قىتايلىق كاسىپكەرلەر كۇنباعىس وڭدەيتىن زاۋىت اشۋعا نيەت بىلدىرۋدە
اتباسار اۋدانىنا ارنايى كەلگەن قىتاي كاسىپكەرلەرى العاشقى كەلىسسوزدەر جۇرگىزىپ، بىزدەگى ىشكى نارىقتىڭ جاي- كۇيىمەن تانىسىپ قايتتى. شىنجاڭدىق كاسىپكەرلەرى اقمولا وبلىسىنا ەكىنشى رەت كەلدى. العاش كەلگەندە اتباسار اۋدانىنان ۇن ساتىپ الىپ كەتكەن. قازاقستاندىق ۇننىڭ ساپاسى ول جاقتا جوعارى باعالانىپ، وسى جولى قىتايلىقتار ورتاق ارىپتەستىك قۇرىپ، الىس- بەرىستى نىعايتۋعا نيەت ءبىلدىرىپ وتىر.
دين فىن، كومپانيا ديرەكتورىنىڭ ورىنباسارى:
- قازاقستاندا شەتەلدەن ينۆەستيتسيا تارتىپ، اۋىلشارۋاشىلىعىن كوتەرۋ ساياساتى قارقىندى ءجۇرىپ جاتقانىن جاقسى بىلەمىز. ءبىز بۇعان دەيىن ۇن تاسمالدادىق. ەندى مايلى داقىل ساتىپ الۋدى كوزدەيمىز. قىتايلىقتاردىڭ قىزىعۋشىلىعى قازاقستاننىڭ كۇنباعىسىنا اۋىپ وتىر.
وسى كەلىستەرىندە 100 مىڭ توننا شەمىشكە ساتىپ الۋعا نيەت ءبىلدىردى. الايدا مۇنداي ۇلكەن كولەمدى ءونىم اتباسار اۋدانىنان شىقپايدى. مەملەكەت مايلى داقىلدىڭ گەكتارىنا 7 مىڭ تەڭگەدەن سۋبسيديا بولگەنىنە قاراماستان، شارۋالاردىڭ بۇل ىسكە ىقىلاسى از. ماگامەد دزەيتوۆ، شارۋاشىلىقتىڭ باس ديرەكتورى:
- بىزدە كۇنباعىستى ەككەنىمىزبەن، ونى ساقتايتىن قويما جانە وڭدەيتىن زاۋىت جوق. سوندىقتان كاسىپكەرلەر شىعىنعا باتامىز با دەپ قورقادى. تەك ءبىزدىڭ كومپانيا عانا بۇل ىسكە قادام باسىپ وتىر. بيىلدىڭ وزىندە 20 مىڭ گەكتارعا مايلى داقىل سەپتىك.
تاراپتار بۇل تىعىرىقتان شىعاتىن جولدى دا تاپتى. قازاق- قىتاي بىرلەسىپ، كۇنباعىس مايىن وڭدەيتىن زاۋىت، ساقتايتىن قويما سالۋدى جوسپارلاپ وتىر. ول ءۇشىن الدىمەن ىشكى نارىقتىڭ وتىمدىلىگىن باعامدايمىز.
دين فىن، كومپانيا ديرەكتورىنىڭ ورىنباسارى:
- ءبىزدىڭ قاجەتتىلىكتى قاناعاتتاندىرا ما؟ سۇرانىس قالاي بولماق؟ تاسىمال ماسەلەسى دە كۇردەلى. سوندىقتان وسىنىڭ ءبارىن قازىر زەرتتەپ- تالداپ وتىرمىز. نەگىزىنەن بۇل ايماق - مايلى داقىل وسىرۋگە تاپتىرمايتىن جەر.
قازىردىڭ وزىندە اۋدانداعى ۇن شىعارۋشى كاسىپورىن قىرعىزستان، تۇرىكمەنستان جانە رەسەيگە ءونىم ەكسپورتتايدى. ال كۇنباعىس زاۋىتى اشىلسا، ەۋروپا مەن ا ق ش نارىعىنا جول تارتۋ جوسپارلانۋدا. ينتەگراتسيانىڭ يگىلىگىن كورىپ وتىرعان قازاقستاننىڭ اۋىلشارۋاشىلىعى سالاسىنداعى بۇل تاعى ءبىر بەلەس بولماق.
www.24.kz
