الماتى سيركىندە «يكار تۋرالى اڭىز» سپەكتاكلىنىڭ پرەمەراسى ءوتتى

«تەاترلاندىرىلعان قويىلىمدا حالىقارالىق، رەسپۋبليكالىق فەستيۆالداردىڭ جەڭىمپازدارى ونەر كورسەتەدى. باعدارلاما سيرك ونەرىنىڭ ءتۇرلى جانرىن قامتيدى. كەلۋشىلەر كوڭىلدى سايقىمازاقتاردىڭ ونەرى مەن جان-جانۋارلاردىڭ قاتىسۋىمەن بولاتىن جۇلدىزدى شوۋعا كۋا بولادى»، - دەدى «كازمەمسيرك» م ك ك ديرەكتورى داۋلەت دوسباتىروۆ.

وڭتۇستىك استانا تۇرعىندارى «التىن كالەيدوسكوپ» باعدارلاماسىن تامىزدىڭ 16 مەن 31 ارالىعىندا تاماشالاي الادى.

قويىلىمنىڭ باستى ءنومىرى د. دوسباتىروۆتىڭ «ازيا جاڭعىرىعى» فەستيۆالىندە گران-پري العان «يكار تۋرالى اڭىزى» بولماق. سپەكتاكلدە سيركتىڭ ەڭ جاس اكتريساسى 9 جاسار مارينا ستارودۋبوۆا وينايدى.

سيۋجەت جەلىسى بويىنشا قىز بالا يكار تۋرالى اڭىزدى وقىپ وتىرىپ، ەرتەگىلەر الەمىنە ەنىپ كەتەدى. وندا شۋاقتى كۇنگە ۇمتىلعان يكار قاناتىن كۇيىك شالىپ، جەرگە قۇلدىرايدى.

داۋلەت دوسباتىروۆ بۇل ءنومىردى بىلتىر باسىنان وتكەن قاۋىپتى جاعدايدان كەيىن قويعان. ءارتىس قاۋىپتى تريۋك جاساۋ كەزىندە رەمەن ءۇزىلىپ كەتىپ، 4 ومىرتقاسىن زاقىمداعان كورىنەدى.

حالىقارالىق فەستيۆال جەڭىمپازدارى اندرەي مەن ءاليا قاناحيندەر ومىردەگى سەزىمدەرىن ساحناعا الىپ شىقتى. جۇلدىزدى جۇپ «ماحاببات ءبيىن» تىك تۇرعان ماتچادا بيلەيدى. سونداي-اق، كورەرمەن «نوماد» اكروباتيكالىق شوۋىندا سيرك سايگۇلىكتەرىنىڭ سىمداي تارتىلعان سىمباتىن تاماشالايتىن بولادى.

اۆتور: گۇلميرا ءعوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى