قازاق تىلىندەگى كورەي ەرتەگىلەرى كىشكەنتاي وقىرماندارعا جول تارتپاق
كورەي تىلىنەن قازاقشاعا العاش اۋدارىلىپ، وقىرمانعا ۇسىنىلىپ وتىرعان كىتاپتىڭ اۆتورى ەسىمى ەلىمىزگە تانىمال بولا باستاعان شىعىستانۋشى، اۋدارماشى، جەرگىلىكتى جانە مەملەكەتتىك باسقارۋ سالاسىنىڭ مامانى داستان اقاش.
سوڭعى كەزدەرى بايقاپ جۇرگەنىمىزدەي، قازاقستان مەن كورەي ەلىنىڭ اراسىنداعى مادەني ەكونوميكالىق بايلانىستار ۋاقىت وتكەن سايىن جاڭا دەڭگەيگە كوتەرىلىپ كەلە جاتىر. وسى ورايدا ەكى ەلدىڭ مادەني ومىرىندەگى ۇقساستىقتار ءجيى ايتىلۋدا. تامىرى تەرەڭدە جاتقان بۇل ۇقساستىقتار كىتاپقا ەنگەن كورەي ەرتەگىلەرىنىڭ ءارقايسىسىنان ايقىن اڭعارىلادى.
كورەي ەلىنىڭ ەڭبەكقورلىعىن، ادالدىعىن، مەيىرىم-قايىرىلىمدىعىن، ىزەتتى دە، ىزگى قاسيەتتەرىن ارقاۋ ەتكەن ەرتەگىلەردىڭ ءتىلى تارتىمدى، مازمۇنى باي. ءبىر سوزبەن ايتقاندا، بالالار ساناسىنا لايىقتى تىلمەن اۋدارىلعان كىتاپتاعى 10 ەرتەگىنىڭ وقىرماندى ويلانتىپ-تولعانتارى، بەي-ءجاي قالدىرماسى انىق. كىتاپ ءبۇلدىرشىن قازاق بالالارىنا عانا ەمەس، كورەي ءتىلىن ۇيرەنۋشى ستۋدەنت جاستارعا، كورەي مادەنيەتى مەن ەكونوميكاسىنا قىزىعۋشىلارعا ارنالعان.
جالپى بالالار ادەبيەتى الەم حالىقتارىنىڭ بارلىعىنا ورتاق قازىنا. سول قازىنادان ۇرپاقتى حاباردار ەتۋ ەل ەرتەڭىن ويلاعاندىقتىڭ بەلگىسى. «فوليانت» باسپاسىنىڭ وسى رەتتەگى كىشكەنتاي وقىرماندارعا كورەي حالقىنىڭ ەرتەگىلەرىن قىزىقتى كوركەم سۋرەتتەرمەن ۇسىنۋى - قۋانارلىق تا، قۇپتارلىق جاي. جاقسىلىقتىڭ كوشباسشىسى بولعان باسپا ءوزىنىڭ جاقسى ىستەرىن الداعى ۋاقىتتاردا دا جالعاستىرماق ويدا. كىشكەنتاي وقىرماندار جۋىق ارادا «كورەي ەرتەگىلەرىنىڭ» ەكىنشى كىتابىمەن دە قاۋىشاتىن بولادى.
