گولوۆكيندى نوكاۋتقا جىبەرە الامىن - ماركو انتونيو رۋبيو

رۋبيو ءالى كۇنگە شارشى الاڭدا جەڭىلىستىڭ اشى ءدامىن تاتپاعان قازاقستاندىق بوكسشىنىڭ جولىنا توسقاۋىل قويا الاتىندىعىنا سەنىمدى. 18- قازاندا گولوۆكينمەن وتەتىن جەكپە-جەك - مەكسيكالىق بوكسشىنىڭ باستى ماقساتى. ايتا كەتەرلىگى، رۋبيو WBC نۇسقاسى بويىنشا ۋاقىتشا الەم چەمپيونى جانە قازىرگى چەمپيونمەن ميگەل كوتتومەن جۇدىرىقتاسۋعا مىندەتتى. لايدا رۋبيو كومانداسى كوتتومەن تاياۋ ارالىقتا شارشى الاڭداعى كەزدەسۋدىڭ وتە قوياتىندىعىنا سەنىمسىز.

رۋبيونىڭ اتاپ وتۋىنشە، گولوۆكين - جاقسى بوكسشى. ءبىراق، مەكسيكالىقتىڭ گەنناديدى جەڭۋگە شاماسى جەتەتىن كورىنەدى. «مەنىڭشە، گولوۆكين وتە مىقتى. ءبىراق، مەنىڭ وعان لايىقتى قارسىلاس بولۋعا، ءتىپتى نوكاۋتقا جىبەرۋگە دە كۇشىم جەتەدى. مەن بۇل جەكپە-جەكپە دايىندالماقپىن، كەزدەسۋ وتە قيىنعا تۇسەدى»، - دەدى ول.

ەستەرىڭىزگە سالا كەتەيىك، تاياۋدا باتىستىق باسىلىمدار كاسىپقوي بوكس ارەناسىندا ەل نامىسىن قورعاپ جۇرگەن جەرلەسىمىز گەننادي گولوۆكين كەلەسى كەزدەسۋىن 18- قازان كۇنى مەكسيكالىق مارك انتونيو رۋبيوعا قارسى وتكىزۋى مۇمكىن ەكەندىگىن جاريالاعان بولاتىن. مەكسيكالىق بوكسشى قازىرگى تاڭدا ورتا سالماقتاعى WBC تۇجىرىمى بويىنشا چەمپيوندىق بەلبەۋدىڭ ۋاقىتشا يەگەرى سانالادى. سوڭعى كەزدەسۋىن ءساۋىر ايىندا يتاليان دومەنيكو سپاداعا قارسى وتكىزىپ، مەزگىلىنەن بۇرىن جەڭىسكە جەتكەن. 34 جاستاعى بوكسشى 2000- جىلدان بەرى كاسىپقوي بوكستا باق سىناپ كەلەدى. وسى ارالىقتا 62 جەكپە-جەك وتكىزىپ، 55 ىندە جەڭىسكە جەتكەن. 6 كەزدەسۋىندە جەڭىلىس تاپسا، 1 جۇدىرىقتاسۋىن تەڭ اياقتاعان. ال 55 جەڭىسىنىڭ 48 ىندە قارسىلاسىن نوكاۋتقا جىبەرگەن.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى