىڭ نەمەرەسى، تولەي ۇلىنىڭ ءومىرى، باسقارۋى جانە باسىپ الۋلارى تۋرالى سۋرەتتەيتىن «قۇبىلايحان» ەپيكالىق دراماسىنىڭ دا پرەمەراسى باستالادى. تەلەحيكايانىڭ سيۋجەتى بىرنەشە ون جىلدىقتى قامتيدى جانە موڭعولداردىڭ ۇلى ديناستياسى يۋاننىڭ، ودان كەيىن ۇلى قىتاي يمپەرياسىنىڭ قۇرىلۋىنا سەبەپ بولعان وقيعالار تۋرالى باياندايدى.
50 سەريادان تۇراتىن تاريحي دراما قىتاي ەلىندە ۇلكەن تابىسقا جەتىپ، قىمبات جوبالاردىڭ ءبىرى بولدى. تەلەحيكايا گونكونگ، تايلاند، مالايزيا، كورەيا، تايۆان، ۆەتنام، ا ق ش، كانادا ەلدەرىندە دە ۇلكەن تابىسپەن ءوتتى. تەلەحيكايانىڭ بيۋدجەتى 250 ميلليون ا ق ش دوللارىن قۇرادى. تۋىندىدا 5 مىڭعا جۋىق اكتەر وينايدى. سونداي- اق، ءتۇسىرىلىم جۇمىستارىنا 5 مىڭعا جۋىق ات قاتىستىرىلدى. تاريحي درامانىڭ قويۋشى رەجيسسەرى - تسۋي سيۋ مين.
ءدال وسى تەلەحيكايا قۇبىلايحاننىڭ جاقىنى بولعان، اكەسىنىڭ ورنىن باسۋعا تالپىنعان بۇلىكشىلەردى باسقارعان ۇلىنا قارسى كۇرەسكە ۆەنەتسيادان جاس ماركو پولو كەلگەن كەزدەگى، باتىس پەن شىعىس اراسىنداعى العاشقى قاتىناستاردىڭ قالىپتاسۋى تۋرالى باياندايدى. ماركو پولو كەيىننەن يۋان يمپەرياسىنىڭ ءومىرىنىڭ سيپاتتاماسىن قالدىرعان. ماركو پولونىڭ بايانداۋىنىڭ اسەرىنەن قۇبىلايحان باتىستاعى ەرەكشە تانىمال تاريحي تۇلعاعا اينالىپ، ونىڭ اتى جاڭادان تانىلا باستادى.
درامالىق وقيعالارعا، ساراي ىشىندەگى شىتىرمان مەن زۇلىم نيەتتەرگە، تاق پەن جاڭا جەرلەرگە يەلىك ەتۋ ءۇشىن كەسكىلەسكەن ۇرىس پەن تارتىسقا تولى كوپ سەريالىق الەمدىك بەستسەللەردىڭ قازاقستانداعى پرەمەراسى «قازاقستان» ۇلتتىق تەلەارناسىندا ساعات 19.30 دا دۇيسەنبى مەن جۇما ارالىعىندا كورسەتىلەدى.
