ساۋساق اسپاندى كورسەتسە، ناقۇرىس ساۋساققا قارايدى - توسىن ويلار تىزبەگى
كينونى ءبارى كورەدى. بىرەۋ وقيعا قۋالايدى، بىرەۋ ساياسات تابادى. قاتىگەزدىك تە، مەيىرىم دە بار وندا. ىزدەگەنىڭ تابىلادى. ونىڭ تاپتىرماس قۇرال بولاتىنى دا سوندىقتان.
ءاسىلى، كەز- كەلگەن نارسەدە اقيقاتتىڭ ۇلەسى بولماسا، ول قابىلدانبايدى، بولمىسپەن قابىسپايدى. كينودا اقيقات تا ايتىلادى. اسىرەسە، ديالوگتاردا. مۇنداعى اقيقات دەپ وتىرعانىمىز - جاراتىلىس زاڭدارىن ءدوپ باسقان، ادام بولمىسىنىڭ ۇستىنەن تۇسەتىن، ءارى تاپقىر، ءارى توسىن ويلار تىزبەگى.
ءوزىمىز كورگەن كينولاردان ءتۇرتىپ العانىمىز بار، اعىلشىنشاسى بار، ورىسشاسى بار، ءبىرقاتار اقپارات كوزدەرىنەن ارشىپ العانىمىز بار - تومەندە سونداي ەرەكشە سيتاتالاردىڭ ءبىر پاراسىن جيناقتاپ، اۋدارىپ، نازارلارىڭىزعا ۇسىنىپ وتىرمىز.
بۇل ومىردە بارلىق ىستەگەن ءىسىڭنىڭ، جاساعان تاڭداۋىڭنىڭ سالدارى بولادى. سەن تاڭداۋ جاساپ جاتاسىڭ، سول ساتتە تاڭداۋلار سەنى جاساپ جاتادى. (بايكەرلەر)
باستاۋى بولعان نارسەنىڭ سوڭى دا بولادى. (بەتمەن: باستاۋ)
قورىقپا، بالام. ءولىم دەگەن - ءومىردىڭ ءبارى باستان وتكىزۋى ءتيىس ءبىر بولىگى عانا. (فورەست گامپ)
كەيدە ءوزىڭ ايىرىلىپ قالۋدان قاتتى قورقاتىن نارسەلەردىڭ جوعالۋىنا جول بەرىپ، ءوزىڭدى جاتتىقتىرعان دۇرىس. (جۇلدىزدار سوعىسى)
ەكى تىشقان كىلەگەيگە ءتۇسىپ كەتىپتى. ءبىرىنشى تىشقان ولگەن جەرىم وسى دەپ ويلاپتى دا، ىدىستىڭ تۇبىنە باتىپ ءولىپتى. ەكىنشىسى بەرىلگىسى كەلمەي تىرباڭداي بەرىپتى. اقىرىندا توقتاۋسىز شايقالعان سۇيىق كىلەگەي قويۋ مايعا اينالىپتى دا، الگى تىشقان امان قالىپتى. (راتاتۋي)
ءار كۇندى ءوزىنىڭ ماقساتىمەن باستا. (كۇزگى ءتۇس)
ماقساتىمىز بولماسا، ءبىز دە بولماس ەك. (ماتريتسا)
نە ىستە، نە ىستەمە. كورەيىن دەگەن ءسوز جوق! (جۇلدىزدار سوعىسى)
كەزدەيسوقتىقتار كەزدەيسوق ەمەس! (كۋڭ فۋ پاندا)
- فورەست، وسكەندە كىم بولاتىنىڭدى شەشتىڭ بە؟
- مەنىڭ كىم بولاتىنىمدى ما؟
- ءيا.
- سوندا مەن ءوزىم بولمايمىن با؟ (فورەست گامپ)
ءومىر دەگەن كامپيتتىڭ قورابى ءتارىزدى - ساعان قاندايى تۇسەتىنىن ەشقاشان بىلمەيسىڭ. (فورەست گامپ)
ءيتتىڭ ادامنان ايىرماسى، ولار «كۇل بولماساڭ، ءبۇل بول" دەگەن ءسوزدى بىلمەيدى. (اقتۇتەك)
توقتاي الاتىن كەزدە، توقتاعىڭ كەلمەيدى؛ ال توقتاعىڭ كەلگەندە، توقتاي المايسىڭ. (كەندي)
ءومىر - ۇلكەن سىي، ونى بۇگىن باعالاۋ كەرەك، ويتكەنى ەرتەڭ نە بولاتىنىن بولجاۋ مۇمكىن ەمەس. ءومىر قانداي، ونى سول قالپىمەن قابىلداعان دۇرىس. سۇرىلگەن ءار كۇن ماڭىزدى... (تيتانيك)
ۇنسىزدىك - ەڭ قاتتى داۋىس. ء(ومىر كەرەمەت)
ءبىر نارسە ەسىڭدە بولسىن، بالام. الەمدە ەكى- اق ءتۇرلى ادام بار. جاقسىلىق ىستەيتىندەر، ياعني، جاقسى ادامدار جانە جاماندىقپەن اينالىساتىندار، ياعني، جامان ادامدار. وسى ادامدار اراسىنداعى جالعىز ايىرما. ودان باسقا ايىرما جوق. (مەنىڭ اتىم - حان)
ءبارى ولەدى، ءبىراق ءبارى بىردەي ءومىر سۇرمەيدى. (باتىل جۇرەك)
ۋاقىتتى ىسىراپ ەتپە. ويتكەنى ۋاقىت - ءومىردى جاسايتىن ماتەريال. (جەل اكەتكەندەر)
ءبىلىپ قوي، تاۋەلسىزدىك دەگەن اقشا تۇرادى. (شيندلەردىڭ ءتىزىمى)
- شىن ايتام، كارلسون، باقىت دەگەن بالكۇلشەدە ەمەس...
- دەنىڭ ساۋ ما ءوزى؟ باسقا نەدە سوندا؟ (شاتىردا تۇراتىن كارلسون)
بىرەۋدىڭ قولىڭنان كەلمەيدى دەگەنىن تىڭداۋشى بولما. ءتىپتى، مەنىڭ دە. ۇقتىڭ با؟ ارمانىڭ بار ما، قورعا. ادەتتە الدەنەگە ءالى كەلمەيتىن ادامدار "سەن دە جاساي المايسىڭ" دەپ سەنى دە سەندىرۋگە تىرىسادى. ماقسات قويدىڭ با، جەت. نۇكتە! (باقىت جولىندا)
ءوز وتباسىن ۇمىتقان ەركەك - ەركەك ەمەس. (وكىل اكە)
ءبىر نارسەنىڭ سوڭىنا جەتسەڭ، باسىن ويلاي باستايسىڭ. (ميستەر جانە ميسسيس سميت)
كەيدە جەڭەسىڭ، ءبىراق جەڭىلەسىڭ. كەيدە جەڭىلەسىڭ، ءبىراق جەڭەسىڭ. (ارماندار قايدا اپارادى)
ءومىر سۇرە بىلىڭدەر. ءولۋ ءبارىنىڭ قولىنان كەلەدى. (تراسسا 60)
ءبىز جاقسىلىق ارقىلى قاستاندىق جاسايمىز، بۇل - ءبىزدىڭ ستراتەگيامىز. (ءىبىلىستىڭ ادۆوكاتى)
مسە، ساۋساق اسپاندى كورسەتسە، ناقۇرىس ساۋساققا قارايدى. (امەليا)
ەكى ەسە جارىق وت ەكى ەسە جىلدام جانادى. (ۇستارانىڭ جۇزىمەن جۇگىرگەن جان)
كىشكەنتاي وتىرىك ۇلكەن كۇمان تۋدىرادى. (كوكتەمنىڭ ون جەتى ءساتى)
بارلىق اقىلگويلەرگە ءتان كلاسسيكالىق قاتەلىككە ۇرىنا كورمە: ول - مەنەن اسقان اقىلدى ادام جوق دەپ ويلاۋ. (تۇنەك مەكەنى)
داڭققۇمارلىق - مەنىڭ ەڭ سۇيىكتى كۇنالارىمنىڭ ءبىرى. ويتكەنى ول سونداي فۋندامەنتالدى. ال وزىمشىلدىك - تابيعي ەسىرتكى. (ءىبىلىستىڭ ادۆوكاتى)
ءتاجدى كيگىسى كەلەتىن ادام ونىڭ سالماعىنا دا شىداۋ كەرەك. (مۇراگەرلەر)
بۇگىنگە وسى. ءبىزدىڭ وقىرماندار اراسىندا نەبىر كينوماندار بار ەكەنىنە كۇمان كەلتىرمەيمىز. ەرەكشە كينوتسيتاتالار بىلسەڭىزدەر، ءبولىسىپ، اۋدارمادا، تۋىندى اتاۋلارىنىڭ قازاقشا بالاماسىندا اقساعان تۇسىمىز بولسا، تۇزەپ جىبەرىپ، ماتەريالدىڭ كەلەسى سەرياسىنا سەپتەسسەڭىزدەر ەكەن...
«جاقسى» ۇلتتىق پورتالى
