شىعىس قازاقستان حالقىنىڭ ءومىر ءسۇرۋ دەڭگەيى كوتەرىلدى
بۇل تۋرالى بۇگىنگى وتكەن بريفينگتە ش ق و ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ەلەنا ياسينسكايا ءمالىم ەتتى، دەپ حابارلادى اقپارات ورتالىعى.
ەلەنا ياسينسكايانىڭ ايتۋىنشا، الەۋمەتتىك سالادا جاقسارعان ەڭ ماڭىزدى كورسەتكىشتەردىڭ ءبىرى وڭىردە ادام جاسىنىڭ ۇزاقتىعىن ۇلعايتۋ بولىپ تابىلادى، بۇگىندە ورتاشا كورسەتكىش 68-69 جاستى قۇرايدى. تۋۋ كورسەتكىشتەرى دە ۇلعايدى. ءبىرىنشى جارتىجىلدىقتا ش ق و- دا 11421 نارەستە دۇنيەگە كەلدى، بۇل وتكەن جىلدىڭ وسى كەزەڭىمەن سالىستىرعاندا، 5 پايىزعا جوعارى. باسقارما باسشىسى اتاپ وتكەندەي، بۇل حالىق سەزىنە باستاعان تۇراقتىلىقتى بىلدىرەدى. حالىق ەرتەڭگى كۇنگە سەنىممەن قارايدى، وتباسىلارىن تولىقتىرۋدان قورىقپايدى.
سوڭعى دەرەكتەرگە سۇيەنسەك، شىعىس قازاقستاندىقتاردىڭ وتباسىندا 145 مىڭ مەكتەپكە دەيىنگى مەكەمە جاسىنداعى بالالار مەن 167 مىڭ وقۋشى تاربيەلەنۋدە. وبلىستا 32 مىڭنان استام ستۋدەنت ءبىلىم السا، 29 جاسقا دەيىنگى 160 مىڭنان استام جاستار جۇمىسپەن قامتىلعان.
«14 تەن 29 جاسقا دەيىنگى جاستار وبلىس حالقىنىڭ 25 پايىزىن قۇرايدى، - دەدى ول. بۇل ەڭبەك جانە زياتكەرلىك رەسۋرستاردىڭ اۋقىمدى الەۋەتى. تىركەلگەن جۇمىسسىزدار سانى ەكونوميكالىق بەلسەندى حالىقتىڭ سانىندا 4,8 پايىزعا دەيىن تومەندەدى. مۇندا جۇمىسسىزدىقپەن كۇرەس شاراسىنىڭ ىقپالى زور بولدى: بوس ورىن جارمەڭكەلەرى، قوعامدىق جۇمىس ۇيىمداستىرۋ باعدارلامالارى، قالا مەكەمەلەرىندەگى جاستار تاجىريبەسى، كاسىبي وقىتۋ كۋرستارىن ۇيىمداستىرۋ قولعا الىندى.
«ارينە، ەكونوميكالىق دامۋدىڭ ەڭ ماڭىزدى ناتيجەسى، ەڭ وڭدى ءساتى وبلىس حالقىنىڭ ءومىر ءسۇرۋ دەڭگەيىن ارتتىرۋ بولىپ تابىلادى» ، - دەپ اتاپ ءوتتى ەلەنا ياسينسكايا، - سونىمەن، وبلىس بويىنشا ورتاشا جالاقى 93,7 مىڭ تەڭگە، وتكەن جىلمەن سالىستىرعاندا، ناقتى اۋدارىم 8,3 پايىزعا ارتتى. تۇتاستاي حالىق تابىسى 7,2 پايىزعا ءوستى، ول 55,9 مىڭ تەڭگەگە جەتتى.
ءوز كەزەگىندە تابىستاردىڭ ءوسۋى تۇتىنۋ نارىعىندا ساتىلىم كولەمدەرىن ارتتىرىپ، بولشەك ساۋدا تاۋار اينالىمىن ۇلعايتتى، بۇل بيۋدجەتكە دە جاقسى اسەر ەتتى.
بيۋدجەتتىڭ بار قاراجاتى وبلىس ەكونوميكاسىنىڭ بارلىق سالالارىن، اسىرەسە الەۋمەتتىك سالانى، دەنساۋلىق ساقتاۋ مەن ءبىلىم بەرۋدى قارجىلاندىرۋدى ۇلعايتۋدى قامتاماسىز ەتۋگە مۇمكىندىك تۋعىزادى.
