ەردوعان: تۇركيادا «جاڭا كەزەڭ» باستالادى
تۇركيادا 10 - تامىز كۇنى ەل تاريحىندا العاش رەت توتە داۋىس بەرۋ جولىمەن وتكەن پرەزيدەنت سايلاۋىنىڭ الدىن الا ناتيجەسى بويىنشا پرەمەر- ءمينيسترى رەجەپ تايىپ ەردوعان جەڭىسكە جەتكەنى حابارلاندى.
جەكسەنبى كۇنى انكارادا ءوزىنىڭ «ادىلەت جانە دامۋ» پارتياسىنىڭ شتاب- پاتەرىندە سويلەگەن سوزىندە ەردوعان ەلدە «تاتۋلاسۋدىڭ جاڭا كەزەڭى» باستالاتىنىن مالىمدەدى. «بۇگىن ءبىز ءبىر كەزەڭدى اياقتاپ، ەكنىشى كەزەڭگە اياق باسىپ وتىرمىز. تۇركياداعى ەسكى داۋلاردى دوعارىپ، جاڭا الەۋمەتتىك تاتۋلاسۋ كەزەڭىنە كوشەيىك» دەدى ول.
داۋىس بەرۋ بيۋللەتەندەرىنىڭ كوپشىلىگى سانالعاننان كەيىنگى الدىن- الا ناتيجەلەر بويىنشا، سايلاۋشىلاردىڭ 52 پايىزى ەردوعانعا قولداۋ بىلدىرگەن. پرەزيدەنت سايلاۋىنا داۋىس بەرۋگە ازاماتتاردىڭ 73 پايىزدان استامى قاتىسقان.
ساياسي قارسىلاستارى ەردوعان بيلىكتى ءوز ۋىسىنا شوعىرلاندىرىپ، پارلامەنتكە، ۇكىمەت پەن سوت جۇيەسىنە باقىلاۋ ورناتۋى مۇمكىن دەپ الاڭدايدى.
رەجەپ تايىپ ەردوعان 2003 - جىلدان بەرى تۇركيا پرەمەر- ءمينيسترى قىزمەتىن اتقارىپ كەلەدى. ءوزى جەتەكشىلىك ەتەتىن «ادىلەت جانە دامۋ» پارتياسىنىڭ ەرەجەلەرى بويىنشا، ەردوعان كەلەسى كەزەڭگە ۇكىمەت جەتەكشىلىگىنە سايلانا المايدى.
پرەزيدەنت سايلاۋى الدىندا ەردوعان ەگەر جەڭىسكە جەتسە كونستيتۋتسياعا وزگەرىستەر ەنگىزىپ، پرەزيدەنتكە اتقارۋشى بيلىكتىڭ ءبىراز وكىلەتىن بەرۋ جونىندە مالىمدەگەن ەدى. ساراپشىلار ەردوعان جەڭسە تۇركيادا ساياسي بيلىكتىڭ سيپاتى وزگەرۋى مۇمكىن دەيدى.
ەردوعاننىڭ جاقتاستارى تۇركيا ەكونوميكاسىنىڭ قارقىندى ءوسۋىن، ەلدىڭ ساياسي ومىرىنە ىقپال جۇرگىزىپ كەلگەن اسكەريلەردى ساياساتتان الىس ۇستاۋىن جانە كونسەرۆاتورلارعا تەڭ قۇقىقتار بەرۋىن ەردوعاننىڭ باستى جەڭىسى دەپ بىلەدى.
ءبىراق ساياسي قارسىلاستارى ەردوعان بيلىكتى ءوز ۋىسىنا شوعىرلاندىرىپ، پارلامەنتكە، ۇكىمەت پەن سوت جۇيەسىنە باقىلاۋ ورناتۋى مۇمكىن دەپ الاڭدايدى.
تۇركيا پرەزيدەنتى سايلاۋىنا ەردوعاننان وزگە ەكى ۇمىتكەر ءتۇستى. پارلامەنتتەگى نەگىزگى وپپوزيتسيالىق پارتيالاردىڭ ورتاق كانديداتى ەكمەلەددين يحسانوگلۋ سايلاۋدا 38 پايىز داۋىس جيناسا، كۇردتەردىڭ قولداۋىنا سۇيەنگەن حالىقتىق دەموكراتيالىق پارتياسىنىڭ جەتەكشىسى سەلاحاتتين دەميرتاشتى جاقتاپ سايلاۋشىلاردىڭ 10 پايىزعا جۋىعى داۋىس بەرگەن.
پرەزيدەنتتى ۇلىقتاۋ 28 - تامىزعا بەلگىلەنگەن.
تۇركيادا رەسپۋبليكا پرەزيدەنتىن 1923 - جىلدان وسى ۋاقىتقا دەيىن پارلامەنت دەپۋتاتتارى سايلايتىن. پرەزيدەنتتى جالپى حالىقتىق سايلاۋدا توتە داۋىس بەرۋ جولىمەن تاڭداۋ تۋرالى وزگەرىس ەل كونستيتۋتسياسىنا 2007 - جىلى ەنگىزىلگەن.
سول جىلى تۇركيا پرەزيدەنتى بولىپ سايلانعان ابدوللا گۇل - ۇكىمەت جەتەكشىسى رەجەپ تايىپ ەردوعاننىڭ پارتيالاس سەرىگى. ونىڭ قىزمەت وكىلەتتىگى بيىل تامىزدا اياقتالادى.
«ازاتتىق»
