قازاقستان ءمينيسترى قىتاي ەلشىسىن جەڭىپ كەتتى - فوتو - كەسكىن
شارانى «استانا ديپلوماتيالىق كورپۋسىنا قىزمەت كورسەتۋ باسقارماسى» ا ق مەن قىتاي حالىق رەسپۋبليكاسىنىڭ قازاقستان رەسپۋبليكاسىنداعى ەلشىلىگى ۇيىمداستىرىپ وتىر.
«مەن بۇگىن بارلىقتارىڭىزدى وسىناۋ سپورتتىق شارادا كورگەنىمە قۋانىشتىمىن. قازاقستاندا سپورتقا ەرەكشە نازار اۋدارىلادى. ەلىمىزدە ءىرى سپورتتىق شارالار وتكىزىلىپ، زاماناۋي سپورت سارايلارى سالىنۋدا. وزدەرىڭىز بىلەسىزدەر، 2017- جىلى قىسقى ۋنيۆەرسيادا وتەدى، سونىمەن قاتار ءبىز 2022- جىلى قىسقى وليمپيادانى وتكىزۋگە ۇمىتكەرمىز. سپورت بارشا الەم حالىقتارىن جاقىنداستىرادى، سوندىقتان دا ءبىز بۇگىن وسىندا تاعى دا ءبىر دوستىق قارىم-قاتىناسىمىزدى نىعايتا ءتۇسۋ ءۇشىن جينالىپ وتىرمىز»، - دەپ اتاپ ءوتتى ءتۋرنيردى اشقان ق ر سىرتقى ىستەر ءمينيسترى ەرلان ىدىرىسوۆ.
«بۇل ءتۋرنيردىڭ ماقساتى - سالاۋاتتى ءومىر سالتىن ناسيحاتتاۋ، سونداي-اق استانادا قىزمەت ەتىپ جاتقان ديپلوماتيالىق كورپۋستاردىڭ دوستاسىپ، ءوزارا ءتىل تابىسۋى. قىستا ءبىز بارلىعىمىز بىرگە شاڭعى تەبەمىز، ال جازدا فۋتبول جانە باسقا دا سپورت تۇرلەرىمەن شۇعىلدانامىز.
بۇگىن ۇستەل تەننيسىنەن تۋرنير وتكىزۋدى دۇرىس دەپ شەشتىك. بۇل سپورت ءتۇرى قىتايدا وتە جاقسى دامىعان. سىزدەردىڭ ەلدەرىڭىزدە دە تەننيسكە قىزىعۋشىلار وتە كوپ. سوندىقتان تۋرنير قىزىقتى بولىپ وتەدى دەپ ويلايمىن»، - دەپ اتاپ ءوتتى ءوز كەزەگىندە قىتاي حالىق رەسپۋبليكاسىنىڭ قازاقستان رەسپۋبليكاسىنداعى ەلشىسى لە يۋيچەن.
وسىدان كەيىن مينيستر شارانى اشۋ ءراسىمى رەتىندە ق ح ر ەلشىسى لە يۋيچەنمەن ۇستەل تەننيسىن وينادى. قىزىقتى دا تارتىستى وتكەن ويىندا ەكى ۇپاي ارتىق جيناعان ق ر سىرتقى ىستەر ءمينيسترى جەڭىسكە جەتتى.
ايتا كەتەيىك، تۋرنيرگە قازاقستاندا اككرەديتتەلگەن 15 شاقتى شەتەلدىك ەلشىلىكتەردەن 20 دان استام كوماندا قاتىستى. سايىسكەرلەر 14 توپقا ءبولىنىپ، ءوزارا مىقتىلاردى انىقتادى. جەڭىمپاز كوماندانىڭ اتى كەشكە قاراي بەلگىلى بولادى.
