مەملەكەتتىك ءبىلىم گرانتتارى بولىنگەننەن كەيىن اتا-انالار نارازىلىق ءبىلدىردى
تاعى دا ءتىل ماسەلەسىنە قاتىستى.
تالاپكەرلەر مەن اتا-انالار قازاق تىلىندە ءبىلىم العاندار اسا جوعارى بالدىڭ وزىمەن وقۋعا تۇسە الماي قالاتىنىنا نارازى.
ويتكەنى، گرانت ناتيجەسىنە سايكەس 113 بالمەن جوعارى وقۋعا تۇسە الماعاندار بار ەكەن. ءتىپتى "التىن بەلگى" يەگەرلەرى تەگىن وقي المايتىن بولدى دەپ دابىل قاققاندار دا تابىلدى. ال، ورىس توپتارىنا تاپسىرعاندار ودان دا تومەن بالمەن ءدال سوعان سايكەس ماماندىققا وپ-وڭاي ءتۇسىپ كەتە الادى.
گرانت ناتيجەسىن وقىعاندا ءوز كوزىنە سەنبەگەندەردىڭ ءبىرى - نۇرگۇل سەيداحمەت. ۇلتتىق ءبىرىڭعاي تەستىلەۋدەن 113 بالل جيناعان تۇلەك وقۋعا تۇسەتىنىنە سەنىمدى بولعان. الايدا، مەملەكەتتىك ءبىلىم گرانتتارىن ءبولۋ ناتيجەسى اعىلشىن ءتىلى مامانى بولامىن دەگەن ارمانىن جەلگە ۇشىردى.
بويجەتكەن 3 كۇن بويى قابىلداۋ كوميسسياسىنان باستاپ، ءبىلىم مينيسترلىگىنە دەيىن قوڭىراۋلاتىپ ءجوندى جاۋاپ الا الماعان. "كوكشەتاۋداعى شوقان ءۋاليحانوۆ اتىنداعى ۋنيۆەرسيتكە قازاق فاكۋلتەتىنە 82 بالمەن تۇسكەن. ال مەن ءوز بالدارىممەن تۇسپەي قالدىم. مۇمكىن "التىن بەلگىنىڭ" جوقتىعى شىعار. ءبىراق اۋىل كۆوتاسى بار. بىلمەدىم. تۇسىنبەدىم ەشتەڭەنى"، - دەيدى تالاپكەر.
وسى جاعدايعا بايلانىستى ساياساتكەر زاۋرەش باتتالوۆا: "مەنىڭشە قابىلداعاندا تىلگە سۇيەنبەي، نەگىزگى قاي پاننەن قالاي ءبىلىم كورسەتە الدى، قانشا بالل الدى سول ارقىلى قابىلداۋ كەرەك. سودان كەيىن قانشا بالا قازاقشاعا تۇسەم دەيدى، قانشا بالا ورىسشاعا تۇسەم دەيدى سونى ءبولۋ كەرەك. ارينە، بۇل قارجى جاعىنا قارسى كەلەتىن شىعار. مەنىڭشە قارجى ساناي المايمىز، سوندىقتان بالالارعا وسىلاي قايشى جاسايمىز دەگەن دۇرىس ەمەس"، - دەگەن پىكىرىن ءبىلدىردى.
«ايقىن اقپارات»
