قاشىقتىقتى قىسقارتقان ءىرى تەمىر جول جوباسى ىسكە قوسىلدى - فوتو رەپورتاج
پرەزيدەنت اۋقىمى بويىنشا بۇل ەكى جولدىڭ قۇرىلىسىن كەڭەستىك كەزەڭدەگى بايكال- امۋر ماگيسترالىنىڭ قۇرىلىسىمەن سالىستىرۋعا بولاتىندىعىن اتاپ ءوتتى. ك س ر و- داعى قۇرىلىستان ەرەكشەلىگى، قازاقستاندىق تارماق ىڭ- شىڭسىز سالىندى جانە جاقىن ورنالاسقان ايماقتاردىڭ عانا ەمەس، بارلىق قازاقستاننىڭ دامۋى ءۇشىن ستراتەگيالىق ماڭىزى زور.
«بۇگىندە ەكى بىردەي جاڭا تەمىر جول ماگيسترالىن اشىپ وتىرمىز. مۇنداي وقيعا تاريحىمىزدا العاش رەت ورىن الۋدا. «جەزقازعان- بەينەۋ» جانە «ارقالىق- شۇباركول» جولىنىڭ جۇمىسى ۇزاق جىلدار بويى بىرنەشە وڭىرلەر مەن بارلىق رەسپۋبليكانىڭ تىنىس- تىرشىلىگىن ايقىندايتىن بولادى» ، - دەدى ن. نازاربايەۆ.
ءوز كەزەگىندە، «قازاقستان تەمىر جولى» ۇلتتىق كومپانياسىنىڭ پرەزيدەنتى اسقار ءمامين تەمىرجولشىلار مەملەكەت باسشىسىنىڭ تەمىرجول قۇرىلىسىن سالۋ تاپسىرماسىن ەرەكشە قۇلشىنىسپەن قابىلداعانىن اتاپ ءوتتى.
«كولىك قۇرىلىسشىلارى اۋا رايىنىڭ قولايسىزدىعىنا قاراماستان، قىسقا مەرزىمدە قىرۋار جۇمىستى قىسقا مەرزىمدە اتقارىپ شىقتى» ، - دەدى ا. ءمامين.
شىنىندا دا وراسان جۇمىس اتقارىلدى، جۇزەگە اسقان بۇل ءىستىڭ ءمانىن تىلمەن ايتىپ جەتكىزۋ قيىن. اۋقىمدى كولىك جوباسىن سالۋ 2012 - جىلعى ماۋسىمدا باستالدى. قۇرىلىس اياسىندا 1200 شاقىرىم جول، 46 كوپىر مەن جول وتكەلى سالىندى، 570 سۋ وتكىزۋ پۋنكتتەرى جوندەۋدەن ءوتتى، 4200 شاقىرىمنان استام جەرگە ەلەكترمەن جابدىقتاۋ جەلىلەرى جۇرگىزىلىپ، باسقا دا وندىرىستىك ينفراقۇرىلىم نىساندارى قۇرىلدى.
«تاسىمالداۋ ءۇردىسىنىڭ تەحنيكالىق وپەراتسياسى 23 ستانسادا، 33 رازەزدە جۇزەگە اسىرىلادى. ونىڭ ىشىندە 6 جاڭارتىلعان ستانسالار - ارقالىق، شۇباركول، سەكسەۋىل، شالقار، بەينەۋ بار. ينفراقۇرىلىمدىق تەحنولوگيالىق بايلانىستار وزىق ساندىق ستاندارتتارعا نەگىزدەلگەن. جاڭا جەلىلەردى پايدالانۋ ءۇشىن 3,5 مىڭنان استام جاڭا جۇمىس ورنى قۇرىلادى، تۇرعىن ۇيمەن قامتاماسىز ەتىلىپ، الەۋمەتتىڭ ينفراقۇرىلىم نىساندارى سالىنادى.
جاڭا تەمىرجولدار «سولتۇستىك- وڭتۇستىك» جانە «شىعىس- باتىس» باعىتتارىندا جۇكتەر اعىنى مارشرۋتتارىن مىڭداعان شاقىرىمنان استام جولدا جانداندىرادى. جاڭا تەمىرجولدى ىسكە قوسۋ ازيادان رەسەي باعىتىنا جانە ازەربايجان، گرۋزيا، تۇركيا جانە وڭتۇستىك ەۋروپا باعىتىندا كاسپي ارقىلى ودان ءارى ەۋروپاعا، تۇركىمەنستان ارقىلى پارسى شىعاناعىنا شىعاتىن ترانس قازاقستاندىق كولىك ءدالىزىنىڭ ترانزيتتىك الەۋەتىن كۇرت ارتتىرادى.
