جەر شارىن ارالاپ شىققان قىتايلىق ساياحاتشى كەلەشەكتە قازاق دالاسىندا بولۋدى دا جوسپارلاپ وتىر
جۋىردا عانا ول كانادانىڭ مانيتوبە دەگەن جەرىندە بولعان ەدى. چەن گۋان مين قىتايدىڭ شىعىسىندا دۇنيە كەلگەن. بار ءومىرىن اۋىلشارۋاشىلىعىنا ارناپتى.
ول - وليمپيادالىق ويىنداردىڭ جانكۇيەرى. لوندوندا وتكەن وليمپيادانى كوزىمەن كورۋ ءۇشىن ول 7 جىل بۇرىن 60 مىڭ شاقىرىمدى ءجۇرىپ وتكەن. ءوزىنىڭ ۆەلوارباسىمەن 16 ەل مەن 1700 قالادا بولعان.
چەن گۋان مين، ۆەلوسيپەدپەن ساياحاتتاۋشى:
- الەمدى ۆەلواربامەن ساياحاتتاۋ مەنىڭ سالاۋاتتى ءومىر سالتىم بولىپ سانالادى. وسى ارەكەتىم ارقىلى وسىنداي جاستا دەنى ساۋ، بەلسەندى بولۋعا بولاتىنىن دالەلدەگىم كەلەدى. ەڭ باستىسى، ادام وپتيميست بولۋعا ۇمتىلۋى كەرەك. ءوزىنىڭ ىشكى رۋحىڭدى جوعالتپاۋ - ناعىز كەرەك دۇنيە. وسىلاي 10 مىڭداعان شاقىرىمداردى جۇرە كەلىپ، بارلىق جەردە كەزىككەن ادامدارعا جەر بەتىندەگى تەپە- تەڭدىكتى ساقتاۋ ءارقايسىسىمىزعا تىكەلەي بايلانىستى ەكەنىن ايتىپ جۇرەمىن.
ەندى چەننىڭ الدىندا باسقا ۇلكەن ماقسات تۇر. ول - 2016 - جىلى برازيليانىڭ ريو دە جانەيرو قالاسىندا وتەتىن وليمپيادانىڭ اشىلۋىنا قاتىسۋ. ونىڭ ءجۇرىپ وتەتىن جولى كانادا ارقىلى ا ق ش پەن لاتىن امەريكا اراسىن جالعايدى. قازىر فەرمەر چەن كانادالىقتاردىڭ اراسىندا تانىمال. ولار ساياحاتشىنىڭ ۆەلوارباسىن جوندەسىپ، كەرەك- جاراعىن الىپ بەرۋگە كومەكتەسەدى ەكەن. ءبىر قىزىعى، چەن كەلەشەكتە قازاق دالاسىندا بولۋدى دا جوسپارلاپ قويعان.
چەن گۋان مين، ۆەلوسيپەدپەن ساياحاتتاۋشى:
- قازاقستان مەن قىتاي اراسىندا تىعىز قارىم- قاتىناس ورناعان. الداعى جوسپارلارىم بويىنشا قازاق ەلىنە كەلەسى جىلى بارام دەگەن ۇمىتتەمىن. بايقاعانىم، قازاقستاننىڭ تابيعاتى ءار الۋان بولىپ كەلەدى. كليماتى دا سولاي. سوندىقتان قازاقستاندا وتەتىن ساياحاتىم ەڭ قىزىقتى ساپارىمنىڭ بىرىنە اينالاتانىنا سەنەمىن.
ءوزىن الەم ادامى سانايتىن چەن مۇنىمەن توقتامايتىنىن ايتادى. ءوزىنىڭ ەسكى ۆەلوسيپەدىمەن ءالى دە جەر شارىن ارالاماق. سونداعى ماقساتى - الەمگە سالاۋاتتى ءومىر سالتىن ناسيحاتتاپ، جەر بەتىندە بەيبىتشىلىكتىڭ تۇراقتاۋىنا تىلەكشى بولۋ.
www.24.kz
