ن. نازاربايەۆ كينويندۋستريا قازاقستاندىقتاردىڭ مادەنيەتىن دامىتۋدا ماڭىزدى ءرول اتقاراتىنىن اتاپ ءوتتى
كەزدەسۋدە وتاندىق كينەماتوگرافيانىڭ جاعدايى مەن دامۋ پەرسپەكتيۆالارى، كينوستۋديانىڭ قازىرگى جۇمىسى، سونداي- اق الداعى كەزەڭگە ارنالعان جوسپارلارى تالقىلاندى.
مەملەكەت باسشىسى بۇگىندە كينوستۋديا قازاقستاندىقتاردىڭ مادەني دامۋىندا ايرىقشا ءرول اتقاراتىنىنا نازار اۋداردى. وسى سالانىڭ نىعايۋى ءۇشىن مەملەكەت تاراپىنان بارلىق قاجەتتى جاعدايلار جاسالۋدا. كينوستۋديا جوعارى دارەجەلى جابدىقتارمەن جانە زاماناۋي ءتۇسىرۋ الاڭدارىمەن قامتاماسىز ەتىلگەن.
نۇرسۇلتان نازاربايەۆ وسكەلەڭ ۇرپاقتىڭ تاربيەسىنە وڭ ىقپالىن تيگىزۋى ءتيىس پاتريوتتىق تاقىرىپتاعى فيلمدەر ءوندىرىسى قاجەتتىگىن اتاپ ءوتتى.
قازاقستان پرەزيدەنتى قازاق حاندىعىنىڭ ءتۇرلى تاريحي كەزەڭدەرىنە جانە سول زاماننىڭ ايتۋلى تۇلعالارىنا ارنالعان كينولار ءتۇسىرۋدىڭ وزەكتىلىگىنە توقتالدى.
نۇرسۇلتان نازاربايەۆ قازاقستاندىقتاردىڭ جاس بۋىنىن ادامگەرشىلىك رۋحتا تاربيەلەۋگە باعىتتالعان انيماتسيالىق فيلمدەر جاساۋدىڭ ماڭىزدىلىعىن دا ايتتى.
ە. امانشايەۆ كينوستۋديانىڭ جىل سوڭىنا دەيىن پروكاتقا ءتۇرلى تاقىرىپتاعى 8 فيلم شىعارۋدى جوسپارلاپ وتىرعانىن مالىمدەدى. سونداي- اق، قازاقستاندىق كينوفيلمدەر بىلتىر 1 ميلليوننان استام كورەرمەن جيناعانىن اتاپ ءوتتى.
