قازاقستاندا ورىس ءتىلى سىرتتان «قورعاۋعا» مۇقتاج ەمەس - م. ءتاجين
«ۇزاق ءارى تۇشىمدى سۇحباتتان كەيىن ك. كوساچيەۆ قازاقستاندىق ديپلوماتيالىق ميسسيانىڭ باسشىسىنا اگەنتتىكتىڭ قىزمەتى, الدىنا قويىلعان مىندەتتەرى جايىندا، ونىڭ ىشىندە «شەتەلدەگى وتانداستارعا جەكە كومەك كورسەتۋ، مادەني- گۋمانيتارلىق قاجەتتىلىكتەرىن قامتاماسىز ەتۋ تۋراسىندا ايتىپ بەردى» ، - دەلىنگەن حابارلامادا.
ءوز كەزەگىندە م. ءتاجين اگەنتتىكتىڭ بارشا الەم بويىنشا گۋمانيتارلىق ىقپالداستىق ورناتۋ، شەتەلدەردەگى رەسەيدىڭ باي مادەني مۇراسىن ساقتاۋ جانە قولداۋ ىسىن جوعارى باعالادى.
قازاقستانداعى ورىس ءتىلىنىڭ جاعدايى مەن دامۋىنا قاتىستى تاقىرىپتى قوزعاعان تاراپتار، ورىس تىلىنە رەسمي ءتىل رەتىندە مەملەكەتتەن قولداۋ جاسالىپ، بارشا قازاقستاندىق قوعامنىڭ سۇرانىسىنا يە ەكەندىگىن، سونىمەن قاتار قازاق تىلىمەن تەڭ جاعدايدا قولدانىلىپ جاتقاندىعىن جانە سىرتتان «قورعاۋعا» مۇقتاج ەمەستىگىن اتاپ ءوتتى, دەپ جازىلعان حابارلامادا.
م. ءتاجين اگەنتتىكتىڭ مىندەتتەرى - «بۇدان بىلايعى ىقپالداستىق ۇدەرىستەرىنىڭ ىرگەتاسىن قالاۋعا باعىتتالعان مادەني- رۋحاني سيپاتقا يە مىندەتتەر» ەكەندىگىنە باسا نازار اۋداردى.
ق ر ەلشىسىنىڭ ايتۋىنشا، سونداي بىرلەسكەن ءتيىمدى جۇمىستاردىڭ دالەلى رەتىندە كۇزدە ماسكەۋدە وتكەلى وتىرعان قازاقستان جانە رەسەي جازۋشىلارىنىڭ كەزدەسۋىن، ورىس مادەنيەتتانۋشىلارى - دميتريي ليحاچيەۆ، ليەۆ گۋميليەۆ، قىتايتانۋشى ۆاسيلي الەكسەيەۆ ەڭبەكتەرىنىڭ قازاق تىلىنە اۋدارۋ باعدارلاماسىنىڭ جۇزەگە اسىرىلۋىن كەلتىرۋگە بولادى. سونىمەن قاتار ەرميتاج، ترەتياكوۆ گالەرەياسى سىندى رەسەيلىك تانىمال مۇراجايلاردىڭ قازاقستانداعى مۋزەيلەردە، اسىرەسە استاناداعى جاڭادان اشىلعان ۇلتتىق مۇراجايدا كورمەلەرىن وتكىزۋ جايى دا ءسوز بولدى.
ءسوز سوڭىندا قازاقستاننىڭ ر ف- داعى ەلشىسى مەن اگەنتتىك جەتەكشىسى ارىپتەستىكتى تەك قازاقستان ەلشىلىگى اياسىندا عانا ەمەس، سونداي- اق مەملەكەتتىك ورگاندار مەن قوعامدىق ۇيىمدار اراسىندا دا ىقپالداستىقتى ىس جۇزىندە كەڭەيتۋگە دايىن ەكەندىكتەرىن اتاپ ءوتتى.
اۆتور: جاسۇلان جولدىبايەۆ
