الماتىدا مەملەكەتتىك تۋدىڭ اۆتورى شاكەن نيازبەكوۆتى اقتىق ساپارعا شىعارىپ سالۋ ءراسىمى ءوتتى- فوتو
قارالى جيىنعا قاتىسقان قالا باسشىسى احمەتجان ەسىموۆ ەلباسىنىڭ اتىنان كەلگەن كوڭىل ايتۋى جەدەلحاتىن وقىپ بەردى.
«شاكەن نيازبەكوۆ - قازاق ونەرىنىڭ كورنەكتى وكىلى، حالقىمىزدىڭ ماقتان تۇتارى اياۋلى پەرزەنتى. ونىڭ ومىردەن وزۋىنا بايلانىستى جاقىندارىنىڭ اۋىر قايعىلارىنا ورتاقتاسىپ، كوڭىل ايتامىز. شاكەن وڭداسىن ۇلى وتاندىق كوركەم ونەردى دامىتۋعا، تاۋەلسىز ەلىمىزدىڭ وركەندەۋىنە ۇلەس قوسقان زيالى تۇلعا ەدى. مارقۇمنىڭ جۇمىستارى نەگىزىنەن پاتريوتتىق رۋحتا جازىلعان. ونىڭ ق ر مەملەكەتتىك تۋىنىڭ اۆتورى بولۋى - تۋما تالانتى مەن وتانىن شەكسىز سۇيگەندىگىنەن دەپ بىلەمىز. تاۋەلسىزدىگىمىز باياندى بولعان سايىن مارقۇمنىڭ رۋحى حالقىمەن بىرگە ماڭگى ءومىر سۇرە بەرمەك. جاتقان جەرى جارىق، يمانى سالاۋات بولعاي» ، - دەدى ق ر پرەزيدەنتى نۇرسۇلتان نازاربايەۆتىڭ كوڭىل ايتۋ جەدەلحاتىن وقىعان قالا اكىمى احمەتجان ەسىموۆ.
قارالى جيىنعا سۋرەتشىنىڭ تۋعان- تۋىستارى، ارىپتەستەرى، زيالى قاۋىم وكىلدەرى قاتىستى.
«بۇگىن قازاق ونەرى، قازاق مادەنيەتى ورنى تولماس قايعىعا دۋشار بولىپ وتىر. بۇگىن شاكەن سىندى اسقار تاۋداي اتامىزدى اقتىق ساپارعا شىعارىپ سالىپ جاتقان جايىمىز بار. قازاقتىڭ بەينەلەۋ ونەرىنىڭ ءىرى تۇلعاسى شاكەن وڭداسىن ۇلى بارلىق بولمىسىندا «حالقىم، ەلىم» دەپ ەڭبەك ەتكەن ادام. الماتىنىڭ كوركەيۋى مەن وسۋىنە ىقپال ەتىپ، 20 جىلعا تاياۋ قالانىڭ باس سۋرەتشىسى بولعان ادام. ارتىنا تالاي شاكىرت قالدىرعان. وسىنداي ءىرى ادامنىڭ دۇنيەدەن ءوتۋى ۇلكەن سالماق» ، - دەدى قازاقستاننىڭ حالىق ءارتىسى، رەجيسسەر، پروفەسسور وبايەۆ ەسمۇحان.
