پايعامبارىمىزدىڭ (س. ا. س.) حريستياندارعا جازعان حاتى تابىلدى
باعا جەتپەس وسىناۋ جادىگەردە حريستيانداردىڭ قاۋىپسىزدىگىن قامتاماسىز ەتۋ، نانىم-سەنىم بوستاندىعىنا قول سۇقپاۋ ت. ب. قاداۋ-قاداۋ ماسەلەلەر قوزعالعان. وسى ماسەلەلەرگە قاتىستى مۇسىلمانداردىڭ مىندەتتەرى مەن جاۋاپكەرشىلىگى دە ايتىلعان. جادىگەردىڭ شىنايىلىعى وسمانلى سۇلتانى ءبىرىنشى ءسالىمنىڭ تۇسىندا راستالعان. قولجازبا سول ۋاقىتتا كونستانتيپول قالاسىنداعى كىتاپ ساقتاۋ قويماسىندا بولعان ەكەن.
حاتتىڭ مازمۇنى بىلاي: «بۇل حات مۇحاممەد يبن ابدۇللادان. ءبىز، اللانىڭ قۇلدارى، انسارلار جانە ءبىزدىڭ سوڭىمىزدان ەرۋشىلەر، حريستيانداردى، بىزدەن مەيلى الىس، مەيلى جاقىن بولسىن، ءوزىمىزدىڭ قورعاۋىمىز بەن قامقورلىعىمىزعا الامىز. حريستياندار - ءبىزدىڭ قامقورلىعىمىزدا!
اللانىڭ اتىمەن انت ەتەمىن، مەن ولاردى الاڭداتاتىن، تىنىشتىعىن بۇزاتىن نارسەلەلەرگە جول بەرمەيمىن. سوتتارى ءوز قىزمەتتەرىندە قالادى، ءدىني قىزمەتكەرلەرى شىركەۋلەرىنەن قۋىلمايدى. ەشكىمگە عيباداتحانالارىن بۇزۋعا، ونداعى مۇلىكتەرىنە قول سۇعۋعا، ۇيلەرىنە تاسۋعا رۇقسات بەرمەيمىن. ەگەر كىم دە كىم بۇل ايتىلعان تالاپتاردى بۇزاتىن بولسا، ول اللا تاعالامەن كەلىسىمدى بۇزعانى جانە ونىڭ پايعامبارىنا بويۇسىنباعانى.
اقيقاتىندا، ولار (حريستياندار) مەنىمەن كەلىسىمگە وتىرعان، ال مەنىڭ مىندەتىم ولارعا ءبىزدىڭ تاراپىمىزدان ءزابىر كورسەتپەۋ. ەشكىمگە ولاردى ءوز ۇيلەرىنەن شىعارىپ جىبەرۋگە، سوعىسۋعا مىندەتتەۋگە رۇقسات جوق. كەرىسىنشە، مۇسىلماندار ولاردى قورعاۋ ءۇشىن سوعىسۋعا مىندەتتى.
ەگەر مۇسىلمان حريستيان ءبىر قىزعا ۇيلەنۋدى قالاسا، ولاردىڭ كەلىسىمىمەن عانا نەكەلەسۋى ءتيىس جانە مۇسىلمان كۇيەۋ ايەلىنىڭ شىركەۋدى زيارات ەتۋىنە تىيىم سالماسىن. شىركەۋلەرگە قۇرمەت كورسەتىلۋى ءتيىس، ونى وزگەرتۋگە نەمەسە بۇزۋعا ەشكىمنىڭ قاقىسى جوق. قيامەت كۇنىنە دەيىن يسلام ۇمبەتى مۇشەلەرىنىڭ ەشقايسىسىنا بۇل كەلىسىمدى بۇزۋعا رۇقسات جوق».
islam.kz
