ايەلىنەن اجىراسقان جىگىتتىڭ اقىلدارى

انىعىندا بۇل 20 كەڭەس ءوزى اجىراسىپ تىنعان دجەرالد رودجەرستەن. ارينە، ءوزى اجىراسىپ تىنعان ادام قانداي ساليقالى وي ايتسىن دەپ ويلايتىن شىعارمىز؟ ءبىراق وزگەنىڭ قاتەلىگىنەن ساباق الۋ دەگەن دە بار ەمەس پە؟ ەندەشە ءوز باقىتىن قولدا باردا باعالاي الماعان جاننىڭ سوزىنە نازار اۋدارىڭىز.

ايەلىڭىزدى قىز كەزىندەگىدەي كۇتىڭىز

ءوز ايەلىڭىزبەن بىرگە قانشا جىل بىرگە تۇرساڭىز دا ونى كەزدەسۋلەرگە شاقىرۋدان شارشاماڭىز. ايەلىڭىزدىڭ سىزگە جاساپ جاتقان جاقسىلىعى مەن قۇرمەتىنىڭ مىندەتتى ءىس ەمەس ەكەنىن ۇعىڭىز. ونىڭ «ءيا» دەگەن ءسوزىن الماس بۇرىن ءسىز وعان دۇنيەدەگى بار باقىتتى سىيلايتىنىڭىزدى، ولە-ولگەنشە قورعانى بولاتىنىڭىزدى ايتقانسىز، ەسىڭىزدە مە؟ ول سىزگە ەڭ ءبىر قىمباتتىسىن سىيعا تارتتى - سەنىمىن. سوندىقتان سۇيۋگە، جاقسى كورۋگە ەش ۋاقىتتا ەرىنبەڭىز.

قورعانى بولىڭىز

سۇيىكتىڭىزدىڭ جۇرەگىن قالاي قورعاساڭىز، ءدال سولاي ءوزىڭىزدىڭ دە جۇرەگىڭىزدى قورعاي ءبىلىڭىز. ءسىز وزگەلەردى، ءتىپتى الەمدى جۇرەگىڭىزگە سىيدىرۋىڭىز مۇمكىن. ءبىراق سول جۇرەكتىڭ ءبىر تۇكپىرىندە ايەلىڭىزدەن باسقا ەشكىم دە بولمايتىن جەر سايلاپ الىڭىز.

ايەلىڭىزگە قايتا-قايتا عاشىق بولا ءتۇسىڭىز

بارلىق ادام وزگەرىپ كەتۋى مۇمكىن. بىرنەشە جىل بۇرىنعى ءسىز بەن قازىرگى «ءسىز» بىردەي ەمەس. ال بەس جىلدان سوڭ تاعى دا وزگەرە تۇسەسىز. وزگەرىستەر اركىمدە-اق بولىپ تۇرادى. وسى سەبەپتى ءبىر-ءبىرىڭىزدى قايتا-قايتا جاقسى كورىپ تۇرۋلارىڭىز كەرەك. ەگەر بۇلاي جاساماساڭىز سۇيىكتىڭىزدىڭ جۇرەگى ءسىز ءۇشىن جابىلىپ، وزگە بىرەۋ ءۇشىن ماڭگىگە اشىلۋى دا مۇمكىن. بۇل ءارى قالىپتى جاعداي. ونى جاقسى كورۋدەن تالماڭىز. ءوز ماحابباتىڭىز ءۇشىن كۇرەسۋدەن شارشاماڭىز.

ونىڭ تەك جاقسى قاسيەتتەرىن كورىڭىز

ءوز ايەلىڭىزدىڭ قانداي جاقسى قاسيەتتەرى بار بولسا، وعان سول قاسيەتتەر ارقىلى مىنەزدەمە جاساپ الىڭىز. وسى جولمەن عانا ماحابباتىڭىزدى جانداندىرا الاسىز. ءاربىر ادامدا كەزدەسەتىن مىندەرگە نازار اۋدارا بەرەتىن بولساڭىز ماحاببات بىرتە-بىرتە وشە بەرەدى. ايەلىڭىزدى نە ءۇشىن جاقسى كورەتىنىڭىز جايلى ويلانىڭىز. سوندا ءسىز ومىردەگى ەڭ باقىتتى ادام ەكەنىڭىزگە ەش كۇمان-كۇدىك تاپپايتىن بولاسىز. سوندا عانا ءسىز الەمدەگى ەڭ كەرەمەت ايەلمەن قوسىلعانىڭىزدى سەزىنەسىز.

ونى وزگەرتۋگە تالپىنباڭىز

ءسىزدىڭ باستى ماقساتىڭىز ايەلىڭىزدى وزگەرتۋ ەمەس، ءوزى قانداي بولسا سول قاسيەتتەرىمەن-اق سۇيۋگە ۇمتىلۋ. ال ەگەر ول وزگەرىپ كەتسە، سول وزگەرگەن ايەلىڭىزگە عاشىق بولىڭىز.

ءوز ەموتسياڭىزعا جاۋاپ بەرىڭىز

ءسىزدىڭ ايەلىڭىز ءسىزدى باقىتتى ەتۋگە مىندەتتى ەمەس. ءسىزدىڭ كوڭىل-قوشىڭىزدىڭ بولماي وتىرعانىنا دا ول كىنالى ەمەس. ءسىز ءوزىڭىز باقىتتى بولۋعا ۇمتىلۋىڭىز كەرەك، ونىمەن قوسا قارىم-قاتىناستارىڭىزدى دا جارقىن ەتە ءتۇسۋ ءسىزدىڭ قولىڭىزدا.

ايەلىڭىزدى ەشقاشان ايىپتاماڭىز

ايەلىڭىز ءسىزدىڭ كوڭىل-كۇيىڭىزدى تۇسىرسە نەمەسە اشۋلاندىرسا ونى ەشقاشان ايىپتاۋشى بولماڭىز. ەگەر ءسىزدىڭ كوڭىلىڭىز تۇسىڭكى بولسا، ونىڭ ايتقان ءسوزىن كوتەرە الماساڭىز، ول ءسىزدىڭ عانا ەموتسياڭىز. مۇمكىن ول ءسىزدى بايقاماي، ويدا-جوقتا رەنجىتىپ العان شىعار. ءوز ايەلىن سۇيگەن ادام ەشقاشان دا سول سۇيىكتىسىنىڭ جاماندىققا قيمايتىنىن بىلەدى. سول ءۇشىن ءوزىڭىزدىڭ ەموتسياڭىزدى قالىپقا كەلتىرىڭىز، ماسەلەنىڭ نەدەن شىعىپ وتىرعانىن اسىقپاي بايىپتاڭىز. قاتەلىكتىڭ كىمنەن بولعانى ەمەس، سول قاتەلىكتى كەشىرە الماعان ءوزىڭىزدىڭ كەلبەتىڭىزگە سىرتتاي باعا بەرەتىن بولساڭىز ءوز ۇستىڭىزدەن ءوزىڭىز كۇلەتىن بولاسىز. ءارى مايدا-شۇيدەگە رەنجىمەيتىن قاسيەت تاباسىز.

ءوزى قانداي بولسا، سونداي بولۋىنا رۇقسات ەتىڭىز

ايەلىڭىزدىڭ كوڭىلى الدەنەگە تولماي وتىرسا، بىردەن ءمان-جايعا ارالاسىپ، جاعدايدى تۇزەۋگە كۇش سالماي-اق قويىڭىز. ءسىزدىڭ ماقساتىڭىز ونى قاجەت كەزدە قولداي الاتىنىڭىزدى، تۇسىنەتىنىڭىزدى، كومەككە كەلەتىنىڭىزدى ۇعىندىرۋ. قىز بالالار ءارقاشان كوڭىل-كۇيگە بەيىم تۇرادى. جانە ولاردىڭ كوڭىل-كۇيلەرى تەز وزگەرەدى. ەگەر ونىڭ قىلىقتارىن سىناپ-مىنەمەيتىن بولساڭىز ول سىزگە شىن مانىندە سەنە الاتىن بولادى. سىرىن اقتارادى. ءبىراق ول قيىندىققا ۇرىنسا ونى جالعىز قالدىرۋعا بولمايدى. ول ءسىزدىڭ بارىڭىزدى ءبىلسىن. سول ءۇشىن ونى تىڭداي ءبىلىڭىز، سەزىمىن باعالاي ءبىلىڭىز.

اقىماق بولىپ كورىنۋگە قورىقپاڭىز

ءارقاشان قالىڭ قاباقتى، كۇلمەيتىن ادام سياقتى بولماڭىز. كۇلىڭىز. ونى دا كۇلدىرە ءبىلىڭىز. كۇلكى ءومىردى وڭايلاتادى.

كۇن سايىن ونىڭ جانىنا ازىق بولىڭىز

ايەلىڭىز سويلەيتىن ماحاببات ءتىلىن تۇسىنۋگە تىرىسىڭىز. ول ءوزىنىڭ ماڭىزدى، قالاۋلى ەكەنىن ءتۇسىنۋى ءۇشىن ءبارىن دە جاساڭىز. بۇل ماسەلە قيىن بولسا، ايەلىڭىزدەن ءوزىن باقىتتى ەتەتىن 10 نارسەنى جازىپ بەرۋىن ءوتىنىڭىز. جازىپ بەرگەن ءتىزىمنىڭ، ەڭ بولماعاندا، ەكەۋىن كۇن سايىن ورىنداپ وتىرىڭىز.

ونىڭ جانىنان تابىلىڭىز

وعان تەك ۋاقىتىڭىزدى عانا ەمەس، نازارىڭىزدى دا، جانىڭىزدى دا سىيلاڭىز. ونىمەن بىرگە بولۋ ءۇشىن ءبارىن دە جاساڭىز. ومىرىڭىزدەگى ەڭ ماڭىزدى ادامىڭىز ەكەنىن ءتۇسىنىڭىز. الدە ولاي ەمەس پە؟

ونى قالاڭىز

ونى بار جان-تانىڭىزبەن قالايتىنىڭىزدى كورسەتىڭىز، قۋاتىڭىز بەن كۇشتىلىگىڭىز ارقىلى ونىڭ سەزىم تۇكپىرلەرىنە ساياحات جاساڭىز. ايەلىڭىز ءوزىن تولىققاندى ايەل ەكەنىن ۇعاتىنداي بولسىن.

توپاس بولماڭىز!

اقىلسىز بولىپ كورىنۋگە بولادى، ءبىراق توپاس بولماعانىڭىز ابزال. سەبەبى ءسىز دە ادامسىز، سايكەسىنشە ءسىزدىڭ دە قاتەلىكتەرىڭىز بولىپ تۇرادى. سول ءۇشىن قاتەلىكتەردى بارىنشا ازايتۋعا تىرىسىڭىز. ودان ساباق الۋدى دا ۇمىتپاڭىز. ءمىنسىز بولا المايسىز، ءبىراق سول مىندەرىڭىزدى ازايتۋ ءسىزدىڭ قولىڭىزدا.

وعان جەكە كەڭىستىك بەرىڭىز

ايەلگە ءوز ىسىمەن، ءوز قىزىعۋشىلىعىمەن اينالىسۋعا ۋاقىت بەرىڭىز. ايەلگە ءوزىن رۋحاني بايىتاتىن، وزىمەن ءوزى بولا الاتىن جاعداي تۋدىرۋ كەرەك. ەگەر ونىڭ بار وي-ارمانى مەن ماقساتتارى جۇزەگە اسسا ول سىزگە العىس ايتاتىن بولادى.

السىزدىگىڭىزدى جاسىرماڭىز

ءوز قورقىنىشتارىڭىز بەن سەزىمدەرىڭىزدى وعان ايتۋعا قورىقپاڭىز. مۇنىمەن قاتار، قاتەلىكتەرىڭىزدى مويىنداۋدان دا قاشپاڭىز.

اشىق بولىڭىز

سەنىمگە قۇرىلعان قارىم-قاتىناس جاساعىڭىز كەلسە قۇپياڭىزدى اشىڭىز. ءتىپتى ەڭ ءبىر قۇپيا دەپ تاپقان سىرىڭىزدى دا ونىمەن ءبولىسىڭىز. قۇپيانى اشقان سوڭ ونىڭ ىشىندەگى سىرلارىڭىز ايەلىڭىزگە ۇناۋ-ۇناماۋى بەيمالىم. ءبىراق وعان دەگەن سەنىمىڭىز بولسا ءسىز بۇل ىسكە تاۋەكەل ەتەسىز. بەت-پەردەنى شەشىپ تاستاڭىز! ەگەر الدەنەنى ءومىر-باقي جاسىرامىن دەسەڭىز ماڭگىلىككە ماحابباتتىڭ نە ەكەنىن ۇقپاي كەتەسىز.

دامۋدى توقتاتپاڭىز

ءبىر ورىندا تۇرىپ قالعان سۋ ءولى سۋ، ال اعىن سۋ ءارقاشان تازا بولادى. ال بۇلشىق ەتتەرىڭىزدى جۇمىس ىستەتپەسەڭىز ولار سولىپ قالادى. ءدال وسى قۇبىلىس ادامداردىڭ قارىم-قاتىناسىندا دا بار. ورتاق ماقساتتارىڭىز بەن ارماندارىڭىزدى تابىڭىزدار. ءبىر باعىتقا قاراۋعا ۇيرەنىڭىزدەر.

اقشا جايلى ۋايىمداماڭىزدار

اقشا - بۇل ويىن ساتىندە ويدا جوقتا ءتۇسىپ قالاتىن بينگو سەكىلدى. سول ءۇشىن بۇل ويىندا كوبىرەك ۇتىس الۋ ءۇشىن بىرگە ويناپ ۇيرەنىڭىزدەر. ءبىر كومانداداعى ويىنشىلار ءبىر-بىرىنە قارسى ويناسا بۇل جاقسىلىققا اپارمايدى.

وكپەنى ىشتە ساقتاماڭىزدار

وتكەندى ەزە بەرگەنشە، بولاشاققا قاراپ باعدار تۇزەڭىز. وتكەن شاقتىڭ رەنىشىنە قامالىپ قالماي، العا قاراي ءجۇرىپ كەتىڭىز. وكپە-رەنىش كەمەنىڭ زاكىرى سياقتى. ول سىزدەردىڭ ومىرلەرىڭىزدى العا قاراي جىبەرمەي تۇرىپ الادى. بوستاندىق تەك كەشىرىممەن كەلەدى.

ءارقاشان ماحابباتتى تاڭداڭىز

نەگىزىندە باقىتتى ءومىر ءسۇرۋدىڭ ەڭ باستى قۇپياسى - وسى. ەگەر ءارقاشان دا وسى ۇستانىمدا بولساڭىز سىزدەردىڭ باقىتتى ومىرلەرىڭىزگە ەشقانداي قاۋىپ-قاتەر جوق. ماحابباتقا سەنىڭىزدەر، ول ءوزى-اق سىزدەردى قيىندىقتان قۇتقارىپ الادى.

P. S. جۇبايلىق ومىردە ءارقاشان دا ءبارى جاقسى بولا بەرمەيدى. ال سول جاقسىلىق بولۋى ءۇشىن كۇرەسۋ كەرەك.

دايىنداعان: ارداق قۇلتاي

massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى