قىتايدا تۇتقىندالعان قازاق قىزىن ەكى ادۆوكات قورعايدى
- دەپ حابارلايدى kaz.tengrinews.kz.
20 جاستاعى اقجارقىن تۇرلىباي وسى جىلدىڭ ناۋرىز ايىندا كەلەڭسىز جاعدايعا تاپ بولعان ەدى. ستۋدەنتتى الماتى بارلارىنىڭ بىرىندە جۇمىس ىستەگەن الەنا جانە دجونني ەسىمدى بەلگىسىز بىرەۋلەر قىتايعا جۇك جەتكىزىپ بەرۋگە جۇمساعان. اقجارقىنعا بەرىلگەن جۇكتە ەسىرتكى بار بولىپ شىقتى.
«اقجارقىن تۇرلىباي 3 - ناۋرىز كۇنى گۋاڭجوۋ اۋەجايىندا ۇستالدى، ەلشىلىك ءبىرىنشى كۇننەن باستاپ، ونىڭ قۇقىقتارى مەن مۇددەلەرىن قورعاۋعا بەلسەنە كىرىستى. گۋاڭجوۋعا ءىسساپارعا جىبەرىلگەن ەلشىلىك كونسۋلى وقيعانىڭ جاي- جاپسارىن انىقتاۋ ءۇشىن قالانىڭ قۇقىق قورعاۋ ورگاندارىنىڭ وكىلدەرىمەن جانە تەرگەۋ يزولياتورىندا وتىرعان قىزدىڭ وزىمەن كەزدەستى.
قازىر تەرگەۋ ءجۇرىپ جاتىر. تۇرلىبايدىڭ مۇددەسىن قورعاۋدى ۇيىمداستىرۋمەن ءبىز جالداعان ەكى ادۆوكات اينالىسىپ جاتىر. ولاردىڭ ءبىرى ءىس بويىنشا قاجەتتى ماتەريالدار جيناۋ ءۇشىن قازاقستانعا ەكى رەت باردى. ەلشىلىك تەرگەۋدىڭ بارىسىن مۇقيات باقىلاپ وتىر، قىتايدىڭ قۇقىق قورعاۋ ورگاندارىمەن تۇراقتى بايلانىس جاساپ، ادۆوكاتتار مەن قىزدىڭ تۋىستارىنا قاجەتتى كومەكتى كورسەتىپ جاتىر. قازاقستان ازاماتشاسىنىڭ مۇددەسى ءۇشىن ءبىز تولىق اقپاراتتى بەرە المايمىز»، - دەدى نۇرلان ەرمەكبايەۆ.
بۇعان دەيىن اقجارقىن تۇرلىبايدىڭ تۋىستارى قىزدىڭ ۇستالۋىنا قاتىستى تولىق مالىمەتتەردى بىلمەيتىنىن مالىمدەگەن بولاتىن. قىتايدا ەسىرتكى كونترابانداسى ءۇشىن ۇزاق مەرزىمدى، ءتىپتى ءومىر بويعى جازا دا بەرىلەدى. قىزدىڭ اناسى ونى الدەكىمدەردىڭ الداپ كەتكەنىنە سەنىمدى. الماتى قالاسى ىشكى ىستەر دەپارتامەنتى بار قىزمەتكەرلەرىنە قاتىستى تەرگەۋ الدى تەكسەرىس جۇرگىزىپ جاتىر.
