ەلباسى ماگيسترالدىڭ اشىلۋىن جىلدىڭ ەڭ ماڭىزدى الەۋمەتتىك- ەكونوميكالىق وقيعاسى دەپ اتادى
ستانسا باسشىلارى قازاقستان پرەزيدەنتىنە جاڭا جول قاتىناسىن پايدالانۋعا بەرۋگە دايىن ەكەنىن باياندادى، دەپ حابارلايدى اقوردانىڭ باسپا ءسوز قىزمەتى.
نۇرسۇلتان نازاربايەۆ «جەزقازعان- بەينەۋ» جانە «ارقالىق- شۇباركول» جاڭا تەمىرجول جەلىلەرىن سالتاناتتى جاعدايدا ىسكە قوستى.
بارشا قازاقستاندىقتاردى قۇتتىقتاعان ەل پرەزيدەنتى ماگيسترالدىڭ اشىلۋىن جىلدىڭ ەڭ ماڭىزدى الەۋمەتتىك- ەكونوميكالىق وقيعاسى دەپ اتادى.
- «جەزقازعان- بەينەۋ» جانە «ارقالىق- شۇباركول» جولى بىرنەشە ءوڭىر مەن بۇكىل رەسپۋبليكانىڭ تىرشىلىگىنە جان ءبىتىرىپ، ونداعان جىلدارعا العا جەتەلەيدى. ءبىز تاۋەلسىزدىكتىڭ بارلىق كەزەڭىندە تەمىرجول قۇرىلىسىن توقتاتقان جوقپىز، قايتا ۇدەتە تۇستىك، - دەدى نۇرسۇلتان نازاربايەۆ.
سونداي- اق مەملەكەت باسشىسى تەمىرجول قۇرىلىسىنا 10 مىڭنان استام ادام تارتىلعانىن، ەندى تاعى 3 مىڭ ادام تۇراقتى جۇمىسپەن قامتىلاتىنىن ايتتى.
- «جەزقازعان- بەينەۋ» جانە «ارقالىق- شۇباركول» تەمىرجولدارى جاپسارلاس اۋماقتاردىڭ دامۋىنا جاڭا سەرپىن بەرەدى. ونىڭ اسەرىن قاراعاندى، ماڭعىستاۋ، اقتوبە، قىزىلوردا جانە قوستاناي وبلىستارىنىڭ تۇرعىندارى مەن كاسىپورىندارى تىكەلەي سەزىنەتىن بولادى. اگرارلىق جانە ونەركاسىپتىك ونىمدەردى جەتكىزۋ مەرزىمى مەن قاشىقتىعىن قىسقارتۋدان بۇكىل قازاقستان ۇتادى، - دەدى پرەزيدەنت.
سونىمەن قاتار، مەملەكەت باسشىسى جاڭا تەمىرجولدار جەزقازعاننىڭ دامۋىنا وڭ ىقپالىن تيگىزەتىنىن، ەندى بۇل ءوڭىر رەسپۋبليكالىق جانە حالىقارالىق ماڭىزداعى ستراتەگيالىق باعىتتا بولاتىنىن اتاپ ءوتتى.
قازاقستان پرەزيدەنتى ەلدىڭ كولىك- لوگيستيكالىق الەۋەتىنىڭ ارتاتىنىنا توقتالدى.
- وسى تەمىرجول جەلىلەرىن ىسكە قوسۋ - سولتۇستىك- وڭتۇستىك جانە شىعىس- باتىس باعىتتارداعى جاھاندىق كولىك قىزمەتتەرى ءۇشىن دە ايتۋلى وقيعا. ءىس جۇزىندە ءبىز قىتايدان ەۋروپاعا جۇك جەتكىزۋ ۋاقىتىن ءۇش ەسەدەن اسا قىسقارتاتىن ترانزيتتىك ءدالىزدىڭ وزىمىزگە تيەسىلى بولىگىن جاسادىق. بۇل - مۇلدە جاڭا الەۋەت جانە ونى تولىعىمەن پايدالانۋ قاجەت، - دەدى مەملەكەت باسشىسى.
اشىلۋ ءراسىمى كەزىندە «قازاقستان تەمىر جولى» ۇك» اق پرەزيدەنتى ا. ءمامين قۇرىلىس جۇمىستارىنىڭ بارىسى مەن ونىڭ ەكونوميكالىق تيىمدىلىك كورسەتكىشتەرى تۋرالى باياندادى. سونداي- اق قازاقستانداعى «ارسەلور ميتتال» كومپانيالار توبىنىڭ ديرەكتورى ۆ. ماحاديەۆان، ەلدىڭ قۇرمەتتى تەمىرجولشىسى ا. سەلبايەۆ جانە ەڭبەك ارداگەرى ب. مىرزابەكوۆ ءسوز سويلەدى.
«جەزقازعان- بەينەۋ» جانە «ارقالىق- شۇباركول» تەمىرجولدارىنىڭ جالپى ۇزىندىعى 1200 شاقىرىمنان اسادى. «جەزقازعان- بەينەۋ» ماگيسترالىن ىسكە قوسۋ ورتالىق قازاقستاننان اقتاۋ پورتىنا، تۇرىكمەنستانمەن شەكاراعا دەيىن جانە پارسى شىعاناعى باعىتىندا ەڭ قىسقا تەمىرجول قاتىناسىن قۇرۋعا مۇمكىندىك بەرەدى. «ارقالىق- شۇباركول» تەمىرجول جەلىسى قازاقستاننىڭ ورتالىعىنان رەسەيگە، ودان ءارى باتىس ەۋروپا ەلدەرىنە شىعۋدى قامتاماسىز ەتەدى.
ماڭعىستاۋ وبلىسى بەينەۋ اۋدانىنىڭ بەينەۋ ستانساسىنان مەملەكەت باسشىسى نۇرسۇلتان نازاربايەۆپەن بولعان تەلەكوپىر بارىسىندا «بەينەۋ- شالقار» تەمىر جولىنىڭ جاڭا ۋاسكەسى ارقىلى العاشقى 3, 5 مىڭ توننا كۇكىرت ارتىلعان 41 ۆاگون قۇرامى جونەلتىلدى.
ۇزاقتىعى 292,5 شاقىرىم تەمىر جولدىڭ اتالمىش ۋچاسكەسى 1100 شاقىرىمدىق «بەينەۋ- جەزقازعان» جولىنىڭ بولىگى بولىپ تابىلادى. ەكى جىلدىڭ ىشىندە «تەمىرجول جوندەۋ» ج ش س ماماندارى سالعان جول قۇرىلىسىنىڭ قۇنى 108 ميلليارد تەڭگەنى قۇرادى. بۇل تەمىرجولدى پايدالانۋعا بەرۋ جۇك تاسىمالداۋ ۋاقىتىن قىسقارتادى، دەمەك كولىك شىعىستارى قۇنىن تومەندەتەدى.
«تەمىر جول ۋچاسكەسى ارقىلى جاڭا اۋىل ستانساسىنان «ارسەلورميتتال تەمىرتاۋ» ا ق- نىڭ قارا مەتالى جونەلتىلەتىن بولادى. بۇدان ءارى جۇك اقتاۋ حالىقارالىق تەڭىز پورتى ارقىلى يرانعا جەتكىزىلمەك. بۇل جۇك تاسىمالداۋ جولىن 494 شاقىرىمعا، كولىك شىعىستارىنىڭ سوماسىن 18 پايىزعا قىسقارتاتىن بولادى.
«كاستينگ» ج ش س دا قارا مەتالدى (بولات دايىندامالارىن) اقتاۋ پورتى ارقىلى پاۆلودار ستانساسىنان يرانعا جەتكىزەدى، سونداي- اق تەمىرجولمەن «بولاشاق» ستانساسى ارقىلى يرانعا تاسىمالدايدى. اتالمىش ج ش س- نىڭ جۇگىن تاسىمالداۋى 100 شاقىرىمعا قىسقارسا، كولىك شىعىستارى 3 پايىزعا كەميدى. سونداي- اق ءبىزدىڭ ۋچاسكەنى «دوستىق» حالىقارالىق تورابى ارقىلى قىتايعا قۇلسارى ستانساسىنان كۇكىرت جونەلتەتىن «تەڭىزشيەۆرويل» كومپانياسى دا تۇراقتى پايدالانا الادى. ازىرگە قۇرام 3,5 توننا تاسىمالدايدى، كەيىننەن ول 4,5 مىڭ تونناعا ۇلعايتىلادى» ، - دەپ اتاپ ءوتتى «قازاقستان تەمىر جولى» ۇ ك» ا ق ماڭعىستاۋ تەمىر جولى بولىمشەسىنىڭ ديرەكتورى ناجيمەدەن گۋباشيەۆ.
