ەلگە ورالعان قانداستارىمىز جۇمىس جانە باسپانامەن قامتىلادى
قوستاناي وبلىسىندا شارۋا قوجالىقتارى شەتتەن كەلگەن اعايىنداردى قۋانا قارسى الادى. بۇگىندە بىرنەشە وتباسى اۋىلدىق جەرلەرگە قونىستانعان.
ماناسبەك پەن اسەمنىڭ اتا- اناسى وزبەكستاندا تۇرادى. وزدەرى 2012 - جىلى رۋدنىي قالاسىنا كوشىپ كەلدى. ولار بالالارىنىڭ بولاشاعىن ويلاپ، 5 اي بۇرىن پەرۆوماي اۋىلىنا قونىس اۋداردى. جاس وتباسىنىڭ ەندىگى ماقساتى - وسىندا اتا- انالارىن كوشىرىپ الۋ.
اسەم پىرييەۆا، اۋىل تۇرعىنى:
- قالادا ەكى جىل تۇردىق. پاتەرگە ايىنا 40-50 مىڭ تەڭگەگە دەيىن كەتەتىن ەدى. مۇندا تەك جارىقتىڭ اقشاسىن عانا تولەيمىز. وسىندا كەلگەلى جاعدايىمىز جاقسى. جاس جۇبايلارعا باسپانا جەرگىلىكتى شارۋاشىلىقتىڭ ەسەبىنەن بەرىلدى. وتاعاسى دا كەلىسىمەن ۆەت تەحنيك بولىپ جۇمىسقا ورنالاستى.
ماناسبەك «اۋىلدىق جەردە ىستەيمىن دەگەن ادامعا كاسىپ بار. سوندىقتان شەتتەن كەلگەندەر جەرگىلىكتى بيلىك نۇسقاعان جاققا بارعانى دۇرىس» ، - دەيدى.
ماناسبەك قوشماحانوۆ، اۋىل تۇرعىنى:
- ءبىز ايتقان جاعىنا باردىق. جۇمىسقا ورنالاستىردى، ءۇي، مال بەردى. جايعاسىپ جاساپ جاتىرمىز.
ماناسبەكتىڭ تاعدىرلاسى تويمۇرات سۇتتىبايەۆ تا بيىل كالينين اۋىلىنا قونىس تەپكەن. جەرگىلىكتى شارۋاشىلىق وعان دا ءۇي- جاي، ساۋىندىق مال بەردى. ەلدى مەكەننىڭ ىرگەسى سەتىنەمەس ءۇشىن سەرىكتەستىك بوساعان ۇيلەردى ساتىپ الىپ قالادى. مۇندا مالشى مەن مەحانيزاتور قاشان دا قاجەت.
سەرىكباي وماروۆ، شارۋاشىلىق جەتەكشىسىنىڭ ورىنباسارى:
- اۋىلدى ىدىراتپاي ۇستاۋ، ادامدارعا جۇمىس بەرۋ - باستى ماقسات. قىزمەت ىستەيمىن دەگەن ادامدارعا جۇمىس قاشان دا تابىلادى.
سوڭعى ءۇش جىلدا قوستاناي وبلىسىنا 1580 وتباسى، ياعني 4157 ادام ەلگە ورالعان. ولاردىڭ باسىم بولىگى قالادا. ءبىراق قالادا ءبارىن بىردەي جۇمىسپەن جانە باسپانامەن قامتۋ قيىن. سوندىقتان الەۋمەتتىك سالا ماماندارى ولاردى جۇمىس كۇشى قاجەت اۋىلدارعا باعىتتايدى.
ەرلان جاۋلىبايەۆ، قوستاناي وبلىستىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى:
- وزبەكستاننىڭ وزىنەن سول اۋىلدارعا كەلەمىز دەپ حابارلاسىپ جاتىر. شەتەلدەن كەلگەن قانداستارىمىزدى اۋىلدى جەرلەرگە تاراتىپ جاتىرمىز. ولاردىڭ ءۇي ماسەلەسىن شەشىپ بەرۋگە وبلىستا جاعداي بار. اۋىلعا كوشىپ كەلەم دەۋشى وتباسىلار ماماندىعىم جوق دەپ قينالماسا دا بولادى. مەملەكەتتىك باعدارلاما ارقىلى ولاردى قايتا دايارلاۋ جاعى دا مۇقيات قاراستىرىلعان.
الەۋمەتتىك سالا قىزمەتكەرلەرى بۇل باعىتتاعى جۇمىستى بولاشاقتا جۇيەلى تۇردە جۇزەگە اسىرۋعا نيەتتى.
