الەم رەكوردىن ورناتقان ءامىرباي رىسقۇلوۆ دۇنيەدەن وزدى
جەرلەسىمىزدىڭ قازا بولۋىنا بايلانىستى ۆيتەبسك قالاسىنىڭ پوليتسيا قىزمەتكەرلەرى تەكسەرۋ جۇرگىزۋدە. 77 جاسقا كەلگەن ءامىرباي رىسقۇلوۆ بەلارۋس جەرىنە كىر تاسىن كوتەرۋدەن الەمدىك ترياتلون وليمپياداسىنا بارعان. ول قازا بولار الدىندا قالانىڭ ورتالىق سپورت ارەناسىندا 10 كەلىلىك كىر تاسىن مينۋتقا كوتەرىپ جاتتىعىپ جاتقان.
جاتتىعۋىن اياقتاپ بولعاننان كەيىن سپورتشى تۇعىردان ءتۇسىپ، بىردەن ەسىنەن تانىپ قۇلاعان. وقيعا ورنىنداعى العاشقى جەدەل جاردەم كومەگى مەن دارىگەرلەر وتانداسىمىزدىڭ ءومىرىن ساقتاپ قالا الماپتى. جەدەل جاردەم قىزمەتكەرلەرىنىڭ ايتۋىنا قاراعاندا، ءامىرباي رىسقۇلوۆتىڭ جۇرەگى توقتاپ قالعان.
ايتا كەتەيىك، ءامىرباي رىسقۇلوۆ الماتى وبلىسىنداعى كوكسۋ اۋدانىنىڭ مامبەت اۋىلىندا دۇنيەگە كەلگەن. ول سوڭعى بەس-التى جىل بارىسىندا كىر تاسىن كوتەرۋدەن الەمدىك، قۇرلىقتىق، حالىقارالىق جارىستاردا توپ جاردى. جارتى ساعات ىشىندە 10 كيلوگرامدىق كىر تاسىن 750 رەت كوتەرىپ، گيننەستىڭ رەكوردتار كىتابىنا ەنگەن.
