ىستامبۇلدى تىكۇشاقپەن تاماشالاۋعا بولادى
قالاعا قىدىرىپ كەلگەن مەيماندار ىستامبۇلدىڭ كورنەكتى جەرلەرىنە اۆتوبۋس جانە كەمەمەن عانا ەمەس، ەندى تىكۇشاقپەن دە ساياحاتتاي الادى.
بەس عاسىرعا جۋىق وسمان يمپەرياسىنىڭ استاناسى بولىپ، يسلام وركەنيەتىنىڭ ورتالىعى ەسەپتەلگەن تاريحي شاھاردى اۋەدەن تاماشالاۋعا نيەت بىلدىرۋشىلەردىڭ قاراسى كوپ. ويتكەنى ساياحات بارىسىندا سۇلتان احمەت مەشىتى، اياسوفيا مۇراجايى، دولماباحچە سارايى مەن قىز مۇناراسى سىندى تاريحي عيماراتتاردىڭ ۇستىنەن قالىقتاپ ۇشىپ، قوس قۇرلىقتى كەسىپ ءوتۋ باعىتى كوپشىلىكتىڭ قىزىعۋشىلىعىن ارتتىرىپ وتىر.
باس- اياعى 15 مينۋتتى قۇرايتىن تىكۇشاق ساياحاتىنىڭ قۇنى - ءار جولاۋشىعا 12 مىڭ تەڭگە. قوسىمشا اقىعا ۋاقىتىن ۇزارتىپ، ساياحات باعىتىن تاڭداۋعا بولادى.
كەمال سيۋلەر، قىزمەت كورسەتۋ كومپانياسىنىڭ پرەزيدەنتى:
- ءبىزدىڭ كومپانياعا اۋە ساياحاتىن ۇيىمداستىرۋ بويىنشا كوپتەگەن ۇسىنىستار كەلىپ ءتۇستى. حالىقتان سۇرانىس بولعان سوڭ قىزمەت كورسەتۋگە بەل بۋدىق. جۇمىسىمىز العا باسارىنا سەنىمدىمىز. ويتكەنى جاۋاپتى ىسكە كىرىسپەس بۇرىن باعا ساياساتىن زەرتتەپ، ساياحاتتىڭ قۇنىن حالىققا بارىنشا قولجەتىمدى ەتۋگە تىرىستىق.
