فۋتبول: انگليا پرەمەر- ليگاسىنىڭ جاڭا ەرەجەلەرى جايىندا بىلەسىز بە؟

ەسىنەن تانعان ويىنشى الاڭعا قايتا شىقپايدى

انگليا فۋتبول قاۋىمداستىعى ويىن كەزىندە ەسىنەن تانعان فۋتبولشىنىڭ قايتا ويىنعا ارالاسۋىنا تىيىم سالدى. ەندى فۋتبولشىنىڭ الاڭعا قايتا شىعۋىن باپكەرلەر قوسىنى شەشپەيتىن بولادى. سونىمەن قاتار، ەسىنەن تانعان فۋتبولشى ارادا التى كۇن وتپەي كەلەسى كەزدەسۋگە قاتىسپايتىن بولىپ شەشىلدى. وتكەن ماۋسىمدا «توتتەنحەم» قاقپاشىسى ۋگو لوريس رومەلۋ لۋكاكۋمەن قاقتىعىسىپ قالىپ، ەسىنەن تانىپ قالعان ەدى. ءبىراق، گولكيپەر مەن دارىگەرلەر، جانە ويىنشىنىڭ ءوزى ويىندى جالعاستىرۋعا رۇقسات العان. الايدا كەيىننەن فرانسيا قۇراماسىنىڭ ويىنشىسى دەنساۋلىعىنا بايلانىستى بىرنەشە كەزدەسۋلەرگە شىعا الماي قالعان-دى.

فۋتبولشىلار بۋكمەكەرلەرگە بارىپ ءباس تىكپەيدى

انگليا فۋتبول قاۋىمداستىعى فۋتبولشىلاردىڭ ءباس تىگۋىن قاتاڭ باقىلاۋعا الدى. وسىعان دەيىن ويىنشىلار ءوز كومانداسى مەن قاتىسىپ جاتقان جارىستارعا ءباس تىگە المايتىن بولسا، جاڭا ماۋسىمنان باستاپ بارلىق ويىندارعا ءباس تىگۋگە تىيىم سالىندى. قاۋىمداستىقتىڭ باس حاتشىسى الەكس حورننىڭ ايتۋىنشا، بۇل كەلىسىلگەن ويىنداردىڭ الدىن الۋ ءۇشىن جاسالىپ وتىرعان ءىس ەكەن. سونىڭ ارقاسىندا اعىلشىن پرەمەر-ليگاسى الەمدە ەڭ ءادىل وتەتىن ويىندارىمەن ەرەكشەلەنەتىن بولادى دەپ مالىمدەۋدە.

جانكۇيەرلەرگە عالامتورعا ويىن ساتىنەن كورىنىستەر سالۋعا بولمايدى

انگليا پرەمەر-ليگاسى باسشىلىعى جانكۇيەرلەردىڭ ويىن ساتىندەگى بەينە جانە فوتو كورىنىستەردى الەۋمەتتىك جەلىلەردە سالۋعا تىيىم سالىپ وتىر. الەۋمەتتىك جەلىلەردەگى مۇنداي قادامدار اۆتورلىق قۇقىقتى بۇزۋ بولىپ تابىلاتىنىن قاتاڭ ەسكەرتۋدە. بۇقارالىق اقپارات قۇرالدارىندا، پرەمەر-ليگانىڭ باسپا ءسوز حاتشىسى دەن دجونسون سۋرەتتەر مەن ويىنداعى ايرىقشا كورىنىستەردى الەۋمەتتىك جەلىلەردە جاريالاعاندار ارنايى جاڭا تەحنولوگيا كومەگىمەن انىقتالاتىنىن باسا ايتۋدا. جاڭادان ىسكە قوسىلعالى وتىرعان جۇيە twitter، instagram جانە vine جەلىلەرىندەگى اقپارات يەلەرىن اۆتوماتتى تۇردە انىقتاپ، حابارلامالارىن جويىپ وتىراتىن كورىنەدى. بۇل جاڭالىقتى، اسىرەسە، سپورت تەلەارنالارى قۋانا قابىلداپ وتىر.

ەستەرىڭىزگە سالا كەتسەك، وسىعان دەيىن «مانچەستەر يۋنايتەد» كلۋبىنىڭ باسشىلىعى «ولد تراففوردقا» پلانشەت نە نوۋتبۋك الىپ كىرۋگە بولمايتىنىن، جانە كولەمى 15x10 كەلەتىن وزگە دە كورىنىستەردى تۇسىرە الاتىن تەحنولوگيا قۇرالدارىن الىپ كەلۋگە رۇقسات جوعىن جانكۇيەرلەرىنە ەسكەرتكەن بولاتىن.

اعىلشىن پرەمەر-ليگاسىنىڭ 2014-2015- جىلعى ماۋسىمداعى ويىندارىنىڭ شىمىلدىعىن بۇگىن، 16- تامىزدا «مانچەستەر يۋنايتەد» پەن «سۋونسي» كوماندالارى تۇرەدى. تاعى ءبىر ايتا كەتەتىنى، الەمدەگى تارتىستى بىرىنشىلىك سانالاتىن اعىلشىن پرەمەر-ليگاسىنىڭ ويىندارىن «KazSport» جانە «قازاقستان» ارنالارىنان تاماشالاي الاسىزدار. ەل سپورتىنىڭ جارشىسى سانالىپ جۇرگەن ارنا الداعى ەكى ماۋسىم ويىندارىن كورسەتۋگە كەلىسىمگە وتىرعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى